Մարտի 1-ի գործը բացահայտված, բայց հրապարակայնացված չէ
27.02.2015
11:00
2008 թ-ի մարտի 1-ի ողբերգական իրադարձությունների զոհերի ծնողները հույս չունեն, որ Հայաստանում գործող իշխանությունների պարագայում «մարտի 1-ի» գործը կբացահայտվի, իսկ 10 մարդկանց սպանության համար մեղավորները կպատժվեն: Յոթ տարի ընթացող գործի քննությունը, զոհերի ծնողների կարծիքով «իմիտացիա» է: Նրանք որոշել են այլևս չներկայանալ Հատուկ քննչական ծառայություն, քանի որ չեն վստահում այդ կառույցին:

Այս մասին «Մեդիա կենտրոնում» փետրվարի 27-ին ««Մարտի 1-ի գործով» նախաքննության ընթացքը՝ 7 տարի անց» թեմայով կայացած ասուլիսի ժամանակ հայտարարեցին մարտի 1-ի ողբերգական իրադարձությունների զոհերի ծնողներ Սարգիս Քլոյանը և Վաչագան Ֆարմանյանը: Քննարկմանը մասնակցող «Մարտի 1» Հասարակական կազմակերպության համակարգող, գրող, հրապարակախոս Առաքել Սեմիրջյանն էլ նշեց, որ «մարտի 1-ի» գործը բացահայտված է, ուղղակի այն պետք է հարապարակայնացնել:

Ըստ մարտի 1-ի ողբերգական իրադարձությունների զոհերից Գոռ Քլոյանի հայր Սարգիս Քլոյանի՝ Հատուկ քնչական ծառայությունը զբաղված է ոչ թե գործի բացահայտամամբ, այլ «իմիտացիայով»:

«Յոթ տարվա մեջ տուժողի իրավահաջորդներս հասկացել ենք, որ այս բոլորը իմիտացիոն բնույթ ունի: Իրենք ցույց են տալիս միջազգային կազմակերպություններին , որ իբր իրենք աշխատում են, զբաղվում են «մարտի 1-ի» գործով, բայց իրականում երկարաձգում են այս գործը: Երբեք մարտի 1-ի այս էջը չի բացահայտվի: Բոլոր մեղավորները կպատժվեն այն դեպքում, երբ որ կլինի իշխանափոխություն», - հայտարարեց Քլոյանը, հայտնելով, որ մի քանի օր առաջ իրեն հրավիրել էին ՀՔԾ և հարցաքննել:

«Քննիչի կողմից կազմած արձանագրությունը տարօրինակ էր: Քննիչն աձանագրության մեջ գրել էր, որ զոհերը տեղի են ունեցել հատուկ միջոցների ոչ ճիշտ օգտագործելու արդյունքում: Հարց է առաջանում, եթե քննչական մարմինը չգիտի, ովքեր են սպանել մեր երեխաներին, ապա ինչպե՞ս են քննիչները եզրակացնում, որ զենքի ոչ ճիշտ կիրառման արդյունքում են տեղի ունեցել զոհերը», - հայտարարեց նա, նշելով, որ այլևս չեն գնալու ՀՔԾ ցուցմունքներ տալու, քանի որ որևէ ակնկալիք չունեն այդ կառույցից:     

«Մարտի 1-ի» գործով զոհերից  Արմեն Ֆարմանյանի հայր Վաչագան Ֆարմանյանը ևս նշում է, որ զոհերի գործով փոփոխության կամ բեկման սպասելիք չունի: «Մեր բոլոր ծնողների տպավորությունը նույնն է, եթե չի բացահայտվում յոթը տարվա մեջ, ոչինչ էլ չի փոխվի: Նույն դատախազը տեղափոխվել է քննչականա կոմիտե, ու նույն քննիչներն են այնտեղ, ոչինչ էլ չի փոխվել: Հույս չենք կապում, որ գործում որևէ բան կփոխվի», - ասաց Ֆարմանյանը:

«Մարտի 1» Հասարակական կազմակերպության համակարգող Առաքել Սեմիրջյանի կարծիքով «մարտի 1-ի» գործը բացահայտված է, այն ուղղակի պետք է հրապարակել: «Մարտի մեկը բացահայտելու խնդիր չկա, մարտի մեկը բացահայտված է վաղուց, մարդասպաններն էլ, հրաման տվողներն էլ: Ուղղակի գործը պետք է հրապարակայնացվի», - վստահեցրեց նա՝ հավելելով, որ այժմ ՀՔԾ-ն փորձում է տեսակավորել հանցագործությունները: «Այսինքն՝ Հատուկ քննչական ծառայությունում փորձում են տեսակավորել զոհվածներին՝ ըստ այն զենքերի, որոնցով սպանվել են», - պարզաբանեց նա:

Սեմիրջյանի  պնդմամբ «մարտի 1-ի» գործը բացահատելու խնդիր չկա, քանի որ հայտնի է, թե ինչ միջոցների կիրառմամբ են «մարդիկ սպանվել», պետք է ուղղակի պարզել «կոնկրետ մարդասպաններին», որն առանց դատական գործընթացի իրականացնել անհնար է:

«Գոռ Քլոյանը, Արմեն Ֆարմանյանը և Տիգրան Խաչատրյանը սպանվել են «չերյոմուխա 7» տեսակի զենքից, որը եղել է միայն ոստիկանների ձեռքում: Այստեղ ընդհանրապես բացահայտելու և քննարկելու խնդիր չկա, ինչպես նաև կան 4 զինվորականներ, որոնք կրակել են այդ զենքով, ուղղակի պետքէ  պարզվի՝ այդ 4-ից ով է կրակել: Դրա համար պետք է դատական գործընթաց տեղի ունենա, որի ընթացքում պարզվի՝ այդ 4-ից ով որտեղ է եղել, և եթե դատ եղավ, ամեն մեկն իր ցուցմունքը կտա, որ ես այս տեղում եմ գտնվել, այդ սպանությունն այստեղ է տեղի ունեցել, և ով է կրակել: Մենք ապրում ենք բացահայտված մարդասպանների երկրում, որոնք պատասխանատվության չեն ենթակվում», - հայտարարեց նա:

Սեմիրջյանի խոսքերի հետ համաձայնեցին քննարկմանը մասնակից զոհերի ծնողները: «Չեն կանչում պատասխանատվության կրակողներին, քանի որ նրանք գալու են և ասեն՝ ով է հրաման տվել կրակել: Իսկ հրաման տվողը պետք է ասի՝ ով է թույլատրել զենք կիրառել և այդպես շարունակ՝ մինչև իշխանության բուրգի գագաթ», - նշեց Վաչագան Ֆարմանյանը:

Վաչագան Ֆարմանյանը մարտի 1-ի գործով դժգոհություն հայտնեց, ոչ միայն իշխանությունից, այլև որոշ ընդդիմադիր գործիչներից: «Ես խիստ վրդովված եմ, քանի որ ոչ բոլորն են ՀԱԿ-ից պայքարում մարտի 1-ի գործի բացահայտման համար: Մի քանիսը անջատվեցին ՀԱԿ-ից: Նրանք անգամ իմ տան տեղը, Արմեն Ֆարմանյանի գերեզմանի տեղը չգիտեն: Խոսքը գնում է Նիկոլ Փաշինյանի ու Ալեքսանդր Արզումանյանի մասին: Նրանցից լավ բան չեմ լսել: Այդպիսի անձնավորություններ մեր պառլամենտում շատ են եղել՝ Շավարշ Քոչարյան, Սադոյան: Իրենց պետք էր մտնել Ազգային ժողով՝ մտան: Բայց ումո՞վ մտան, իմ որդու արյունով չմտնեին ԱԺ ու իրենց անելիքն անեին», - հայտարարեց Ֆարմանյանը՝ հավելելով, որ նրանց պարտքն է «մինչև վերջ մեր՝ ծնորղներիս, կողքը»:

Ասուլիսից քիչ ժամանակ անց Facebook-ի իր էջում պատասխան  հայտարարությամբ հանդես եկավ ՀԱԿ խմբակցության պատգամավոր Նիկոլ Փաշինյանը: Ըստ Փաշինյանի՝ ՀԱԿ-ը «մարտի 1-ի» զոհերի ծնողներին փորձում է տրամադրել իր դեմ: «Ինձ համար ամենաեղկելի բանն այն է, որ ձեզ հայտնի մարդիկ փորձում են Մարտի 1-ի զոհերի ծնողներին տրամադրել իմ դեմ, նրանց հավատացնելով, որ ես, օրինակ, Մարտի 1-ի հարցը չեմ բարձրացնում: Սա այն դեպքում, երբ ընդամենը մի քանի օր առաջ ԱԺ օրակարգ էի փորձում մտցնել մի նախագիծ, որի առաջին կետում որպես Սերժ Սարգսյանին պաշտոնանկ անելու թիվ 1 հիմք նշվում է Մարտի 1-ի ոճրագործությունը, սպանությունների կոծկումը եւ որին դեմ արտահայտվեցին Հայ ազգային կոնգրեսի պատգամավորները», - նշում է պատգամավորը:

Իր հայրարաության մեջ նա քննադատում է նաև Հայ ազգային կոնգրեսին: «Հայ ազգային կոնգրես կուսակցության ղեկավարները, որ մարտիմեկյան ոճրագործների հետ մեղրամիս էին ապրում, մարդասպաններին ինդուլգենցիաներ բաժանում՝ որոշել են իրենց կենսագրությունը մոռացությա՞ն մատնել Մարտի 1-ի մասին հանկարծ վերհիշելով: Գլուխ եմ խոնարհում Մարտի 1-ի զոհերի, նրանց ծնողների ու զավակների առջև: Գլուխ եմ խոնարհում Վաչագան Ֆարմանյանի եւ նրա զոհված որդու առջև», - ասված է Փաշինյանի գրառման մեջ:

Միևնույն ժամանակ Նիկոլ Փաշինյանը, ճիշտ չհամարելով հաշվարկի մեջ մտնելը, թե ում գերեզմանում քանի անգամ է եղել, այնուամենայնիվ հորդորում է Վաչագան Ֆարմանյանին ասել՝ իր որդու կամ Մարտի 1-ի որեւէ զոհի գերեզմանին քանի՞ անգամ է այցելել ՀՀ առաջին նախագահ Լեւոն Տեր-Պետրոսյանը: «Նախորդ Մարտի 1-ից հետո ունեցած ելույթներում, հոդվածներում, հարցազրույցներում քանի՞ անգամ է Մարտի 1-ի մասին հիշել Լեւոն Տեր-Պետրոսյանը:

Հարկ եմ համարում նաեւ ընգծել՝ Հայ ազգային կոնգրեսի եւ անձամբ նրա ղեկավարի կողմից կազմակերպվող բերիական ոճի այս հարձակումները ընդամենը կարեկցանք են առաջացնում՝ ուրիշների հետեւում թաքնվելու շարունակական եւ երկչոտ գործելակերպի կապակցությամբ», - եզրափակում է նա:

Արշալույս Մղդեսյան, «Մեդիա կենտրոն» ծրագրի համակարգող-խմբագիր

Նյութի հեղինակի հետ կապվելու համար գրեք arshaluismghdesyan@pjc.am հասցեին

Տեսանյութ
Print Friendly and PDF
Այլ մամլո հաղորդագրություններ
«ԱԺ արտահերթ ընտրություններ. հնարավոր զարգացումներն ու հանրության ակնկալիքները»
19.10.2018
19:00
Հոկտեմբերի 18-ին Մեդիա կենտրոնի նախաձեռնությամբ Ա1 պլյուսի տաղավարում առցնաց ուղիղ հեռարձակմամբ անցկացվեց հաղորդում «ԱԺ արտահերթ ընտրություններ. հնարավոր զարգացումներն ու հանրության ակնկալիքները» թեմայով:
«Հունան Պողոսյանի նշանակումը ստորացնում է սյունեցիներին». իրավապաշտպաններ
18.10.2018
11:00
Հոկտեմբերի 18-ին «Մեդիա կենտրոնում» տեղի ունենցավ քննարկում` «Կադրային քաղաքականությունը հետհեղափոխական Հայաստանում» թեմայով:

Հանել դպրոցից «Հայոց եկեղեցու պատմություն» առարկան կամ վերախմբագրել դասագրքերը. թեժ բանավեճ
17.10.2018
12:00
Հոկտեմբերի 17-ին «Մեդիա կենտրոնում» տեղի ունեցավ քննարկում «Հայոց եկեղեցու պատմություն» առարկան. անհրաժեշտություն, թե քարոզ» թեմայով:
«Հայաստանում ծնելիության մակարդակը նվազել է». ՄԱԿ-ի 2018թ. զեկույց
17.10.2018
11:00
ՀՀ բնակչությունը 2018թ. առաջին եռամսյակից սկսած նվազել է 10.000 մարդով:
Այս մասին հոկտեմբերի 17-ին Մեդիա կենտրոնում տեղի ունեցած մամլո ասուլիսին հայտարարեց ՄԱԿ-ի Բնակչության հիմնադրամի «Օժանդակություն բնակչության հարցերով քաղաքականությունների իրականացմանը» ծրագրի համակարգող Աննա Հովհաննիսյանը:
Օգտատերերի 97 տոկոսը կողմ է արտահերթ ընտրություններին
16.10.2018
11:24
Արտահերթ խորհրդարանական ընտրություններ անցկացնելու վերաբերյալ ֆեյսբուքյան հարցման արդյունքներով օգտատերերի 90 տոկոսից ավելին ցանկանում են, որ արտահերթ ընտրությունները տեղի ունենան սույն թվականի դեկտեմբերին։
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ