Ինչո՞ւ չի մասնակցում ընդդիմությունը ՏԻՄ ընտրություններին
13.03.2015
12:30
Ընդդիմության կողմից ՏԻՄ ընտրություններին չմասնակցելը սխալ է: Առհասարակ ընտրություններին չմասնակցելը քաղաքական կուսակցության համար ինքնասպանություն է: Այս մասին «Մեդիա կենտրոնում» մարտի 13-ին կայացած «ՏԻՄ ընտրությունները Հայաստանի համայնքներում. նախընտրական իրավիճակի գնահատում» թեմայով քննարկման ժամանակ հայտարարեցին իշխող ՀՀԿ խմբակցության անդամ Լեռնիկ Ալեքսանյանը և Երևանի ավագանու «Բարև Երևան» խմբակցության ղեկավար Անահիտ Բախշյանը:

Մարտի 15-ին Հայաստանի 33 համայնքներում կայանալիք ՏԻՄ ընտրություններում տեղծվել է ոչ սովորական իրավիճակ: Առաջադրված թեկնածուների ճնշող մեծամասնությունն իշխող Հանրապետական կուսակցությունից է: Միայն երկու գյուղում ՀՀԿ-ից բացի նաև ընդդիմադիր թեկնածուներ են մասնակցում: Այլ քաղաքական ուժեր չեն առաջադրել իրենց թեկնածուներին՝ հղում կատարելով համապատասխան ռեսուրսների բացակայությանը և ընտրական գործընթացի նկատմամբ թերահավատությանը: Այպիսով, նշված համայնքների մեծ մասում բնակիչները փաստացի զրկված են այլընտրանքային թեկնածուի օգտին քվեարկելու հնարավորությունից:

Ցանկացած քաղաքական ուժ, կարծում է Լեռնիկ Ալեքսանյանը, եթե ձգտում է իշխանության, ապա պետք է անպայման մասնակցի ՏԻՄ ընտրություններին: «Իշխանափոխությունը սկսվում է հենց ՏԻՄ ընտրություններին մասնակցելուց, այսինքն՝ ներքևից», - հայտարարեց նա՝ հավելելով, որ 1990 թթ. այն ուժերը, ովքեր մասնակցել են ՏԻՄ ընտրություններին, հաջողություն են ունեցել նաև համապետական ընտրություններում: «Ընդդիմության թերություններից մեկն այն է, որ ՏԻՄ ընտրություններում հասարակության հետ քիչ է շփվում», - ասաց Ալեքսանյանը:

Անահի Բախշյանը, համարելով իր ընդդիմախոսի խոսքերը «դասագրքային ճշմարտություն», այնուամենայնիվ նշեց, որ ընդդիմությունը չի մասնացում ընտրություններին, քանի որ իրականում զրկված է իրավիճակը փոխելու ռեալ հնարավորություններից: Նրա կարծիքով, իշխանությունը, գործադրելով ադմինիստրատիվ ռեսուրս, ամլացրել է քաղաքական դաշտը: «Ո՞նց է իշխանությանը հաջողվում մաքրել, ամլացնել քաղաքական դաշտը: Սա առաջին հերթին իշխանությանն է վնասում: Իշխանություններն էլ գիտեն, որ իրենցից հոգնել են, չեն ուզում իրենց», - հայտարարեց Բախշյանը՝ միևնույն ժամանակ հավելելով  ընդդիմությունը չունի համապատասխան ռեսուրսներ ընտրություններին ակտիվ մասնակցելու համար:

Այս մտքի հետ չհամաձայնեց ՀՀԿ-ական պատգամավորը՝ նշելով, որ հատկապես ՏԻՄ ընտրությունների համար պետք չեն մեծ ռեսրուրսներ: «Ընդդիմությունը մեծ ռեսուրսներ է օգտագործում ու մասնակացում համապետական ընտրություններին: ՏԻՄ ընտրություններին մասնակցելու համար պետք չեն մեծ ռեսուրսներ: Ուղղակի պետք է գտնել համապատասխան թեկնածուներ, աջակցել նրանց, հանդիպել բնակիչների հետ: Եթե անգամ կուսակցությունը չհաղթի ընտրություններում, դա ևս մեկ առիթ է բնակիչների հետ հանդիպումների միջոցով ներկայացնել սեփական կուսակցության քաղաքական գիծը», - հայտարարեց նա:

Համաձայնելով պատգամավորի գնահատականների հետ՝ այնուամենայնիվ Անահիտ Բախշյանն ուշադրություն հրավիրեց այն հանգամանքի վրա, որ ընդդիմության համար անգամ դժվար է գրասենյակներ բացել համայնքներում: «Իհարկե, ճիշտ է, և պետք է մասնակցել ընտրություններին: Բայց չմասնակցելն ունի նաև իր պատճառը: Բացի ռեսուրսների սակավությունից՝ ընդդիմության համար անգամ դժվար է գրասենյակներ գտնելը: Մարդիկ վախենում են, չեն տրամադրում տարածքներ ընդդիմադիր կուսակցություններին՝ գրասենյակներ բացելու համար», - ասաց նա:

Բանախոսի պնդմամբ՝ իշխանության քայլերը, որոնք առաջացնում են հիասթափություն հասարակության շրջանում քաղաքական համակարգի նկատմամբ ընդհանրապես, վնասում են առաջին հեթին հենց երկրի ղեկավարությանը:  «Գործընթացներում հասարակությանը ներգրավելու ուղղությամբ քայլեր ձեռնարկելու փոխարեն ջարդում ու տրորում են: Մեզ նոր մթնոլորտ է պետք, համագործակցող, այլ ոչ թե վանող, պրովակացիոն, ինչպիսին այսօր իշխանությունն է», - հայտարարեց նա։

Ալեքսանյանի կարծիքով, հասարակության շրջանում առկա հիասթափությունը քաղաքական համակարգից, մտահոգում է նաև իշխանությանը: «Սա մտահոգիչ խնդիր է: Իրավիճակը փոխելու համար հարկավոր է ձևավորել կենսունակ ու կոնստրուկտիվ ընդդիմություն», - եզրափակեց Հանրապետական կուսակցության ներկայացուցիչը:

Քննարկման մանրամասները՝ տեսանյութում: 

Արշալույս Մղդեսյան, «Մեդիա կենտրոն» ծրագրի համակարգող-խմբագիր

Հեղինակի հետ կապվելու համար գրեք arshaluismghdesyan@pjc.am  հասցեին: 

Տեսանյութ
Print Friendly and PDF
Այլ մամլո հաղորդագրություններ
Հանել դպրոցից «Հայոց եկեղեցու պատմություն» առարկան կամ վերախմբագրել դասագրքերը. թեժ բանավեճ
17.10.2018
12:00
Հոկտեմբերի 17-ին «Մեդիա կենտրոնում» տեղի ունեցավ քննարկում «Հայոց եկեղեցու պատմություն» առարկան. անհրաժեշտություն, թե քարոզ» թեմայով:
«Հայաստանում ծնելիության մակարդակը նվազել է». ՄԱԿ-ի 2018թ. զեկույց
17.10.2018
11:00
ՀՀ բնակչությունը 2018թ. առաջին եռամսյակից սկսած նվազել է 10.000 մարդով:
Այս մասին հոկտեմբերի 17-ին Մեդիա կենտրոնում տեղի ունեցած մամլո ասուլիսին հայտարարեց ՄԱԿ-ի Բնակչության հիմնադրամի «Օժանդակություն բնակչության հարցերով քաղաքականությունների իրականացմանը» ծրագրի համակարգող Աննա Հովհաննիսյանը:
Օգտատերերի 97 տոկոսը կողմ է արտահերթ ընտրություններին
16.10.2018
11:24
Արտահերթ խորհրդարանական ընտրություններ անցկացնելու վերաբերյալ ֆեյսբուքյան հարցման արդյունքներով օգտատերերի 90 տոկոսից ավելին ցանկանում են, որ արտահերթ ընտրությունները տեղի ունենան սույն թվականի դեկտեմբերին։
«Արդարությունն ինձ համար մեծագույն արժեք է». Էրիկ Բաբաջանյան՝ ուսանող, կինոօպերատոր
15.10.2018
11:59
Մեդիա կենտրոն նախագիծը սկսում է պատմությունների շարք, որտեղ ներկայացնելու ենք իրենց ոտնահարված իրավունքները վերականգնած և հիմնարար ազատությունների համար պայքարած մարդկանց:
Հայաստանում հոգեբուժական կենտրոնները վերակազմավորելու անհրաժեշտություն կա
10.10.2018
13:00
Հայաստանում, ըստ 2017 թ. պաշտոնական տվյալների, կա 52 հազար հոգեկան առողջության խնդիր ունեցող անձ, որը 3 տոկոս ավելի է համեմատած 2016 թ. տվյալների հետ:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ