Սահմանադրական փոփոխությունների գործընթացը կտրված է հասարակությունից. փորձագետներ
06.07.2015
11:00
Հայաստանում ընթացող սահամանադրական փոփոխությունների գործընթացը, որը ենթադրում է գործող կիսանախագահական կառավարման համակարգից խորհրդարանական մոդելի անցում, ամբողջությամբ կտրված է հասարակությունից: Հասարակության մոտ կա անվստահություն ինչպես գործընթացի, այնպես էլ այն իրականացնողների նկատմամբ: Մեծ է հավանականությունը, որ այս պայմաններում նոր սահմանադրությունը չի գործելու: Այս կարծիքին են ինչպես քաղաքագետները, այնպես էլ իրավապաշտպանները:

Թեև Հայաստանում առաջին անգամ Սահամանադրությունը ընդունվել է 1995թ-ին և բարեփոխումների գործընթացով անցել 2005-ին, երկիրը դեռ հեռու է իրավական պետություն լինելուց: «Հայաստանում կա Սահամանդրություն, չկա սահամանադրականություն», - հաճախ է կրկնում այս խոսքերը Հայաստանի Սահամանադրական դատարանի նախագահ, սահամանդրական փոփոխությունների մասնագիտական հանձնաժողովի ղեկավար Գագիկ Հարությունյանը:

Տևական ժամանակ է ՀՀ նախագահ Սերժ Սարգսյանի նախաձեռնությամբ մեկնարկել է սահմանադրական բարեփոխումների գործընթաց: Այն ենթադրում է ոչ միայն սահամանդրության առանձին հոդվածների կատարելագործում, այլև կառավարման մոդելի փոփոխություն՝ ապահովելով անցում գործող կիսանախագահական համակարգից խորհրդարանականի: Ինչն էլ առաջացրել է իրավապաշտպանների և որոշ ընդդիմադիր քաղաքական ուժերի մտահոգությունը:

Նրանք կարծում են, որ կառավարման համակարգի փոփոխությունն իրականացվում է ոչ թե Խորհրդարանի դերի ուժեղացման և կառավարման որակի բարձրացման, այլ իշխանության վերարտադրության համար: «Արդյունքում սա կհանգեցնի նրան, որ հասարակական ընկալման մեջ կարժեզրկվի նաև խորհրդարանական համակարգը», - նշեց Հայաստանի Հելսինկյան կոմիտեի ղեկավար Ավետիք Իշխանյանը:

«Մեդիա կենտրոնում» հուլիսի 6-ին Ավետիք Իշխանյանի, APR Group կազմակերպության նախագահ Ռուբեն Սարգսյանի, Հանրային քաղաքականության, վերլուծության և երկխոսության ինստիտուտի փորձագետ, քաղաքագետ Հովհաննես Գալստյանի, «Հայկական սահմանադրական իրավապաշտպան կենտրոն» ՀԿ-ի նախագահ Գևորգ Մանուկյանի մասնակցությամբ տեղի ունեցավ «Կա՞ անհրաժեշտություն սահմանադրական փոփոխությունների, թե՞ ոչ» թեմայով քննարկում:

Հայաստանի առաջին սահամանադրությունը 1995 թ-ին, ըստ Ավետիք Իշխանյանի, ևս ընդունվեց հանրային և քաղաքական մերժման մթնոլորտում: «Այդ ժամանակ տեղի ունեցան խորհրդարանական ընտրությունները: Ընտրություններն անցան բռնություններով, որին զուգահեռ հանրաքվեի դրվեց սահամանդրությունը: Հայաստանն իրավական պետություն դառնալու քննությունը չկարողացավ տալ», - նշեց Իշխանյանը:

Թեև Իշխանյանը կողմ է կառավարման խորհրդարանական համակարգին, սակայն վստահ է, որ այն պետք է տեղի ունենա ընդդիմության ճնշման և հանրային հստակ պահանջի առկայության պայմաններում:

«Անցումը մի համակարգից մյուսին պետք է տեղի ունենա հանրային պահանջի առկայության և ընդդիմության ճնշման պարագայում: Այժմ մենք չունենք ոչ առաջինը, ոչ երկրորդը: Հենց այդ պատճառով ես չեմ կարող պատկերացնել, որ իշխանությունն ինքն իր կամքով գնում է սեփական լիազորությունների սահմանափակման: Այստեղ ուրիշ նպատակներ են հետապնդվում, օրինակ՝ Սերժ Սարգսյանի իշխանության վերարտադրությունը: Մտահոգություն ունեմ, որ ՀՀ իշխանություններն այսպես կվարկաբեկեն խորհրդարանական հանրապետություն ասվածը», - նշեց իրավապաշտպանը:

Իշխանյանի կարծիքը կիսում է նաև Հանրային քաղաքականության, վերլուծության և երկխոսության ինստիտուտի փորձագետ, քաղաքագետ Հովհաննես Գալստյանը: Նա ևս տպավորություն է ստացել, որ սահամանադրական փոփոխությունները կատարվում են իշխանության վերարտադրության հեշտացման համար:

«Կառավարման մոդելի փոփոխության դեպքում քաղաքական համակարգում հիմնական դերակատարը լինելու է ԱԺ նախագահը: Սակայն որպեսզի Սահմանադրությունը աշխատի, անհրաժեշտ է, որպեսզի ինչպես հասարակությունը, այնպես էլ քաղաքական հիմնական դերակատարներն ակտիվ ներգրավվեն այս գործընթացում», - հավելեց նա:

«Հայկական սահմանադրական իրավապաշտպան կենտրոն» հ/կ-ի նախագահ Գևորգ Մանուկյանը կարծում է, որ Սահամանդրությունը կոսմետիկ փոփոխությունների կարիք չունի: «Գործող Սահմանադրությունն ունի շատ թերություններ իշխանության թևերի տարրանջատման և հավասարակշռման տեսանկյունից: Այստեղ հարկավոր են հստակ փոփոխություններ, որպեսզի ձևավորվի համակարգ, որը թույլ կտա սահամանափակել և հավասարակշռել իշխանության տարբեր թևերին: Դրա համար մենք պետք է օգտագործենք այս պահը: Այն հնարավորություն է նոր՝ պատշաճ Սահմանադրություն ունեննալու համար», - հավելեց Մանուկյանը:

Նոր մշակված Սահամանադրության չաշխատելու հավանականությունը, ըստ APR Group կազմակերպության նախագահ Ռուբեն Սարգսյանի, մեծ է, քանի որ իրենց հարցումները ցույց են տալիս՝ հասարակության մոտ կա անվստահություն գործընթացի նկատմամբ: «Հասարակությունը չի վստահում ինչպես սահմանադրական բարեփոխումները իրականացնողներին, այնպես էլ գործընթացին: Բացի այդ կա անվստահություն ընտրական (հանրաքվեի) գործընթացի նկատմամբ, որի միջոցով պետք է անցնի սահմանադրության բարեփոխումների նախագիծը: Ուստի կա ռիսկ, որ Սահմանադրությունը նախկինների նման չի գործելու», - պարզաբանեց փորձագետը:

Արշալույս Մղդեսյան, «Մեդիա կենտրոն» ծրագրիհամակարգող-խմբագիր

Հեղինակի հետ կապվելու համար գրեք [email protected]  հասցեին:

 

Տեսանյութ
Print Friendly and PDF
Այլ մամլո հաղորդագրություններ
«Անցումային արդարադատության իրականացման մեխանիզմները Հայաստանում»
23.05.2019
15:00
Մեդիա կենտրոն, Երևան: Մայիսի 23-ին Երևանի պետական համալսարանի Պալեանների անվան դահլիճում «Մեդիա կենտրոնը»-ը անցկացրեց քննարկում «Անցումային արդարադատության իրականացման մեխանիզմները Հայաստանում» թեմայով:
Ազգային անվտանգության ծառայության գործառույթներն ու լիազորությունների շրջանակը
22.05.2019
11:00
Մեդիա կենտրոն, Երևան: Մայիսի 22-ին «Մեդիա կենտրոնում» տեղի ունեցավ քննարկում «Ազգային անվտանգության ծառայության գործառույթներն ու լիազորությունների շրջանակը» թեմայով:
«Դիտորդների խմբի գործունեության խոչընդոտները և քրեակատարողական հիմնարկներում մարդու իրավունքների խախտումների խնդիրները 2018-2019թթ.-ին»
21.05.2019
11:00
Մեդիա կենտրոն, Երևան: Մայիսի 21-ին ժամը 11:00-ին Մեդիա կենտրոնում տեղի ունեցավ մամուլի ասուլիս՝ «Դիտորդների խմբի գործունեության խոչընդոտները և քրեակատարողական հիմնարկներում մարդու իրավունքների խախտումների խնդիրները 2018-2019թթ.-ին» թեմայով
Ռոբերտ Քոչարյանի հայտարարությունները սուտ են, նա կխուսափի՞ քննությունից․ քննարկում Մեդիա կենտրոնում
20.05.2019
10:00
Մեդիա կենտրոն, Երևան: Մայիսի 20-ին Մեդիա կենտրոնում տեղի ունեցավ «Ռոբերտ Քոչարյանն ազատվեց կալանքից. դատական իշխանության անկախությու՞ն, թե՞ դատական համակարգի հին արատներ» թեմայով քննարկում։
«Բռնությունը ընտանիքում. իրազեկման բացը կրթական ծրագրերում և օրենսդրական փոփոխությունների անհրաժեշտությունը»
15.05.2019
12:00
Մեդիա կենտրոն, Երևան: Մայիսի 15-ին, ժամը 12:00-ին «Մեդիա կենտրոնում» տեղի ունեցավ քննարկում` նվիրված Ընտանիքի միջազգային օրվան: Քննարկման թեման էր՝ «Բռնությունը ընտանիքում. իրազեկման բացը կրթական ծրագրերում և օրենսդրական փոփոխությունների անհրաժեշտությունը»:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ