«Բավարար հիմքեր կա՞ն Հայաստանում ազատ և արդար ընտրություններ անցկացնելու համար»
23.02.2017
12:00
Փետրվարի 23-ին Մեդիա կենտրոնում տեղի ունեցավ քննարկում «Բավարար հիմքեր կա՞ն Հայաստանում ազատ և արդար ընտրություններ անցկացնելու համար» թեմայով:

Քննարկման բանախոսներն էին Լեռնիկ Ալեքսանյանը (ՀՀԿ), Արամ Մանուկյանը (Կոնգրես-ՀԺԿ դաշինք), Ստյոպա Սաֆարյանը (Ազատ դեմոկրատներ կուսակցություն)

Արտակ Սարգսյանը (ՀՅԴ), Արայիկ Հարությունյանը («Ելք» դաշինք):

Գործող Ընտրական օրենսգիրքն ավելի շատ բարդություններ է ստեղծում, քան օգնում է որակյալ ընտրությունների կայացմանը

Քննարկման մասնակիցների կարծիքով՝ ազատ ու արդար ընտրություններ կազմակերպելու համար նախեւառաջ անհրաժեշտ է որակյալ ընտրական օրենսգիրք: Սակայն գործող ՀՀ ընտրական օրենսգիրքը խիստ վիճահարույց է եւ հավելյալ բարդություններ է ստեղծում ընտրողների, կազմակերպիչների ու քաղաքական ուժերի համար:

ՀՅԴ ներկայացուցիչ Արտակ Սարգսյանը, կարեւորելով ընտրությունների անցկացման օրենսդրական որակյալ բազայի առկայությունը, միաժամանակ շեշտեց, որ որակյալ ընտրություններ ունենալու համար այլ պայմաններ եւս անհրաժեշտ են:

«Ազատ եւ արդար ընտրություններ անցկացնելու համար, բնականաբար, իրավական դաշտը չէ, որ միայն պետք է ապահովի այդ ընտրությունները: Դա նախ եւ առաջ ունի սոցիալ-տնտեսական հիմքեր, դա կապված է նաեւ քաղաքական մշակույթի հետ եւ, բնականաբար, կախված է նրանից, թե ընտրություններին մասնակցող քաղաքական ուժերն ինչպիսի քաղաքական կամք կցուցաբերեն հանրության համար վստահելի ընտրություններ անցկացնելու համար»,- ասաց Արտակ Սարգսյանը:

Իսկ «Ազատ դեմոկրատներ» կուսակցությունը ներկայացնող Ստյոպա Սաֆարյանը մտահոգված էր գործող ընտրական օրենսգիրքի բարդությամբ, ինչը նրա կարծիքով կարող է խոչընդոտ հանդիսանալ վստահելի ընտրությունների կազմակերպման համար:

«Քաղաքացին ի վիճակի չէ հասկանալ այդ բարդ օրենսգիրքը, իսկ իրավագետներն արդեն ասել են, որ դա իրավագիտության սկզբունքների խախտում է»,- նշեց Ստյոպա Սաֆարյանը՝ հավելելով, որ ազատ ու արդար ընտրություններ անցկացնելու երկրորդ կարեւոր հանգամանքն իշխանությունների կամքն է:

«Իշխանությունները չունեն ազատ ու արդար ընտրություններ անցկացնելու կամք, որովհետեւ անգամ այս շրջանում բազմաթիվ ահազանգեր են հնչեցվում ընտրակաշառքների եւ ընտրողին կաշառելու փորձերի վերաբերյալ»,- հավելեց Ստյոպա Սաֆարյանը:

«Կոնգրես-ՀԺԿ» դաշինքի ներկայացուցիչ Արամ Մանուկյանը գտնում է, որ գործող ընտրական օրենսգիրքը չի բավարարում նորմալ ընտրական գործընթացի պահանջներին:

«Այս օրենքը միանգամյա օգտագործման օրենք է, հաջորդ ընտրություններում սա չի գործելու, որովհետեւ այն պարզապես կիրառելի չէ: Աշխարհում այսպիսի փորձ չկա, այդ 8 հոգին 8 ժամվա ընթացքում մոտավորապես 90 թեկնածուի եւ 9 կուսակցության քվեներ, սա պարզապես հնարավոր չէ եւ ձախողվելու է ընտրությունների հատկապես հաշվման պրոցեսը»,- համոզվածություն հայտնեց Արամ Մանուկյանը, սակայն շեշտեց նաև, որ գործող ընտրական օրենսգիրքը դրական ազդեցություն էլ կարող է ունենալ, քանի որ գալիք խորհրդարանական ընտրություններին կես միլիոնով պակաս մասնակցություն է գրանցվելու՝ ընտրողների ցուցակների հրապարակման պարտադիր պայմանի կիրառման հետեւանքով.

«Արդեն այդ ցուցակներում չեն լինի բոլոր այն «քվեարկողները», որոնք Հայաստանում չեն եղել, բայց նրանց տեղը քվեարկվել է»,- նշեց Արամ Մանուկյանը:

«ԵԼՔ» դաշինքի ներկայացուցիչ Արայիկ Հարությունյանը եւս լավատես չէ առաջիկա ընտրությունների որակի հետ կապված:

«Այս իշխանությունների ձեռքում ինչ ընտրական օրենսգիրք էլ դնես, եթե նրանք կամք չունեն ընտրություններն ըստ օրենքի անցկացնելու, ապա այդ ընտրությունները կկեղծվեն: Իսկ որ կեղծվելու են, արդեն ազդանշանները կան»,- ասաց Արայիկ Հարությունյանը՝ միաժամանակ համաձայնվելով, որ ընտրական օրենսգիրքը բարդ է եւ լրացուցիչ ջանքեր պետք է գործադրվեն հանրությանը բացատրելու համար օրենսգրքի բոլոր այն հատվածները, որոնք վերաբերում են ընտրողին:

Ընտրակաշառք, դեֆորմացված բարեգործություն, օգնություն: Ինչպե՞ս պայքարել ընտրակաշառքի դեմ:

Իշխող Հանրապետական կուսակցության ներկայացուցիչ Լեռնիկ Ալեքսանյանը, պատասխանելով ընտրություններին ընդառաջ իշխանության կողմից կատարվող չարաշահումների վերաբերյալ մեղադրանքներին, մասնավորապես նշեց.

«Ոչ ոք չի ժխտում, որ ֆինանսական ռեսուրսներն օգնում են ընտրությունների ժամանակ: Շատ դժվար է սահմանագիծ գծել ու ասել, որ սա բարեգործություն է, սա՝ ընտրակաշառք: Ընդհանրապես մարդիկ ընտրություններից առաջ օգնում են՝ ասֆալտ են անում գյուղում եւ այլն: Եթե մարդուն դժվար ժամանակ օգնում ես, բնականաբար այդ մարդը տրամադրված է այդ օգնողին ընտրությունների ժամանակ ձայն տալու»,- եզրահանգում արեց ՀՀԿ ներկայացուցիչը:

Իսկ  իշխանության այսպես ասած «օդիոզ» թեկնածուների մասով, որոնք եւ հիմնականում զբաղված են ընտրողներ կաշառելով, Լեռնիկ Ալեքսանյանը ճիշտ չհամարեց, որ նրանց նույնացնում են Հանրապետական կուսակցության հետ: Նա վստահեցրեց, որ այս ընտրությունները մի լայն քայլ առաջ են լինելու, քան նախորդ ընտրությունները, քանի որ ՀՀԿ-ն եւ նրա առաջնորդը բոլորովին այլ կերպ են տրամադրված եւ ամեն ինչ անելու են որակյալ ընտրություններ ունենալու համար: 

ՀՅԴ ներկայացուցիչ Արտակ Սարգսյանը համոզված է, որ 30-40 տոկոս աղքատության մակարդակ ունեցող երկրում բնակչության մի ստվար մասը խոցելի է ընտրակաշառքի առումով:

«Աղքատ մարդուն, որը ունի ամենօրյա հացի խնդիր եւ կա կաշառք տվողը, ապա ռիսկայնությունը չափազանց բարձր է», - նշեց Արտակ Սարգսյանը:

Լուծումը, ըստ նրա, սոցիալ-տնտեսական իրավիճակի բարելավումն է. «Եթե մենք ուզում ենք արմատապես լուծել ընտրակաշառքի խնդիրը, պետք է մենք լուծենք երկրի սոցիալական խնդիրները, միջին խավի ձեւավորման հարցը, մենք պետք է ունենանք անկախ քաղաքացի: Իսկ քաղաքացու անկախությունը երկու ասպեկտ ունի՝ սոցիալական եւ կրթական, արդյո՞ք մենք ունենք այդ գիտակից քաղաքացին, որ կկարողանա չգայթակղվել նման պայմաններում»: 

Ստյոպա Սաֆարյանը կիսեց վերոհիշյալ կարծիքը՝ հավելելով. «Աղքատ երկրներում իշխանությունների թիվ մեկ գործընկերն ու նրան ընտրողն առաջին հերթին աղքատ մարդն է: Այսպիսի իշխանությունը երբեւէ շահագրգռված չի լինի, որպեսզի ձեւավորվի միջին խավ, ազատ, գրպանը լիքը հասարակություն եւ ընտրող, որովհետեւ այդպիսի ընտրողն ավելի բարձր արժեքներ է ուզում, ավելի բարձր վարքագծի նշաձող է դնում քաղաքական ուժերի ու թեկնածուների առջեւ:Այո, այդպիսի ընտրողը իշխանության համար դառնում է վտանգ»:

Արամ Մանուկյանը կարեւորեց քաղաքացիներին ակտիվացնելու գործընթացը՝ որպես որակյալ ընտրություն ունենալու կարեւոր գրավական: Նրա կարծիքով՝ պետք չէ քաղաքացիներին հիասթափեցնել, անհրաժեշտ է ոգեւորել, որ ազատ քաղաքացիները գան ընտրության, քանի որ նրանք նպաստում են ընտրությունների կայացմանը:

«Ինչքան քաղաքացին կաշկանդված է, խեղճացած է, սպառնալիքի տակ է, այդքան այդ ընտրությունները ոչ լեգիտիմ են: Պետք է ամեն ինչ անել քաղաքացուն իր անհրաժեշտությունը,

իր կարեւորությունը ներկայացնելու համար»,- նշեց Արամ Մանուկյանը:

Արայիկ Հարությունյանը եւս համակարծիք էր, որ հասարակությանը պետք է դուրս բերվի ապատիայից, որի համար անհրաժեշտ է գաղափարական պայքար:

Քաղաքացու ակտիվությունն ընտրությունների որակը բարձրացնելու ու ընտրակաշառքի գայթակղությանը չտրվելու համար կարեւոր նախապայման համարեց նաեւ հանրապետական Լեռնիկ Ալեքսանյանը: 

Քննարկման ամբողջական տեսագրությունը դիտեք այստեղ:

Տեսանյութ
Print Friendly and PDF
Այլ մամլո հաղորդագրություններ
«Բնապահպանության խնդիրներն ու ռիսկերը. առաջարկներ ուղղված նոր կառավարությանը»
22.05.2018
11:00
Մայիսի 22-ին «Մեդիա կենտրոնում» տեղի ունեցավ քննարկում «Բնապահպանության խնդիրներն ու ռիսկերը. առաջարկներ ուղղված նոր կառավարությանը» թեմայով:
Հեռարձակվող ԶԼՄ-ների գործունեության և մեդիա ոլորտում բարեփախումների անհրաժեշտություն. Առաջարկներ ուղղված նոր կառավարությանը
21.05.2018
13:00
Հեռարձակվող ԶԼՄ-ների գործունեության և մեդիա ոլորտում բարեփոխումների անհրաժեշտության վերաբերյալ մայիսի 21-ին Մեդիա կենտրոնում տեղի ունեցավ քննարկում, որին մասնակցում էին Երևանի մամուլի ակումբի նախագահ Բորիս Նավասարդյանը, Խոսքի ազատության պաշտպանության կոմիտեի նախագահ Աշոտ Մելիքյանը և ՀՀ Հեռուստատեսության և ռադիոյի հանձնաժողովի անդամ Արմեն Մկրտչյանը:
«Այլընտրանքային հանրակրթության աջակիցների միության» ստեղծման ազդարարում
21.05.2018
12:00
Մայիսի 21-ին «Մեդիա Կենտրոնում» տեղի ունեցավ ասուլիս, որի ընթացքում ՀՀ կրթական ոլորտի ներկայացուցիչները ազդարարեցին «Այլընտրանքային հանրակրթության աջակիցների միության» ստեղծման մասին, կներկայացնեն ձևավորված միության կազմը, նպատակներն ու գործառույթները։
Թավշյա հեղափոխություն. մշակութաբանական փոփոխություններ
18.05.2018
11:00
Մշակութաբանական ի՞նչ փոփոխություններ են ակնկալվում թավշյա հեղափոխությունից: Ինչպե՞ս կառուցել ժողովրդին ծառայելու այլ մոդել, ինչպե՞ս պաշտոնյա-քաղաքացի հարաբերությունները պարզեցնել, ստեղծել կառավարման մարդակենտրոն քաղաքականություն։ Ի՞նչ փոփոխություններ են անհրաժեշտ հասարակության մեջ վարքագծային փոփոխությունների հասնելու համար:
Հոմոֆոբիայի դեմ պայքարի միջազգային օր. ԼԳԲՏԻ անձանց իրավունքների պաշտպանությունը Հայաստանում
17.05.2018
12:00
ԼԳԲՏԻՔ անձանց իրավունքների պաշտպանությամբ զբաղվող փաստաբանները հույս են հայտնում, որ քաղաքական իրավիճակի փոփոխությամբ թե դատավորները, թե փաստաբանները, թե դատախազները իրենց աշխատանքի վայրում այսուհետ կղեկավարվեն մարդու իրավունքների պաշտպանության սկզբունքով:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ