Սպանությունը Գյումրիում ստանում է քաղաքական երանգ
16.01.2015
11:00
Գյումրիում աղմկահարույց սպանության մեջ մեղադրվող ռուսական 102-րդ բազայի զինծառայող Վալերի Պերմյակովի՝ Ռուսաստանի արդարադատության իրավասության տակ գտնվելու փաստը ճնշմամբ ընդունած քաղաքական որոշման արդյունք է:

Անգամ եթե ռուս իրավապահներն են նրան բերման ենթարկել, հայ իրավապաշտպանները կարծում են, որ այդ դեպքում պատասխանտվության պետք է ենթարկվեն Հայաստանի ուժային կառույցների ներկայացուցիչները, քանի որ չեն կարողացել ժամանակին և օպերատիվ միջոցառումներ ձեռնարկել հանցագործին հայտնաբերելու համար:

«Հանցագործությունը կատարվել է ռազմաբազայի տարածքից դուրս, բայց նա, ի վերջո, հայտնվել է բազայի տարածքում: Ի՞նչպես է զինվորականը հայտնվել ռազմաբազայի տարածքում, չէ՞ որ նա հանցագործություն կատարելուց հետո ռազմաբազա չի գնացել: Որտե՞ղ էին մեր իրավապահները, որ չկարողացան օպերատիվ արձագանքել և բռնել հանցագործին: Բացառված չէ, որ մեղադրյալի ռուսական կողմի իրավասության տակ գտնվելը քաղաքական որոշման արդյունք է՝ կայացված «մեծ եղբոր» ճնշման տակ», - նշեց Հայաստանի Հելսինկյան կոմիտեի նախագահ Ավետիք Իշխանյանը: Նրա կարծիքով ՌԴ պաշտպանության նախարարության հատուկ հանձնաժողովի այցը Գյումրի խոսում է ՀՀ իշխանությունների վրա առկա ճնշման մասին:

«Մեդիա կենտրոնում»  հունվարի 16-ին կայացավ «Քաղաքական և իրավական արձագանք Գյումրիում աղմկահարույց սպանության քրեական գործի ընթացքին» թեմայով քննարկում: Քննարկման բանախոսներն էին Հայաստանի Հելսինկյան կոմիտեի նախագահ Ավետիք Իշխանյանը, Ազգային Ժողովի «Ժառանգություն» խմբակցության պատգամավոր Թևան Պողոսյանը, «Իրավունքի գերակայություն» ՀԿ նախագահ Արտակ Զեյնալյանը և պատգամավոր, փաստաբան Էդմոն Մարուքյանը:

Հիշեցնենք, որ Գյումրիում ընտանիքի ողբերգական սպանությունը ռուսական ռազմաբազայի զինվորականի կողմից մեծ աղմուկ է բարձրացրել ոչ միայն Գյումրի քաղաքում, այլև մայրաքաղաքում: Մի քանի օր է՝ Գյումրիում և Երևանում անց են կացվում  ակցիաներ՝ մեղադրյալին Հայաստանի իրավապահներին հանձնելու պահանջով: Բողոքի ակցիաները Գյումրիում՝ Ռուսաստանի գլխավոր հյուպատոսության շենքի, 102-րդ ռազամբազայի, ինչպես նաև մարզային դատախազության շենքի դիմաց եւ Երևանում՝  նախագահի նստավայրի և Ռուսաստանի դեսպանատան դիմաց առանց բախումների չեն անցել:

Ցուցարարների՝ հանցագործին Հայաստանի արդարադատության համակարգին հանձնելու  պահանջը դեռեւս չի կատարվել:  Գյումրի ժամանած ՀՀ գլխավոր դատախազ Գևորգ Կոստանյանի հավաստիացումները, որ անցագործը քրեական պատասխանատվության է ենթարկվելու Հայաստանի տարածքում չկասեցրեցին բողոքի ալիքը:

Իշխանյանի խոսքերով՝ հասարակության և հատկապես գյումրեցիների մեծ մասի համար արժանահավատ չէ կատարվածի պաշտոնական վարկածը, որ զինվորականը մտել է Ավետիսյանների տուն ջուր խմելու ցանկությամբ ու գնդակահարել ողջ ընտանիքին: Նրանք նաև կասկածում են, որ Հայաստանին չհանձնելու դեպքում հանցագործը պատասխանտվության կենթարկվի ընդհանրապես: 

«Նրանք շատ են կասկածում, որ կասկածյալը, ով պահվում է ռուսական բազայի տարածքում, ընդհանրապես պատասխանատվություն կկրի: Այս դեպքը ցույց տվեց, որ Հայաստանը զիջում է իր սուվերենությունը և անգամ իր արդարադատությունն է զիջում: Որտե՞ղ է այդ սահմանը: Մինչև որտե՞ղ մենք պետք է զիջենք», - հայտարարեց Ավետիք Իշխանյանը՝ միևնույն ժամանակ դատապարտելով ոստիկանության «կոպիտ գործողությունները խաղաղ ցուցարարների» նկատմամբ:

«Իրավունքի գերակայություն» ՀԿ-ի նախագահ Արտակ Զեյնալյանն ընդգծեց, որ հայ իրավապահներն իրենց գործողություններով Երևանում սադրել են մարդկանց, մինչդեռ քաղաքացիները պարզապես սոլիդարության հավաքներ են անցկացրել:

«Փոխանակ իրականացնեին օպերատիվ գործողություններ Շիրակի մարզում, սանրեին տարածքը հանցագործին գտնելու համար, նրանք լծվեցին խաղաղ ցույցերը ցրելու գործին: Այն, ինչ կատարվեց Ազատության հրապարակում հունվարի 15-ին, ոստիկանության կողմից խաղաղ ցուցարարների հրահրում, սադրում, բերման ենթարկել, օկուպանտներին ծառայող տեղական պոլիցայների վարքագիծ է: Մարդկանց զայրույթը անարդարության զգացողության արդյունք է, քանի համոզիչ չեն մինչև այժմ բերված վարկածները», - նշեց Զեյնալյանը՝ հավելելով, որ իրավական տեսանկյունից Պերմյակովի գործը գտնվում է ռուսական իրավապահների իրավասության տակ, և նա չի կարող հանձնվել Հայաստանին:

Այժմ Պերմյակովի դեմ հարուցել են քրեական գործ և՛ Հայաստանի և՛ Ռուսաստանի իրավապահները: Նա մեղադրվում է Գյումրիում ընտանիքի սպանության և զենքով դասալիքության մեջ:

ԱԺ պատգամավոր Էդմոն Մարուքյանը, անդրադառնալով աղմկահարույց սպանության քրեական գործի ընթացքին, հիշեցրեց, որ մեղադրյալը ռուսական հինգերորդ կայազորային դատարանի որոշմամբ գտնվում է կալանքի տակ: «Այո՛, նախաքննության ընթացքում գոյություն ունեն մեր և ռուսների կողմից հարուցած երկու քրեական գործեր: Ընթանում է քննություն: Քննության նյութերը կմիավորվեն մեկ գործի մեջ, որից հետո տեղի կունենա դատավարություն: Պրակտիկան ցույց է տալիս, որ դատավարությունից հետո նա ուղարկվում է պատիժը կրելու Ռուսաստանի որևէ քրեակատարողական հիմնարկում», - պարզաբանեց Մարուքյանը:

Սպանությունը Գյումրիում ստացել է քաղաքական ենթատեքստ, նշում է Ազգային Ժողովի «Ժառանգություն» խմբակցության պատգամավոր Թևան Պողոսյանը՝ պարզաբանելով, որ խախտվել է Հայաստանում միջպետական պայմանագիր:

«Միջպետական պայմանագիր է խախտվել այն առումով, որ սահմանապահները պետք է հանձնեին հայտնաբերված անձին հայ իրավապահներին, հատկապես որ նա եղել է քաղաքացիական հագուստով և առանց անձը հաստատող փաստատթղթի: Բացի դրանից, ըստ միջպետական պայմանագրի, առաջացած խնդիրները լուծելու համար կողմերը պետք է ձևավորեն համատեղ հանձնաժողով, ինչը ևս չի արվել: Երբ չեն օգտագործվում խնդրի կարգավորման իրավական մեխանիզմները, այն ստանում է քաղաքական ենթատեքստ», - նշեց պատգամավորը:

Նա նաև տեղեկացրեց, որ առաջիկայում Ազգային Ժողովում ևս կքննարկվի Գյումրիում աղմկահարույց սպանության խնդիրը: «Այս պահին գնում են նախնական քննարկումներ: Արդեն ԱԺ չորս հանձնաժողովներ համաձայն են իրականացնել համապատասխան քննարկում», - հավելեց նա:  

Ամփոփելով քննարկումը՝ բանախոսները կոչ արեցին Հայաստանի իշխանություններին պաշտպանել ՀՀ քաղաքացիների շահերը, երկրի արժանապատվությունը և հասնել հանցագործության շարժառիթի բացահայտմանը:  

Տեսանյութ
Print Friendly and PDF
Այլ մամլո հաղորդագրություններ
«Գործարկվում է «Տվյալների պաշտպանության ընդհանուր կարգավորում»-ը. ինչպիսի՞ փոփոխություններ են սպասվում»
23.05.2018
12:00
Մայիսի 23-ին «Մեդիա կենտրոնում» տեղի ունեցավ քննարկում «Գործարկվում է «Տվյալների պաշտպանության ընդհանուր կարգավորում»-ը. ինչպիսի՞ փոփոխություններ են սպասվում» թեմայով:

«Բնապահպանության խնդիրներն ու ռիսկերը. առաջարկներ ուղղված նոր կառավարությանը»
22.05.2018
11:00
Բնապահպանության ոլորտում առկա խնդիրների, լուծումների և նոր կառավարությանն ուղղված իրենց առաջարկների մասին մայիսի 22-ին Մեդիա կենտրոնում տեղի ունեցած քննարկմանը բարձրաձայնեցին բնապահպանները:
Հեռարձակվող ԶԼՄ-ների գործունեության և մեդիա ոլորտում բարեփախումների անհրաժեշտություն. Առաջարկներ ուղղված նոր կառավարությանը
21.05.2018
13:00
Հեռարձակվող ԶԼՄ-ների գործունեության և մեդիա ոլորտում բարեփոխումների անհրաժեշտության վերաբերյալ մայիսի 21-ին Մեդիա կենտրոնում տեղի ունեցավ քննարկում, որին մասնակցում էին Երևանի մամուլի ակումբի նախագահ Բորիս Նավասարդյանը, Խոսքի ազատության պաշտպանության կոմիտեի նախագահ Աշոտ Մելիքյանը և ՀՀ Հեռուստատեսության և ռադիոյի հանձնաժողովի անդամ Արմեն Մկրտչյանը:
«Այլընտրանքային հանրակրթության աջակիցների միության» ստեղծման ազդարարում
21.05.2018
12:00
Մայիսի 21-ին «Մեդիա Կենտրոնում» տեղի ունեցավ ասուլիս, որի ընթացքում ՀՀ կրթական ոլորտի ներկայացուցիչները ազդարարեցին «Այլընտրանքային հանրակրթության աջակիցների միության» ստեղծման մասին, կներկայացնեն ձևավորված միության կազմը, նպատակներն ու գործառույթները։
Թավշյա հեղափոխություն. մշակութաբանական փոփոխություններ
18.05.2018
11:00
Մշակութաբանական ի՞նչ փոփոխություններ են ակնկալվում թավշյա հեղափոխությունից: Ինչպե՞ս կառուցել ժողովրդին ծառայելու այլ մոդել, ինչպե՞ս պաշտոնյա-քաղաքացի հարաբերությունները պարզեցնել, ստեղծել կառավարման մարդակենտրոն քաղաքականություն։ Ի՞նչ փոփոխություններ են անհրաժեշտ հասարակության մեջ վարքագծային փոփոխությունների հասնելու համար:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ