Հայաստանում անհրաժեշտ է ընդունել խտրականության դեմ համապարփակ օրենք. ԵՄ պաշտոնյա
08.04.2015
11:00
Հայաստանում խտրականության դեմ օրենքի ընդունման կամ նույնանուն օրենսդրական նախագծի շուրջ հասարակական-քաղաքական քննարկումների ծավալման ժամկետները դեռ հստակ չեն: Այնուամենայնիվ հանրային սեկտորի ներկայացուցիչները և Արդադարատության նախարարությունը համակարծիք են այն հարցում, որ պետք չէ սպասել օրենքի ընդունմանը, այլ հարկավոր է համապատասխան բացատրական աշխատանքներ տանել հասարակության հետ:

Խտրականության դեմ օրենքի ընդունման անհրաժեշտությունը հանդիսանում է նաև ՄԱԿ-ի Մարդու իրավունքների խորհրդի Համընդհանուր պարբերական դիտարկման շրջանակներում Հայաստանին ուղղված հանձնարարական: ՀՀ իշխանություններին ուղղված այս հանձնարարականով Միավորված ազգերի կազմակերպության անդամ մի շարք երկրներ հանդես են եկել հունվարի 22-ին Ժնևում Համընդհանուր պարբերական դիտարկման Հայաստանի զեկույցի ներկայացման ժամանակ: Հայաստանի կառավարությունը մինչև այս տարվա հունիս պետք է որոշի, արդյոք ի թիվս այլ հարցերի ընդունում է վերոնշյալ հանձնարարականը որպես պարտավորություն:

Հատկանշական է, որ Հայաստանի մարդու իրավունքների պաշտպանի աշխատակազմը 2013 թ.-ին մշակել էր «Խտրականության դեմ» օրենքի նախագիծ, որը հետապնդում է մի շարք նպատակներ՝ պաշտպանել աշխատանք փնտրողներին խտրական աշխատանքային ընդունման պահանջներից` հիմնված ոչ թե անձի մասնագիտական կարողությունների, այլ տարիքի, բարետեսության, սեռի և այլ շատ անհատական և աշխատանքի բնույթի հետ որևէ կապ չունեցող հատկանիշների վրա: Սակայն օրենսդրական նախագիծը չանցավ քննարկումների փուլից այն կողմ:

Հայաստանի արդարադատության նախարար Հովհաննես Մանուկյանը վստահ է, որ Խտրականության օրենքի մշակման և ընդունման գործընթացին զուգահեռ պետք է աշխատանք տանել հասարակության լայն շերտերի հետ՝ հանդուրժողականության տարածման ուղղությամբ: «Միամտություն կլինի կարծել, որ Խտրականության դեմ օրենքն ունենալու դեպքում այն հալած յուղի պես կընդունվի հասարակության բոլոր շերտերում: Մենք պետք է զուգահեռ աշխատենք հասարակության հետ, ու պարտադիր չէ սպասել օրենքի ընդունմանը», - այսօր ասուլիսի ժամանակ հայտարարեց ՀՀ արդարադատության նախարար Հովհաննես Մանուկյանը:

Երևանի «Կոնգրես» հյուրանոցի Մեծ սրահում ապրիլի 8-ին կայացավ «Խտրականությունն արգելող օրենսդրության հեռանկարները Հայաստանում» թեմայով մամլո ասուլիս, որն ուղիղ հեռարձակվեց «Մեդիա կենտրոնի» YouTube-ի ալիքի միջոցով: Ասուլիսը կազմակերպել էր Եվրասիա համագործակցություն հիմնադրամը (ԵՀՀ): Միջոցառման բանախոսներն էին ՀՀ Արդարադատության նախարար Հովհաննես Մանուկյանը, ԵՄ Պատվիրակության ղեկավարի պաշտոնակատար Դիրկ Լորենցը, ԵՀՀ տնօրեն Գևորգ Տեր-Գաբրիելյանը և իրավաբան Արա Ղազարյանը:

Եվրասիա համագործակցություն հիմնադրամի աջակցությամբ «Հայաստանում խտրականության արգելման օրենսդրության ընդունմանն ուղղված» ծրագրի շրջանակում իրավաբաններ Արա Ղազարյանը և Վահե Գրիգորյանը կատարել են համապատասխան ուսումնասիրություններ։

Նախարարի կարծիքով՝խտրականության երևույթների վերացման կամ կանխման գործընթացներում պետք է հստակ պատկերացնել նպատակը և առկա մտահոգությունները: Խտրականությունը, նշում է Մանուկյանը, կարելի է բացառել մեկ երևույթի, այն է՝ հասարակության շրջանում հանդուժողականության արմատավորման դեպքում: «Անհրաժեշտ է ձևավորել հանդուժողականության մթնոլորտ՝ թե՛ հասարակական մենթալիտետի, թե՛ անձնական տեսնակյունից», - նշեց Հովհաննես Մանուկյանը՝ միևնույն ժամանակ դժվարանալով հստակ ժամկետներ նշել, թե երբ Հայաստանում քննարկման կներկայացվի Խտրականության դեմ օրեսդրական նախագիծ:

Խնդրի շուրջ քննարկումները Հայաստանում շարունակվում են, սակայն դեռ որոշակիացված չեն լուծման տարբերակները՝ մշակել մեկ ընդհանրական նորմատիվ ակտ, թե առանձին ոլորտներում օրենսդրական փոփոխություններ իրականացնել։ «Այս հարցում ժամկետներ դժվար է նշել, բայց կարծում եմ՝ 2015թ-ը կլինի այն ժամանակահատվածը, որ այս հարցերի վերաբերյալ որոշակիություն կունենանք»,-ասաց Մանուկյանը՝ հավելելով, որ Հայաստանը դիտարկում է ոլորտը նաև որպես եվրոպական գորընկերների հետ համգործակցության կարևոր դաշտ:

«Ճիշտ է մենք ընտրել ենք Եվրասիական տնտեսական միության անդամ դառնալու ճանապարհը, սակայն համագործակցությունը Եվրամիության հետ մեր քաղաքական ղեկավարության առաջնահերթություններից է», - հիշեցրեց նախարարը:

ԵՄ Պատվիրակության ղեկավարի պաշտոնակատար Դիրկ Լորենցը իր հերթին հավաստեց, որ Եվրամիությունը և Հայաստանը պատրաստակամ են համագործակցել մարդու իրավունքների պաշտպանության ոլորտում: Այնուամենայնիվ ԵՄ ներկայացուցիչը համոզմունք հայտնեց, որ Հայաստանին անհրաժեշտ է գնալ խտրականության դեմ համապարփակ օրենք ընդունելու ուղղությամբ: «Անկախ Հայաստանի ընտրությունից, այս կամ այն միության ինտեգրացիայից, երկու կողմերն էլ պատրաստակամ են շարունակել համագործակցել մարդու իրավունքների պաշտպանության ոլորտում: Մենք համոզված ենք, որ Հայաստանին անհրաժեշտ է ընդունել մեկ համապարփակ խտրականության դեմ օրենք», - պարզաբանեց Լորենցը:

ԵՀՀ տնօրեն Գևորգ Տեր-Գաբրիելյանը իր խոսքում կարևորեց մարդկանց մտածելակերպի փոփոխությունը: «Ցանկացած օրենք ընդունելուց հետո պետք է այն կիրառել: Պետք է փոխել մարդկանց կարծիքը, բայց միևնույն ժամանակ Հայաստանում անհրաժեշտ են ինստիտուցիոնալ բարեփոխումներ» , - նշեց Գաբրիելյանը՝ հավելելով, որ իրականացվել են նաև ուսումնասիրություններ առ այն, թե ինչպես են հանրային և պետական սեկտորների ներկայացուցիչները վերաբերում խնդրո առարկային: «Կողմերի  միջև խնդրի ընկալման տարբերությունը բավականին մեծ է», - կարճ նկատառում արեց բանախոսը:

Քննարկման ընթացքում խոսվեց նաև այն մասին, որ օրենքի ընդունման պահանջը պետք է գա ներքևից՝ հասարակությունից: Օրինակ բերվեց Վրաստանի, Ուկրաինայի և Մոլդովայի դեպքերը, որտեղ խտրականության դեմ օրենքը ընդունվեց արագացված ընթացակարգով և վերևից ներքև սկզբունքով: «Հայաստանը ժամանակ ունի, որպեսզի մեր հասարակության մեջ անցկացվեն համապատասխան քննարկումներ, բացատրական աշխատանքներ և ձևավորվի որոշակի հանրային պահանջ», - նշեց ԵՀՀ հանրային կապերի պատասխանատու Իզաբելլա Սարգսյանը: 

Արշալույս Մղդեսյան, «Մեդիա կենտրոն» ծրագրի համակարգող-խմբագիր

Հեղինակի հետ կապվելու համար գրեք arshaluismghdesyan@pjc.am  հասցեին:

Տեսանյութ
Print Friendly and PDF
Այլ մամլո հաղորդագրություններ
«Արամի 23. խոստումներ, որոնք չկատարվեցին»
24.12.2018
12:00
Մեդիա կենտրոնում, դեկտեմբերի 24-ին տեղի ունեցավ քննարկում «Արամի 23. խոստումներ, որոնք չկատարվեցին» թեմայով:
Բռնությունը ՄԻԱՎ-ով ապրող կանանց նկատմամբ» հետազոտության արդյունքները
24.12.2018
11:00
Դեկտեմբերի 21-ին «Մեդիա կենտրոնում» տեղի ունեցավ մամուլի ասուլիս, որի ընթացքում ներկայացվեց «Բռնությունը ՄԻԱՎ-ով ապրող կանանց նկատմամբ» հետազոտության արդյունքները:
«Սոցիալական քաղաքականություն. աղքատությու՞ն, թե՞ արդարություն. ի՞նչ ճանապարհ կընտրի Հայաստանը»
21.12.2018
12:00
Մեդիա կենտրոնում, դեկտեմբերի 21-ին տեղի ունեցավ քննարկում՝ «Սոցիալական քաղաքականություն. աղքատությու՞ն, թե՞ արդարություն. ի՞նչ ճանապարհ կընտրի Հայաստանը» թեմայով:
Բարձր մակարդակով ստացվում է խոսել Ռուսաստանի հետ, սակայն ավելի ցածր մակարդակում բարդություններ կան
21.12.2018
11:00
Չեմ կասկածում, երբ Նիկոլ Փաշինյանն ասում է, որ մենք ՌԴ-ի հետ որևէ խնդիր չունենք, սակայն սա, ասես, իր անձնական ուղիղ կապի մակարդակն է, մնացած բոլոր դաշտերում, երևի թե, կան բացթողումներ, որոնք տարբեր հարցադրումների հիմք են հանդիսանում։
«Մշակութային ոլորտի խնդիրներն ու ակնկալվող բարեփոխումները. 2018թ. ամփոփում»
20.12.2018
12:00
Դեկտեմբերի 20-ին Մեդիա կենտրոնում տեղի ունեցավ քննարկում՝ «Մշակութային ոլորտի խնդիրներն ու ակնկալվող բարեփոխումները. 2018թ. ամփոփում» թեմայով:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ