Հայաստանում բռնությունները լրագրողների նկատմամբ շարունակվում են
12.12.2014
12:00
Հայաստանում լրագրողների կամ լրատվամիջոցների նկատմամբ բռնություն և ճնշում գործադրելու դեպքերը չեն դադարում: 2014 թ. 9 ամիսների ընթացքում գրանցվել է լրագրողների նկատմամբ բռնության ֆիզիկական կիրառման 7 դեպք, որոնցից ոչ մեկով հանցանք կատարած կողմը չի բացահայտվել և պատժի չի ենթարկվել: Այսպիսի եզրահանգման եկան «Մեդիա կենտրոնում» դեկտեմբերի 12-ին կայացած քննարկմանը հրավիրված բանախոսները:

«Մեդիա կենտրոնի» նախաձեռնած «Հայաստանյան մեդիա դաշտի զարգացումներն ու խնդիրները 2014թ-ին» թեմայով քննարկմանը մասնակցում էին ԱԺ ՀՀԿ խմբակցության պատգամավոր Արփինե Հովհաննիսյանը, «Խոսքի ազատության պաշտպանության կոմիտեի» նախագահ Աշոտ Մելիքյանը, իրավաբան Արա Ղազարյանը, «Հրապարակ» թերթի խմբագիր Արմինե Օհանյանը և մեդիա փորձագետ Սամվել Մարտիրոսյանը:

Քննարկման հիմնական թեմաներից էր լրագրողների և լրատվամիջոցների նկատմամբ կիրառվող ճնշումները, որին երբեմն, ըստ բանախոսների, մասնակից են դառնում տարբեր պետական մարմինների ներկայացուցիչներ, այդ թվում նաև անվտանգության աշխատակիցներ և ոստիկաններ: Որպես օրինակ՝ բանախոսները նշեցին «Ա1+»-ի լրագրող Մարինե Խաչատրյանի և «Չորրորդ իշխանություն» օրաթերթի լրագրող Անի Գևորգյանի հետ տեղի ունեցած միջադեպերը, երբ նրանց նկատմամբ ֆիզիկական ուժ և բռնություն էր գործադրվել: 

Լրագրողների նկատմամբ բռնությունների դեպքերի քննության իրավական պրակտիկան, ըստ իրավաբան Արա Ղազարյանի, մտահոգիչ է: «Հայաստանում չեմ հիշում դեպք, երբ լրագրողի հանդեպ բռնության դեպքով հարուցված քրեական գործը տարվի մինչև վերջ, և հանցանք կատարած կողմը պատժվի: Սա մտահոգող փաստ է», - նշեց Արա Ղազարյանը՝ միևնույն ժամանակ հավելելով, որ վերջին ժամանակներում պաշտոնատար անձանց պահվածը փոխվել է: 

«Պաշտոնատար անձանց պահվածքը փոխվել է: Շատերն ինձ հարցնում են՝ արդյո՞ք մտնելով Մաքսային միություն՝ մենք փոխել ենք մեր քաղաքական կուրսը, և գուցե Եվրադատարան արդեն գոյություն չունի», - մանրամասնեց նա, նշելով, որ Հատուկ քննչական ծառայությունը բռնության դեպքերը դիրտարկում է հիմնականում քրեական հանցանքի, այլ ոչ թե լրագրողի մասնագիտական գործունեության խոչընդոտման պրիզմայով: «Այս ուղղությամբ իրականցնելով քննությունը՝ ՀՔԾ-ն հանցակազմի բացակայության պատճառով գործերը կարճում է: Նույնը տեղի ունեցավ «Ա1+»-ի լրագրողի գործով, բայց գլխավոր դատախազությունը բեկանեց ՀՔԾ-ի որոշումը և նշանակեց նոր քննություն», - հավելեց իրավաբանը:   

 «Հրապարակ» թերթի խմբագիր Արմինե Օհանյանի կարծիքով, բացի բռնության դեպքերից, լրատվամիջոցների նկատմամբ ճնշումը կատարվում է նաև իրավական ճանապարհով: «Իրավական ճանապարհներով է ճնշում գործադրվում ԶԼՄ-ների վրա: Օրինակ՝ դատական ճանապարհով ստիպում են լրատվամիջոցին բացահայտել իր այս կամ այն նյութի աղբյուրը, ինչն անընդունելի է», - նշեց Օհանյանը:  

Այնուամենայնիվ, լրատվական դաշտում բացակայում է նաև համերաշխության սկզբունքը, նշեց բանախոսը՝ մատնացույց անելով ԶԼՄ-ների սակավությունը քննարկման ժամանակ: «Սա ցուցանիշ է: Բացի այդ լրագրողներից շատերը չեն ցանկանում դատական ճանապարհով պատժել իրենց նկատմամբ բռնություն իրականացնողներին: Խնդիր է նաև այն, որ ոստիկանության աշխատակիցները մեր հարապարակումների տակ սեռական բնույթի հայհոյանքներ են գրառում անում», - տեղեկացրեց նա:

«Խոսքի ազատության պաշտպանության կոմիտեի» նախագահ Աշոտ Մելիքյանի համար մտահոգիչ է, որ անցնող տարում լրագրողների դեմ ճնշումներին իրավապահ մարմիններն են մասնակից դարձել: «Կա նման միտում, ինչը մտահոգիչ է: Անցած ինը ամիսների ընթացքում գրանցվել է լրագրողների նկատմամբ ֆիզիկական բռնության 7 դեպք: Նույնքան դեպք եղել էր 2013 թվականին, երբ անցկացվեցին երկու ընտրություններ, և մթնոլորտը թեժ էր: Այսինքն՝ բռնությունների քանակը չի պակասել, և սա մտահոգիչ է: Ավելի մտահոգիչ է այն, որ այս գործերը իրավապահ մարմիններում կոծկվում են», - հայտարարեց Մելիքյանը:   

Մեդիա դաշտի իրավական կարգավորման մասին խոսեց ԱԺ ՀՀԿ խմբակցության պատգամավոր, իրավաբան Արփինե Հովհաննիսյանը՝ միևնույն ժամանակ դատապարտելով մամուլի նկատամամբ ցանկացած ճնշման դեպք: «Ցանակացած պարագայում, որևէ իրազեկ սուբյեկտի կողմից լրագրողի գործունեությանը խոչընդոտելը, որը քրեորեն պատժելի արարք է, դատապարտելի է և չի բխում ազատ խոսք և ազատ մամուլ ունենալու իրականության կերտման շահերից: Ինչ վերաբերում է դաշտի իրավական կարգավորմանը, ապա ամենավատ երևույթներից մեկը, որ կարող է լինել մեդիա դաշտում, գերկարգավորումն է: «Ֆեյքերի դեմ» անվանում ստացած հայտնի օրինագիծը Ազգային ժողովի օրակարգում չէ հիմա, այն հետաձգված է», - տեղեկացրեց պատգամավորը:

Նրա կարծիքով՝ «Ֆեյքերի դեմ»  նախագիծը դրական միտում էր պարունակում, քանի որ կարգավորվում էր մեկնաբանությունների դաշտը՝ պարտավորեցնելով անձին նախ դիմել լրատվամիջոցին (հրապարակման տակ առկա) մեկնաբանությունը վերացնելու պահանջով, հետո նոր դիմել դատարան:  

Մեդիա փորձագետ Սամվել Մարտիրոսյանի կարծիքով՝ համացանցային լրատվամիջոցների քանակի ավելացումը, ինչ տեղի ունեցավ վերջին մի քանի տարիների ընթացքում, չի բերել հրապարակումների և լրատվական նյութերի որակի բարձրացմանը: «Քանակը որակ չէ այստեղ: Կայքերի մեծ մասը որպես այդպիսին լրատվամիջոցներ չեն, այլ քարոզչական ռեսուրսներ, որոնք պատկանում են կոնկրետ անձանց», - նշեց նա:

Քննարկման ավարտին Մարտիրոսյանը տեղեկացրեց, որ հաջորդ տարի փոփոխություն է սպասվում մեդիա դաշտում: «Հայաստանում կստեղծվի լոկալ ինտերնետի կառավարման ֆորում, բիզնեսի, քաղաքացիական հասարակության, տեխնիկական համայնքի և պետության մասնակցությամբ: Այսինքն լինելու է մի միջավայր, որտեղ հնարավորություն կլինի քննարկել ու լուծել առցանց ոլորտին առնչվող խնդիրները», - հավելեց նա:  

Տեսանյութ
Print Friendly and PDF
Այլ մամլո հաղորդագրություններ
«Հեպատիտների տարածվածության, դեղերի և բուժման հասանելիության խնդիրները Հայաստանում»
16.08.2018
12:00
2017-2018 թթ. «Դրական մարդկանց հայկական ցանց» սոցիալական ՀԿ-ն իրականացրել է հետազոտություն Երևան, Գյումրի, Վանաձոր, Հրազդան, Սևան, Գավառ, Մարտունի և Արմավիր քաղաքներում`ուղղված բնակչության շրջանում վիրուսային հեպատիտներ B-ի և C-ի վաղ հայտնաբերմանը, խնդրի մասին քաղաքացիների շրջանում իրազեկության բարձրացմանը:
«ՀՀ պետական ֆինանսների կառավարման համակարգի 2017-2018թթ. մոնիտորինգի արդյունքները»
27.07.2018
12:30
Հուլիսի 27-ին «Մեդիա կենտրոնում» տեղի ունեցավ մամուլի ասուլիս «ՀՀ պետական ֆինանսների կառավարման համակարգի 2017-2018թթ. մոնիտորինգի արդյունքները» թեմայով։
Պաշտպանական ոլորտի պետգնումները կոռուպցիոն մեծ ռիսկեր են պարունակում՝ փորձագետ
26.07.2018
14:00
Հուլիսի 26-ին «Մեդիա կենտրոնում» Հանրային քաղաքականության հետազոտությունների ազգային կենտրոնի նախագահ, տնտեսագետ Արտակ Մանուկյանը ներկայացրեց ՀՔՀԱԿ-ի կողմից իրականացված 2017-2018 թթ. պաշտպանական ոլորտի գնումների մոնիտորինգի արդյունքները։
«Մեդիա-նոր իշխանություններ. մտահոգիչ միտումներ»
25.07.2018
12:00
Մանիպուլյացիա, քարոզչություն, ապատեղեկատվություն, կեղծ կայքեր..Այս ամենը մեդիայում եղել է միշտ: Սակայն մասշտաբները, որոնք տեսնում ենք այսօր, մեդիա փորձագետներին թույլ է տալիս վիճակը գնահատել՝ իբրև ճգնաժամային:

«Դիտորդների խմբի գործունեության խոչընդոտները և ՔԿՀ-ներում մարդու իրավունքների խախտումների ընթացիկ խնդիրները»
25.07.2018
11:00
Թավշյա հեղափոխությունից հետո ՀՀ Արդարադատության նախարարությունը պահում է նույն դիրքորոշումը և նույն կերպ խոչընդոտում ՀՀ ԱՆ ՔԿՀ-ներում հասարակական վերահսկողություն իրականացնող հասարակական Դիտորդների խմբի գործունեությունը. այս մասին հուլիսի 25-ին Մեդիա կենտրոնում տեղի ունեցած քննարկմանը հայտարարեցին Դիտորդական խմբի անդամները:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Հայաստան-Թուրքիա Միջոցառումներ