Իշխանություններն ընտրություններին փորձելու են լռեցնել դիտորդներին. իրավապաշտպաններ
20.10.2016
12:00
Ազգային ժողովում հոկտեմբերի 20-ին Ընտրական օրենսգրքում եւ հարակից օրենքներում կատարված փոփոխությունների ընդունումը, որտեղ մասնավորապես տեղ է գտել «սուտ մատնության մասին» դրույթը, քաղաքական նպատակներ է հետապնդում եւ ուղղված է ընտրությունների ժամանակ դիտորդների ու լրատվամիջոցների ազատ գործունեության դեմ: Այս մասին «Մեդիա կենտրոնում» հոկտեմբերի 20-ին կայացած քննարկմանը հայտարարեց Հայաստանի Հելսինկյան կոմիտեի նախագահ Ավետիք Իշխանյանը։

Խորհրդարանական ուժերի իշխանական եւ ընդդիմադիր խմբակցությունները (բացառությամբ «Ժառանգություն» կուսակցության) եկել են կոմպրոմիսի ընտրություններին մասնակցած քաղաքացիների ցուցակների հարապարակման շուրջ: Այնուամենայնիվ կառավարությունն օրենսդրական փոփոխությունների փաթեթում եւս մեկ դրույթ է ավելացրել, համաձայն որի ուրիշի փոխարեն քվեարկության վերաբերյալ հայտարարություն տվող քաղաքացին կարող է ենթարկվել քրեական պատասխանատվության, եթե այն չհամապատասխանի իրականությանը: Միեւնույն ժամանակ ըստ փոփոխությունների, ընտրողների ցուցակների հրապարակումից հետո քաղաքացին կրկնակի կամ ուրիշի փոխարեն քվեարկելու դեպքի մասին հայտարարություն է տալիս և ընտրական հանձնաժողովը 48 ժամվա ընթացքում ընտրակեղծարարությունը հերքող ապացույցներ չի ներկայացնում, ապա այդ հայտարարությունը հավաստիության կանխավարկածով համարվում է ճիշտ:

Մյուս կողմից, եթե դիմումատուի հայտարարությունը չի համապատասխանում իրականությանը եւ դիտավորյալ են տրամադրվել սուտ տվյալներ, նախատեսվում է 2 տարի ազատազրկում, իսկ եթե քաղաքացին անզգուշությամբ է սուտ հայտարարություն ներկայացրել, նախատեսվում է դրամական տուգանք՝ նվազագույն աշխատավարձի 200-ապատիկից մինչև 800-ապատիկի չափով:

Ըստ Իշխանյանի, համաձայնելով հարապարակել քվեարկած քաղաքացիների ցուցակները՝ իշխանություններն այնպիսի օրենսդրական մեխանիզմ են ստեղծել, որպեսզի մարդիկ ուղղակի չբողոքեն: «Սրանով իշխանություններն ակնկալում են, որ հաջորդ ընտրություններում բողոքները շատ ավելի քիչ կլինեն, որովհետև մարդիկ չեն բողոքի՝ վախենալով հետագայում քրեական պատասխանատվությունից։ Անհասկանալի է, այս կե՞րպ են ցանկանում իշխանությունները բարձրացնել ընտրությունների նկատմամբ հանրային վստահությունը», - հարցադրում կատարեց Իշխանյանը՝ հավելելով, որ եթե «սուտ մատնության» դրույքով գործ հարուցեն, ապա այն դիտարկելու են որպես քաղաքական հետապնդում: «Դրանով մեր բերաններն են փակելու, որպեսզի մենք չխոսենք խախտումների մասին»,- ասաց իրավապաշտպանը՝ գնահատելով այն որպես քողարկված ահաբեկում է հատկապես դիտորդական խմբերի նկատմամբ։

Միեւնույն ժամանակ օրենսդրական փոփոխություններով, ընտրություններին մասնակցած անձանց ցուցակների հրապարակումից բացի, առաջարկվում է Հայաստանի բոլոր 2 հազար ընտրատեղամասերում տեղադրել տեսախցիկներ, ուղիղ հեռարձակել քվեարկության ամբողջ գործընթացը ու հաշվարկը: 

Քննարկման մասնակից Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցի գնահատմամբ իշխանական եւ ոչ  իշխանական ուժերն օրենսդրական փոփոխությունների շուրջ համաձայնությունն ամբողջությամբ ուղղված է դիտորդների դեմ: «Ես այստեղ տեսնում եմ միտում, որ այս օրենսդրական փոփոխությունների ամբողջ տրամադրությունն ուղղված է դիտորդական առաքելության նկատմամբ ճնշումների մեծացմանը՝ սահմանափակման միջոցով», - ասաց նա՝ հավելելով, որ լինում են դեպքեր, երբ քաղաքացին պարզում է, որ իր փոխարեն քվեարկել են, սակայն քննության արդյունքում հայտնի է դառնում, որ անձը պարզապես շփոթվել է եւ բողոքը հետ են վերցնում: «Եթե քաղաքացին բողոքը հետ է վերցնում ես՝ հաղորդում տված անձս, այդ դեպքում սուտ մատնության համար ենթարկվում եմ ենթադրենք քրեական պատասխանատվության», - ասաց նա:

Միեւնույն ժամանակ իրավապաշտպանները չբացառեցին, որ այս օրենսդրական փոփոխությունների շուրջ իշխանական ու ոչ իշխանական ուժերի համաձայնության հետեւում քաղաքական առեւտուրն է թաքնված: «Ամբողջ բազարը գնում է ապագա Ազգային ժողովում տեղեր փախցնելու շուրջը: Այդ համատեքստում եմ ես տեսնում նաև այս օրենքի ընդունումը: Եթե Ազգային ժողովում լիներ քառասուն տոկոսանոց սկզբունքային ընդդիմություն, ոչ միայն այս հոդվածը չէր ընդունվի, այլև իշխանությունը չէր էլ համարձակվի այս հոդվածը բերել՝ թեկուզ ունենար մեծամասնություն», - հայտարարեց Ավետիք Իշխանյանը:

Երկու բանախոսներն էլ, ում ղեկավարած կազմակերպություններն ընտրություններին դիտորդական առաքելություն են իրականացնում, հայտարարեցին, որ եթե անգամ այս օրենսդրական դրույթը չվերացվի, կշարունակեն ահազանգեր ներկայացնել ընտրակեղծիքների վերաբերյալ։

Ավելի վաղ այս դրույթի դեմ հայտարարությամբ էին հանդես եկել իրավապաշտպան եւ լրագրողական կազմակերպությունները:

Արշալույս Մղդեսյան, «Մեդիա կենտրոն» ծրագրի համակարգող-խմբագիր

Հեղինակի հետ կապվելու համար գրեք [email protected] հասցեին:

Տեսանյութ
Print Friendly and PDF
Այլ մամլո հաղորդագրություններ
«Անցումային արդարադատության իրականացման մեխանիզմները Հայաստանում»
23.05.2019
15:00
Մեդիա կենտրոն, Երևան: Մայիսի 23-ին Երևանի պետական համալսարանի Պալեանների անվան դահլիճում «Մեդիա կենտրոնը»-ը անցկացրեց քննարկում «Անցումային արդարադատության իրականացման մեխանիզմները Հայաստանում» թեմայով:
Ազգային անվտանգության ծառայության գործառույթներն ու լիազորությունների շրջանակը
22.05.2019
11:00
Մեդիա կենտրոն, Երևան: Մայիսի 22-ին «Մեդիա կենտրոնում» տեղի ունեցավ քննարկում «Ազգային անվտանգության ծառայության գործառույթներն ու լիազորությունների շրջանակը» թեմայով:
«Դիտորդների խմբի գործունեության խոչընդոտները և քրեակատարողական հիմնարկներում մարդու իրավունքների խախտումների խնդիրները 2018-2019թթ.-ին»
21.05.2019
11:00
Մեդիա կենտրոն, Երևան: Մայիսի 21-ին ժամը 11:00-ին Մեդիա կենտրոնում տեղի ունեցավ մամուլի ասուլիս՝ «Դիտորդների խմբի գործունեության խոչընդոտները և քրեակատարողական հիմնարկներում մարդու իրավունքների խախտումների խնդիրները 2018-2019թթ.-ին» թեմայով
Ռոբերտ Քոչարյանի հայտարարությունները սուտ են, նա կխուսափի՞ քննությունից․ քննարկում Մեդիա կենտրոնում
20.05.2019
10:00
Մեդիա կենտրոն, Երևան: Մայիսի 20-ին Մեդիա կենտրոնում տեղի ունեցավ «Ռոբերտ Քոչարյանն ազատվեց կալանքից. դատական իշխանության անկախությու՞ն, թե՞ դատական համակարգի հին արատներ» թեմայով քննարկում։
«Բռնությունը ընտանիքում. իրազեկման բացը կրթական ծրագրերում և օրենսդրական փոփոխությունների անհրաժեշտությունը»
15.05.2019
12:00
Մեդիա կենտրոն, Երևան: Մայիսի 15-ին, ժամը 12:00-ին «Մեդիա կենտրոնում» տեղի ունեցավ քննարկում` նվիրված Ընտանիքի միջազգային օրվան: Քննարկման թեման էր՝ «Բռնությունը ընտանիքում. իրազեկման բացը կրթական ծրագրերում և օրենսդրական փոփոխությունների անհրաժեշտությունը»:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ