«Սփյուռքի հայտնի հայերը կոչ են անում քաղաքացիներին մասնակցել ընտրություններին»
31.03.2017
15:00
Խորհրդարանական ընտրություններին դիտորդական առաքելություն իրականացնելու համար արտերկրից Հայաստան են ժամանել Սփյուռքի հայտնի հայերը՝ ամերիկահայ ռոք երաժիշտ և երգահան, աշխարհահռչակ System of a Down խմբի հիմնադիր և մենակատար Սերժ Թանկյանը, կանադահայ դերասանուհի և պրոդյուսեր Արսինե Խանջյանը, կանադահայ կինոռեժիսոր Ատոմ Էգոյանը, ամերիկահայ կինոռեժիսոր և սցենարիստ Էրիկ Նազարյանը:

Նրանց համատեղ ասուլիսը տեղի ունեցավ մարտի 31-ին Մեդիա կենտրոնում:

Արսինե Խանջյանն ասաց, որ իրենք բոլորով մասնակցել են «Քաղաքացի դիտորդի» անցկացրած դասընթացներին, որը իրենց կօգնի արագ կողնորոշվել և արձագանքել ապրիլի 2-ի ընտրությունների օրը ընտրախախտումներ հայտնաբերելիս:

«Ժամանակն է ընտրություններին նոր մոտեցում ցուցաբերել։ Մենք «շրջիկ» դիտորդներ ենք լինելու: Մտնելու ենք մարզերում տարբեր ընտրատեղամասեր և դիտարկենք ընտրությունների ընթացքը»,- ասաց Արսինե Խանջյանը:

Ատոմ Էգոյանն ասաց, որ շատ է սիրում Հայաստանը և հայ ժողովրդին: Նա իր հերթին կոչ արեց հայ ժողովրդին ապրիլի 2-ին մասնկացել ընտրություններին:

«Տեր կանգնեք ձեր ձայնին։Եթե կիրակի դուք չմասնակցեք ընտրություններին, ինքներդ ձեզ կվնասեք», -ասաց  Էգոյանը և նշեց, որ իրենք Հայաստան են ժամանել կոնկրետ առաքելությամբ` պահպանել ընտրողների ձայները:

Սերժ Թանկյանն ասաց, որ դիտորդի կարգավիճակում ընտրություններին մասնակցելու նպատակը անարդարությունն ու անտարբերությունն արմատախիլ անելն է:

«Դիտորդական առաքելությունը սփյուռքահայության մասնակցության փոքր մասնաբաժինը կլինի Հայաստանի ներքաղաքական կյանքում»,-ասաց Թանկյանը՝ ընդգծելով, որ իր համար մեծ պատիվ է՝ որպես դիտորդ Հայաստանում ներկա գտնվելը:

Նա կարեւորեց նաեւ սփյուռքի հայտնիների՝ ՊՊԾ գնդի գրավումից հետո հիմնադրած «Արդարություն Հայաստանին» նախաձեռնությունը, որի անդամ է ինքը: 

Նա նշեց, որ  «Սասնա ծռերի» դեպքից հետո իրենք վախեցած են, թե ինչ կարող է լինել Հայաստանում․ «Անարդարության ու հուսահատության տարիներից հետո մենք վախեցած էինք և մենք ուզում ենք մասնակցել՝ թեկուզ փոքր չափով կերտելու Հայաստանում արդարություն»:

«Քաղաքական կյանքի հանդեպ ՀՀ քաղաքացիների անտարբերությանը վերջ տալ է պետք:  Մեզ համար ամենակարևորը հայ ժողովրդի կամքն է և փափագները այս ընտրությունների ընթացքում: Մեր գործի ամենակարևորը մոնիթորինգը չէ, մենք արտիստ ենք, և մեր գործը ձեզ ներշնչելն է, որ գնաք և քվեարկեք: Խարդախություններ կան․ ամեն երկրում կոռուպցիա կա, բայց դա չպետք է խոչընդոտ լինի ձեր քվեարկության համար: 2.5 միլիոն ժողովուրդ իրավունք ունեն իրենց ձայնը ներկայացնելու և այդ ձայնին կռնակ կանգնելու»,- ասաց Թանկյանը:

«Արդարություն Հայաստանին» նախաձեռնության կոչով շուրջ 300 սփյուռքահայ դիտորդներ եկել են Հայաստան և վերահսկելու են գալիք ընտրությունները:

Էրիկ Նազարյանը խոսեց նախաձեռնության ստեղծման շարժառիթի մասին. «Պատճառը, թե ինչու մենք ստեղծեցինք «Արդարություն Հայաստանին» նախաձեռնությունն այն է, որ չափից դուրս շատ մարդիկ Հայաստանը լքում են»:

«Շատ հեշտ է մենք տաք տեղից նստած խոսանք, ասենք՝ էստեղ մնացեք, պայքարեք: Բայց մենք ոչ մի բան չանենք, ոչ մի դեր չկատարենք: Մենք այդ պատճառով ենք ներկա ձեզ հետ այստեղ, որ կարողանանք հույսով մի հատ նոր էջ թերթենք», - հավելեց Նազարյանը:

Նա նշում է, որ  Հայաստանում ապատիա կա, և դա դրդել է նրան ինչ-որ քայլ անելու:

«Ընտրությունը ցավոտ թեմա է` քո իրավունքը չպետք է ծախես, իսկ քվեն քո իրավունքն է: Հաճախ ասում են` Սփյուռքը չպետք է խառնվի Հայաստանի գործերին, բայց դա ճիշտ չէ. չեմ ուզում ինձ այստեղ միայն տուրիստ զգալ: Ի դեպ, Այվազովսկին Արարատը չէր տեսել, երբ նկարեց այն»,- հավելեց Նազարյանը:

Էրիկ Նազարյանը հորդորեց քաղաքացիներին, որ ընտրություններին պետք է անպայման մասնակցել. «Եթե մենք չքվեարկենք, մեր փոխարեն կքվեարկեն»: 

Ատոմ Էգոյանն էլ կարծիք հայտնեց, թե ընտրությունները «հավանաբար կեղծվելու են»:

«Մենք արդեն տեսել ենք ընտրակեղծարարության փաստեր և կարող եմ հստակ ասել, որ մենք այստեղ չենք կիրակի օրվա քվեները պահելու համար, մենք այստեղ ենք ապագայի համար: Մենք չպետք է բռնապետության և հատկապես ինքնաբռնապետության ու հուսահատության զոհը դառնանք»,-ընդգծեց Էգոյանը:

Նրանք կոչ արեցին քաղաքացիներին՝ անպայման գնալ քվեարկելու, եթե անգամ որևէ ուժ վստահություն չի ներշնչում:

«Եթե ձեր ձայնը իմաստ չունենար, կաշառքը տեղ չէր ունենա: Եթե կաշառքն այսօր տեղ ունի, նշանակում է, որ ձայները իմաստ ունեն»,- ընդգծեց Արսինե Խանջյանը:

Մամլո ասուլիսի շարունակությունը դիտեք այստեղ:

 

Տեսանյութ
Print Friendly and PDF
Այլ մամլո հաղորդագրություններ
«Հեպատիտների տարածվածության, դեղերի և բուժման հասանելիության խնդիրները Հայաստանում»
16.08.2018
12:00
2017-2018 թթ. «Դրական մարդկանց հայկական ցանց» սոցիալական ՀԿ-ն իրականացրել է հետազոտություն Երևան, Գյումրի, Վանաձոր, Հրազդան, Սևան, Գավառ, Մարտունի և Արմավիր քաղաքներում`ուղղված բնակչության շրջանում վիրուսային հեպատիտներ B-ի և C-ի վաղ հայտնաբերմանը, խնդրի մասին քաղաքացիների շրջանում իրազեկության բարձրացմանը:
«ՀՀ պետական ֆինանսների կառավարման համակարգի 2017-2018թթ. մոնիտորինգի արդյունքները»
27.07.2018
12:30
Հուլիսի 27-ին «Մեդիա կենտրոնում» տեղի ունեցավ մամուլի ասուլիս «ՀՀ պետական ֆինանսների կառավարման համակարգի 2017-2018թթ. մոնիտորինգի արդյունքները» թեմայով։
Պաշտպանական ոլորտի պետգնումները կոռուպցիոն մեծ ռիսկեր են պարունակում՝ փորձագետ
26.07.2018
14:00
Հուլիսի 26-ին «Մեդիա կենտրոնում» Հանրային քաղաքականության հետազոտությունների ազգային կենտրոնի նախագահ, տնտեսագետ Արտակ Մանուկյանը ներկայացրեց ՀՔՀԱԿ-ի կողմից իրականացված 2017-2018 թթ. պաշտպանական ոլորտի գնումների մոնիտորինգի արդյունքները։
«Մեդիա-նոր իշխանություններ. մտահոգիչ միտումներ»
25.07.2018
12:00
Մանիպուլյացիա, քարոզչություն, ապատեղեկատվություն, կեղծ կայքեր..Այս ամենը մեդիայում եղել է միշտ: Սակայն մասշտաբները, որոնք տեսնում ենք այսօր, մեդիա փորձագետներին թույլ է տալիս վիճակը գնահատել՝ իբրև ճգնաժամային:

«Դիտորդների խմբի գործունեության խոչընդոտները և ՔԿՀ-ներում մարդու իրավունքների խախտումների ընթացիկ խնդիրները»
25.07.2018
11:00
Թավշյա հեղափոխությունից հետո ՀՀ Արդարադատության նախարարությունը պահում է նույն դիրքորոշումը և նույն կերպ խոչընդոտում ՀՀ ԱՆ ՔԿՀ-ներում հասարակական վերահսկողություն իրականացնող հասարակական Դիտորդների խմբի գործունեությունը. այս մասին հուլիսի 25-ին Մեդիա կենտրոնում տեղի ունեցած քննարկմանը հայտարարեցին Դիտորդական խմբի անդամները:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Հայաստան-Թուրքիա Միջոցառումներ