ԼՂ հակամարտության կարգավորման Վիեննայի պայմանավորվածությունները պետք է կատարվեն. ԵՄ դեսպան
04.07.2016
12:00
«Մեդիա կենտրոնում» տեղի ունեցած մամլո ասուլիսին Հայաստանում Եվրամիության պատվիրակության ղեկավար, դեսպան Պյոտր Սվիտալսկին ներկայացրեց Եվրոպական միության արտաքին եւ անվտանգության քաղաքականության համաշխարհային ռազմավարությունը:

Այնուհետեւ լրագրողների խնդրանքով դեսպանն անդրադարձավ Լեռնային Ղարաբաղի հակամարտության կարգավորման գործընթացի ներկա փուլին, ԵՄ-ից դուրս գալու վերաբերյալ Մեծ Բրիտանիայի հանրաքվեի արդյունքներին, ներկայացրեց Հայաստանում կեռուպցիայի դեմ պայքարի վերաբերյալ ԵՄ դիրքորոշումը, անդրադարձավ նոր Ընտրական օրենսգրքին եւ Հայաստան-Եվրամիություն շրջանակային համաձայանգրի շուրջ բանակցություններին:

Ավելի ուժեղ Եվրամիության կարիք կա

Եվրամիության քաղաքացիներն ու աշխարհը, ըստ դեսպանի, այսօր, ինչպես երբեք, կարիք ունեն էլ ավելի ուժեղ Եվրոպական միության:

«Մեր ընդլայնված տարածաշրջանը ավելի անկայուն է ու անապահով: Միության սահմաններում և անդին գոյություն ունեցող Ճգնաժամային իրավիճակը ուղղակի անդրադառնում է քաղաքացիների կյանքի վրա: Նման դժվարին ժամանակներում, ուժեղ է համարվում այն միությունը, որը կարող  է դրսևորել ռազմավարական մտածողություն, ձևավորել ընդհանուր մտապատկեր եւ գործել միասնաբար: Սա հատկապես ճշմարիտ է Միացյալ Թագավորության հանրաքվեի արդյունքների պարագայում: Անշուշտ մենք կվերանայենք մեր Միության գործելակերպը, քանզի մենք լավ գիտենք, մեր նպատակները: Լավ գիտենք, թե որոնք են մեր սկզբունքները, մեր շահերն ու մեր առաջնահերթությունները: Անորոշության ժամանակը չէ:  Մեր միությանը պետք է ռազմավարություն: Մեզ պետք է մի ընդհանուր տեսլական, եւ ընդհանուր գործողություն»,-հայտարարեց Սվիտալսկին:

Դեսպանի խոսքով՝ Եվրամիությունը ձևավորել է դիվանագիտական լայն ցանց, որը խորը կապեր ունի աշխարհի բոլոր անկյուններում: Տնտեսական առումով, Եվրոպական Միությունը աշխարհի երեք առաջատար տնտեսական դաշինքներից մեկն է:

«Աշխարհի գրեթե բոլոր երկրների համար առաջին առեւտրային գործընկերն ենք եւ առաջին արտաքին ներդրողը: Զարգացման համագործակցության ուղղությամբ մեր՝ որպես Միության կողմից տրամադրվող ներդրումների ծավալները, գերազանցում են աշխարհի բոլոր մյուս երկրների կողմից միասին տրամադրվող ներդրումներին: Վերջերս այցելած մեր գործընկերները, բոլոր երկրները ակնկալում են, որ Եվրոպական միությունը ստանձնի ավելի կարեւոր դերակատարում, այդ թվում հանդես գալով որպես գլոբալ անվտանգության երաշխավոր»,-նշեց նա՝ հավելելով, որ գլոբալ ռազմավարությունում Եվրամիություն գործելու է հետեւյալ ուղղություններով:

Եվրամիության անվտանգությունը, Արեւելյան ու հարավային հարեւան պետությունների ու հասարակությունների տոկությունն ու կայունությունը, հակամարտությունների նկատմամբ ավելի համալիր մոտեցման ցուցաբերումը եւ համաշխարհային կառավարման բարելավումը:

«Մեր ներդրումները ուղղված կլինեն տարածաշրջանի կարգավորմանը եւ համագործակցության խթանմանը տարածաշրջանի ներսում և անդին: Կխթանենք բարեփոխված գլոբալ կառավարումը, որը կկարողանա դիմակայել 21-րդ  դարի մարտահրավերներին:  Մեր համագործակցությունը կլինի գործնական եւ սկզբունքային, կիսելով համաշխարհային պատասխանատվությունները մեր գործընկերների հետ եւ նպաստելով նրանց հզորացմանը: Մենք լավ փորձ ունենք: Մեր հարեւանների եւ մեր գործընկերի թույլ կողմերը մեր սեփական թույլ կողմերն են: Այսպիսով, մենք պետք է ներդրենք շահեկան լուծումներ և դուրս գանք պատրանքներից, թե միջազգային քաղաքականությունը կարող է լինել ահաղթանակ խաղ»,-ասաց Հայաստանում Եվրամիության դեսպանը:

Վիեննայի պայմանավորվածությունները պետք է կատարվեն

Գլոբալ ռազմավարությունում նախատեսած հակամարտությունների նկատմամբ համալիր մոտեցման ցուցաբերման շրջանակներում, անդրադառնալով ղարաբաղյան հակամարտության կարգավորմանը, դեսպանը նշեց, որ այս գործընթացում վերջին ամիսներին նոր շարժ է նկատվում:

«Վիեննայում կայացած նախագահների գագաթաժողովը նոր էջ բացեց ԼՂ խաղաղ կարգավորմանն ուղղված ջանքերում, փորձ արվեց գտնել ազնիվ և բազմակողմանի լուծում»,-ասաց դիվանագետը՝ հավելելով, որ Վիեննայում ձեռք բերված պայմանավորվածությունները պետք է իրականացվեն, որովհետև դրանք կառուցում են այս գործընթացում փոփոխության ճանապարհը:

Նրա խոսքով, այդ գործընթացը շարունակվում է, իսկ Եվրամիությունն ամբողջովին աջակցում է հիմնախնդրի կարգավորման այդ ձևաչափին. «Դրանում գլխավոր դերը ԵԱՀԿ Մինսկի խմբի համանախագահներինն է»:

Նա տեղեկացրեց, որ Հարավային Կովկասում Եվրամիության հատուկ ներկայացուցիչը հունիսի 5-ին ժամանելու է Հայաստան: Այդ այցի շրջանակում նա հանդիպումներ կունենա ՀՀ նախագահի, արտգործնախարարի և բարձրաստիճան այլ պաշտոնյաների հետ: Այդ այցով, ընդգծեց Սվիտալսկին, նպատակ կա հանդես գալ որպես ղարաբաղյան հակամարտության կարգավորման գործընթացի աջակից:

Սվիտալսկին չխորացավ կարգավորման գործընթացի դետալների մեջ՝ կարծիք հայտնելով, որ հիմա հանրային դիվանագիտության ժամանակը չէ:

«Վիեննայում ձեռք բերված պայմանավորվածությունները պետք է կյանքի կոչվեն, որովհետև դրանք կառուցում են այս գործընթացում փոփոխության ճանապարհը: Մենք փորձում ենք աջակցել խաղաղ կարգավորմանը տանող գործընթացին: Այդժմ պետք է թույլ տալ, որ դիվանագիտությունն աշխատի»,-նշեց դեսպանը՝ միեւնույն ժամանակ չցանկանալով մեկնաբանել Ադրբեջանի առաջին դեմքերի հայտարարություններն առ այն, որ Բաքուն համաձայն չէ շփման գծում հետաքննական մեխանիզմների ներդրմանը:

Ընտրական նոր օրենսգրքի մասին

Ընտրական օրենսգրքի նախագծի շուրջ իշխանությունների ու ընդդիմության միջև ձեռք բերված համաձայնությունը կկատարվի. նման համոզմունք հայտնեց Եվրամիության դեսպանը:

«Ես հայտարարել եմ մի քանի անգամ եւ ասում եմ կրկին, որ հավատում եմ, որ սպասվող ընտրությունները վճռական կլինեն այս երկրի համար: Ես առաջին մարդն էի, որ շնորհավորեցի և՛ կառավարությանը, և՛ ընդդիմադիր ուժերին համաձայնության գալու համար՝ չնայած առկա խորը տարաձայնություններին: Սա լավ օրինակ է, երբ հանուն մեծ գործի կողմեը մի կողմ են թողնում տարաձայնությունները»,-ասաց դեսպանը՝ միեւնույն ժամանակ նշելով, որ այդ համաձայնությունը չի լուծում բոլոր խնդիրները։

Նա հիշեցրերց, որ այս խնդրի շուրջ շատ անհամաձայնություններ և հակասություններ  կան կառավարության, ընդդիմադիր ուժերի ու քաղաքացիական հասարակության միջև: Այնուամենայնիվ ձեռք բերված համաձայնությունը դեսպանը պատմական է համարում եւ նշում, որ Եվրամիությունը պատրաստ է աջակցել այդ համաձայնությունների կյանքի կոչմանը:

Ընտրական օրենսգրքի բարեփոխման ֆինանսավորման նպատակով պահանջվող 16 միլիոնից հավաքվել է 12 միլիոնը, որից 3 միլիոնը ԵՄ-ն է տրամադրել։ Անհրաժեշտ գումարը պետք է հավաքվի մինչև այս տարվա սեպտեմբերի մեկը:

«Հույս ունեմ, որ ֆինանսական խնդիրը կառուցողական լուծում կստանա։ Համաձայնագրի կյանքի կոչման համար Եվրամիությունը պատրաստ է տրամադրել զգալի աջակցություն: Բացի այդ, կարծում եմ, մի շարք պետություններ նույնպես պատրաստ են ֆինանսապես աջակցել համաձայնագիրը կյանքի կոչելուն: Ընդհանուր առմամբ միջազգային հանրությանը ծանրակշիռ աջակցություն է ցուցաբերում այս հարցում», - ասաց նա։

Արշալույս Մղդեսյան, «Մեդիա կենտրոն» ծրագրի համակարգող-խմբագիր

Հեղինակի հետ կապվելու համար գրեք arshaluismghdesyan@pjc.am հասցեին:

 

 

 

Տեսանյութ
Print Friendly and PDF
Այլ մամլո հաղորդագրություններ
2017-2018թթ պետգնումների համակարգի մոնիտորինգի արդյունքները
28.12.2018
12:00
Դեկտեմբերի 28-ին «Մեդիա կենտրոնում» «Հանրային քաղաքականության հետազոտությունների ազգային կենտրոն» ՀԿ-ն ներկայացրեց 2017-2018թթ (I կիսամյակի) պետական գնումների համակարգի հիմնական միտումները։
Իրավապաշտպանների առաջարկները ՔԿՀ-ներում բարեփոխումների իրականացման ռազմավարության վերաբերյալ
27.12.2018
13:30
Արդարադատության նախարարության կողմից е-draft կայքում 2018 թ. դեկտեմբերի 19-ից հանրային քննարկման է դրվել քրեակատարողական համակարգում իրավիճակի բարելավման նպատակով 2018 -2038 թթ. ռազմավարությունը և դրա իրականացման 20 -ամյա միջոցառումների ծրագիրը հաստատելու մասին կառավարության որոշման նախագիծը։ Այն հանրային քննարկման է դրված լինելու մինչև 2019 թ. հունվարի 8-ը։
Օպտիմա՞լ է նախարարությունների օպտիմալացումը
26.12.2018
12:00
Դեկտեմբերի 26-ին Մեդիա կենտրոնում տեղի ունեցավ քննարկում «Օպտիմա՞լ է նախարարությունների օպտիմալացումը. գնահատում են մասնագետները» թեմայով:
2018 թ. Շուռնուխում տեղի ունեցած բռնության քրեական գործի կարճման վերաբերյալ
25.12.2018
11:00
Դեկտեմբերի 25-ին Մեդիա կենտրոնում տեղի ունեցավ «Փինք Արմենիա» ՀԿ-ի մամուլի ասուլիսը, որի ընթացքում ներկայացվեցին 2018թ. Շուռնուխ գյուղում ԼԳԲՏ անձանց նկատմամբ ծեծի հիմքով հարուցված քրեական գործի մանրամասներն ու գործի կարճման պատճառները:
«Արամի 23. խոստումներ, որոնք չկատարվեցին»
24.12.2018
12:00
Մեդիա կենտրոնում, դեկտեմբերի 24-ին, տեղի ունեցավ քննարկում «Արամի 23. խոստումներ, որոնք չկատարվեցին» թեմայով:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ