«Կառավարության 5-ամյա ծրագիր. նոր հնարավորություննե՞ր, թե՞ մարտահրավերներ
27.06.2017
13:00
Հունիսի 27-ին «Մեդիա կենտրոնում» տեղի ունեցավ քննարկում «Կառավարության 5-ամյա ծրագիր. նոր հնարավորություննե՞ր, թե՞ մարտահրավերներ» թեմայով:

Քննարկման բանախոսներն էին տնտեսական լրագրող Հայկ Գևորգյանը և տնտեսագետ Վիլեն Խաչատրյանը:

Անդրադառնալով նախորդ շաբաթ ՀՀ կառավարության ներկայացրած 5-ամյա ծրագրին՝ Հայկ Գևորգյանը նշեց, որ չնայած այն հանգամանքին, որ իշխանության ներկայացուցիչներն այն գնահատում են հավակնոտ, սակայն ինքն այդ ծրագրում որևէ հավակնոտություն չի տեսնում: Մյուս կողմից, տնտեսական լրագրողի կարծիքով, Հայաստանի տնտեսության յուրահատկությունն այն է, որ այն շատ զգայուն է արտաքին գործոնների նկատմամբ, և դրանց դրական կամ բացասական փոփոխությունը կառավարության կամքից անկախ կարող է համապատասխան կերպով ազդել երկրի զարգացման տեմպերի վրա:

«5 տոկոս ՀՆԱ-ի աճ ապահովելու համար պետք չէ անել ոչինչ: Օրինակ՝ մենք 2012 թ. ունեցել ենք 7.2 տոկոս աճ, ու սա այն դեպքում, որ կառավարությունը ոչ մի բարեփոխում չէր անում: Ի՞նչ էր տեղի ունեցել, ուղղակի կտրուկ աճել էին մասնավոր տրանսֆերները Ռուսաստանի և կտրուկ աճել էր միջազգային շուկայում պղնձի գները: Ոչինչ չէր արվել, ոչ մի բարեփոխում՝ ոչ կոռուպցիան էր հաղթահարվել, ոչ տնտեսությունն էր ապակենտրոնացրել, ոչ դատական համակարգն էր բարեփոխել… 5 տոկոս աճի թիրախ դնելով, ըստ էության, կառավարությունն ասում է, որ ես ոչինչ չեմ անելու, դուք ձեր հարցերը լուծեք»,-  նկատեց Հայկ Գևորգյանը:

Տնտեսագետ Վիլեն Խաչատրյանը, անդրադառնալով կառավարության նախանշած տարեկան 5 տոկոսանոց տնտեսական աճի տեմպերին, տնտեսագետը  հաշվարկներ ներկայացրեց, ըստ որոնց, տնտեսական աճի տեմպերով 5 տարի հետո մենք ունենալու ենք մոտ 14 մլրդ ԱՄՆ դոլարի չափով ՀՆԱ: Սա այն դեպքում, երբ միջազգային տարբեր փորձագիտական կառույցների գնահատականներով ու կանխատեսումներով Հայաստանի ՀՆԱ-ն 2022 թ. կազմելու է 12.5 մլրդ: Միաժամանակ տնտեսագետը ներկայացրեց, թե ինչպես տնտեսական այդ աճը կանդրադառնա միջին վիճակագրական քաղաքացու վրա.

«Եթե մենք պայմանականորեն ՀՆԱ-ն բաժանենք 3 մլն մարդու վրա, ապա մեր կյանքի որակը մեկ շնչին բաժին ընկնող ՀՆԱ-ի հաշվով կհասնի մոտավորապես 4.5 հազար ԱՄՆ դոլարի: Սա նշանակում է, որ առաջիկա տարիներին մոտ 3.5 մլրդ ԱՄՆ դոլարի աճը մեր բնակչության համար կապահովի գրեթե 1000 ԱՄՆ դոլարանոց մեկ շնչին բաժին ընկնող ՀՆԱ-ի աճ»,- նշեց Խաչատրյանը՝ հավելելով, որ ինքը սրան պեսիմիստորեն է մոտենում, քանի որ նման ցուցանիշներ ապահովելը լինելու է բավականին բարդ:

«Յուրաքանչյուր տարվա 5 տոկոսի վրա հաջորդ տարի 5 տոկոս աճ ցույց տալը լինելու է շատ ավելի բարդ: Կուտակային աճ կոչեցյալը 5 տարիների կտրվածքով դառնալու է 35 տոկոս»,-նկատում է տնտեսագետը:

Բանախոսները, անդրադառնալով կառավարության և ՀՀ նախագահի կողմից նախանշված Doing business-ի վարկանիշային աղյուսակում առաջատար դիրքեր զբաղեցնելուն, նշեցին, որ այդ աղյուսակում առաջխաղացումը ամենևին էլ չի նշանակում կենսունակ տնտեսություն ունենալ:

«Մենք այդ ցանկում արդեն այժմ հարևաններ ենք Բելգիայի, Իտալիայի հետ, նույնիսկ առաջ ենք շատ առաջատար երկրներից: Սակայն դա ոչ մի էական ազդեցություն չի ունենում տնտեսության վրա: Օրինակ՝ ձեռնարկությունների էլէկտրացանցերին միանալու ժամկետը այսօր կազմում է, ենթադրենք, 5 օր, ու մենք դարձնում ենք 2 օր, Doing business-ում առաջխաղացում ես ունենում, դրանից ի՞նչ է տնտեսությունն էականորեն շահում է, իհարկե՝ ո՛չ, ոչ մի փոփոխություն տեղի չի ունենում »,- նշեց Հայկ Գևորգյանը:

Վիլեն Խաչատրյանը, անդրադառնալով թեմային, իր հերթին նկատեց. «Միայն Doing business-ով կողմնորոշվել և դնել որպես երկրի զարգացման չափանիշների հիմքում, ճիշտ չէ: Օրինակ՝ մրցունակության զեկույցներում մեր դիրքերը բավականին վատ են, ինչու դրած չէ, որ այդտեղ հասնենք առաջատար երկրներին»:

Անդրադառնալով աղքատության ցուցանիշի կրճատման խնդրին՝ Վիլեն Խաչատրյանը նշեց, որ իր հաշվարկներով կառավարությունն իր առջև, ըստ էության, նպատակ է դրել աղքատության ցուցանիշը կրճատելով հասցնել այն մակարդակին, որին մենք մոտեցել էինք 2008-2009 թթ.-ին: 

«Սակայն այժմ այդ թվականների հետ համեմատ հսկայական տարբերություն ունենք, եթե մենք այդ ժամանակ ունեինք 1.5 մլրդ դոլարի պարտք, ապա ես կանխատեսում եմ, որ 2022-ին ունենալու ենք 7-ից 8 մլրդ ԱՄՆ դոլարի հասնող պարտք: Սա նշանակում է, որ մենք առաջիկա տարիներին մեր պարտքի շեմը լուրջ իջեցնելու ենք, իսկ դա նշանակում է աճի ավելի բարձր տեմպեր: Բայց մենք սովորաբար ամեն տարի ավելի շատ պարտք ենք վերցնում, քան աճ ենք ապահովում: Սա կատաստրոֆիկ վատ իրավիճակ է»,- նկատեց տնտեսագետը: 

Հայկ Գևորգյանն իր հերթին նշում է, որ աղքատության նվազեցմանը կարելի է հասնել ոչ միայն բնակչության եկամուտների ավելացման շնորհիվ, այլ նաև համաշխարհային շուկայում պարենամթերքի գների նվազման:

«Եթե կառավարությունը էլի ոչ մի բան չանի, պարենամթերքի գները նվազեն շուկայում, ապա աղքատությունը կնվազի: Նույնիսկ այս առումով եթե ցանկանում ենք աղքատության նվազում, պետք է պայքարենք մոնոպոլիաների դեմ, որպեսզի պարենամթերքի գները նվազեն, որը անմիջականորեն ազդում է աղքատության ցուցանիշի նվազման վրա»,-ասաց Գևորգյանը:

Քննարկման շարունակությունը դիտեք այստեղ:

 

Տեսանյութ
Print Friendly and PDF
Այլ մամլո հաղորդագրություններ
«Ազատազրկվածների պահման պայմանները ՔԿՀ-ներում. չլուծված խնդիրնե՞ ր, թե՞ բարեփոխումներ»
19.01.2018
11:00
Հունվարի 19-ին «Մեդիա կենտրոնում» տեղի ունեցավ քննարկում «Ազատազրկվածների պահման պայմանները ՔԿՀ-ներում. չլուծված խնդիրնե՞ ր, թե՞ բարեփոխումներ» թեմայով:
Ընդդեմ թանկացումների. ինչպե՞ս է տեսնում խնդրի հանգուցալուծումը «Ելք» խմբակցությունը
18.01.2018
11:00
Հունվարի 18-ին «Մեդիա կենտրոնում» տեղի ունեցավ քննարկում «Ընդդեմ թանկացումների. ինչպե՞ս է տեսնում խնդրի հանգուցալուծումը «Ելք»խմբակցությունը» թեմայով:
Արդյո՞ք պետությունը հրաժարվում է իր պարտավորություններից. ՊՆ նախարարի դրամահավաքության կոչը զինծառայողների բուժման համար
17.01.2018
12:00
Հունվարի 17-ին «Մեդիա կենտրոնում» տեղի ունեցավ քննարկում «Արդյո՞ք պետությունը հրաժարվում է իր պարտավորություններից. ՊՆ նախարարի դրամահավաքության կոչը զինծառայողների բուժման համար» թեմայով:
«Քաղաքացիական հասարակության նկատառումները դատական և քրեական օրենսգրքերի նախագծերի վերաբերյալ». հանրային քննարկում
16.01.2018
10:00
Հունվարի 16-ին ԴաբըլԹրի բայ Հիլթոն Երևան հյուրանոցի Միլանո սրահում Բաց հասարակության հիմնադրամներ-Հայաստան կազմակերպությունն իր իրավական ծրագրերի շրջանակներում ստեղծված Արդարադատության խմբի հետ համատեղ անցկացրեց «Քաղաքացիական հասարակության նկատառումները դատական և քրեական օրենսգրքերի նախագծերի վերաբերյալ» հանրային քննարկում:
«Հայացք Իրանին․ բողոքի հանրահավաքների պատճառներն ու հետևանքները»
10.01.2018
11:00
Հունվարի 10-ին «Մեդիա կենտրոնում» տեղի ունեցավ քննարկում «Հայացք Իրանին․ բողոքի հանրահավաքների պատճառներն ու հետևանքները» թեմայով:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ