«Հայաստանում բժշկական պարտադիր ապահովագրության ներդրման անհրաժեշտությունն ու խնդիրները»
13.09.2017
12:00
Մարդկային զարգացման միջազգային կենտրոնը զեկույց էր հրապարակել Հայաստանում բժշկական պարտադիր ապահովագրություն ներդնելու անհրաժեշտության ու այդ գործընթացին առնչվող խոչընդոտների վերաբերյալ։

Զեկույցում մեջբերված վիճակագրական տվյալների համաձայն՝ Հայաստանում տարեցտարի աճում է այն անձանց թիվը, ովքեր գիտակցելով բժշկի օգնությանը դիմելու անհրաժեշտությունը, չեն դիմել համապատասխան մասնագետի։

Ըստ զեկույցի տվյալների` բժշկական օգնության դիմելու անհրաժեշտության գիտակցման դեպքում բժշկի չդիմած անձանց քանակը վերջին 7 տարում աճել է գրեթե երկու անգամ. եթե 2009թ. չդիմելիության ցուցանիշը կազմել է 19.2%, ապա 2012թ.՝ 35.2%, իսկ 2016թ.՝ 36.8%:

Սեպտեմբերի 13-ին «Մեդիա կենտրոնում» կազմակերպված «Հայաստանում բժշկական պարտադիր ապահովագրության ներդրման խնդիրները» թեմայով քննարկման ժամանակ խնդրի վերաբերյալ իրենց տեսակետները ներկայացրեցին «Մարդկային զարգացման միջազգային կենտրոն»-ի փորձագետ Աշոտ Խուրշուդյանը և ՀՀ առողջապահության նախարարության աշխատակազմի բժշկական օգնության քաղաքականության վարչության պետի պաշտոնակատար Դավիթ Մելիք-Նուբարյանը։

Առողջապահության նախարարության ներկայացուցիչը, խնդրին անդրադառնալով, նշեց, որ գիտակցելով խնդրի կարևորությունը և առողջ քաղաքացիներ ունենալու անհրաժեշտությունը՝ մշակվել է ռազմավարություն, որի համաձայն Հայաստանում պարտադիր բժշկական ապահովագրությունը ներդրվելու է աստիճանաբար առաջիկա 5 տարիների ընթացքում: 

«Հոկտեմբերի 1-ից բժշկական ապահովագրությունը կգործի 100 հազար պետական ծառայողի համար, իսկ եկող տարվանից՝ 612 հազար սոցիալապես անապահով մարդկանց համար։ Երկու դեպքում էլ ապահովագրության գումարները վճարելու է պետությունը»,-ասում է Դավիթ Մելիք-Նուբարյանը։

Նա կարծիք է հայտնում նաև, որ բժշկական պարտադիր ապահովագրության համակարգի ներդրումը դրականորեն կազդի մատուցվող բուժօգնության որակի վրա։

Աշոտ Խուրշուդյանը, անհրաժեշտ ու արդիական համարելով բժշկական պարտադիր ապահովագրության համակարգի ներդրումը, միաժամանակ նշեց, որ այս պահին դեռևս պատրաստ չենք միանգամից այդ համակարգի ներդրմանը և դրա համար նախապատրաստական ժամանակ է հարկավոր:

«Պետք է թվերով, հաշվարկներով տեսնենք, թե դա ինչ է նշանակում բուժհաստատությունների, գործատուների, աշխատողների, պետության, բժիշկների համար։ Ամբողջ ազգը ներգրավվելու է այս պրոցեսում»,-ընդգծեց Խուրշուդյանը։

Փորձագետի կարծիքով մեծ նշանակություն ունի հասարակության վարքագծի փոփոխությունը, քանի որ հենց հասարակությունը պետք է պատրաստ լինի այլ իրականության մեջ ապրելու համար, նաև պետք է մեծանա վստահությունը բժիշկների ու բուժհաստատությունների հանդեպ:

«Մարդիկ պետք է փոխեն իրենց վարքագիծը, և բժշկական ապահովագրությունը հենց դա էլ ենթադրում է, որովհետև, երբ այն ներդրվում է, այլ խողովակները փակվում են կամ թանկանում։ Եթե դու ես ընտրություն կատարում, թե որ բժշկի մոտ գնաս, ապա, խնդրեմ, վճարիր քո գրպանից։ Այսինքն՝ համակարգի հանդեպ պետք է վստահություն լինի»,-ասաց Խուրշուդյանը։

Դավիթ Մելիք-Նուբարյանը նշեց, որ այս պահին բժշկական ապահովագրություն ունի ՀՀ քաղաքացիների մեկ տոկոսը՝ հիմնականում այնպիսի ընկերությունների աշխատակիցներ, ովքեր ուշադրություն են դարձնում առողջապահական խնդիրներին։

Բանախոսը նաև հավաստիացնում է, որ պարտադիր ապահովագրությունը շատ ծանր ֆինանսական բեռ չի լինելու, ավելին` ժամանակի ընթացքում քաղաքացիները տեսնելու են համակարգի արդյունավետությունը:

«Երբ ամբողջությամբ համակարգը գործի, պետպատվերն իր ակտուալությունը կկորցնի: Այդ դեպքում անձը պետք է ընտրի վեց ապահովագրական ընկերություններից մեկի հարմար ապահովագրական փաթեթը և ապահովագրվի: Հավատացեք` միջին աշխատավարձ ստացող քաղաքացու համար դա տարեկան կտրվածքով ընդունելի գումար է»,-ասաց Մելիք-Նուբարյանը:

Քննարկման շարունակությունը դիտեք այստեղ: 

Դերենիկ Մալխասյան, Մեդիա կենտրոն ծրագրի խմբագիր/համակարգող:

Հեղինակի հետ կապվելու համար գրեք derenikmalkhasian@gmail.comէլ. հասցեին:

Տեսանյութ
Print Friendly and PDF
Այլ մամլո հաղորդագրություններ
Խաղաղության ընկալումը․ ԼՂ հակամարտության մոտեցումների վերլուծությունը
06.02.2019
12:00
ԼՂ հակամարտության հանգուցալուծմանը հասնելու միակ ճանապարհը խաղաղությանը նախապատրաստվելն է: Թեպետ հակամարտող հանրույթներում գերիշխում է պատերազմի պրոպագանդան, սակայն Հայաստանում, Լեռնային Ղարաբաղում եւ Ադրբեջանում մարդիկ սկսել են ավելի ու ավելի քննադատաբար մոտենալ հնարավոր պատերազմին: Հարցեր են հնչեցնում պատերազմի ու խաղաղության գնի մասին:
2017-2018թթ պետգնումների համակարգի մոնիտորինգի արդյունքները
28.12.2018
12:00
Դեկտեմբերի 28-ին «Մեդիա կենտրոնում» «Հանրային քաղաքականության հետազոտությունների ազգային կենտրոն» ՀԿ-ն ներկայացրեց 2017-2018թթ (I կիսամյակի) պետական գնումների համակարգի հիմնական միտումները։
Իրավապաշտպանների առաջարկները ՔԿՀ-ներում բարեփոխումների իրականացման ռազմավարության վերաբերյալ
27.12.2018
13:30
Արդարադատության նախարարության կողմից е-draft կայքում 2018 թ. դեկտեմբերի 19-ից հանրային քննարկման է դրվել քրեակատարողական համակարգում իրավիճակի բարելավման նպատակով 2018 -2038 թթ. ռազմավարությունը և դրա իրականացման 20 -ամյա միջոցառումների ծրագիրը հաստատելու մասին կառավարության որոշման նախագիծը։ Այն հանրային քննարկման է դրված լինելու մինչև 2019 թ. հունվարի 8-ը։
Օպտիմա՞լ է նախարարությունների օպտիմալացումը
26.12.2018
12:00
Դեկտեմբերի 26-ին Մեդիա կենտրոնում տեղի ունեցավ քննարկում «Օպտիմա՞լ է նախարարությունների օպտիմալացումը. գնահատում են մասնագետները» թեմայով:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ