«Գերմանիայի Բունդեսթագում Հայոց ցեղասպանության մասին բանաձեւի ընդունման քաղաքական հետեւանքները»
03.06.2016
12:00
«Բունդեսթագում Հայոց ցեղասպանության մասին բանաձեւի ընդունումը շառաչուն ապտակ էր Թուրքիային»,- կարծում է թուրքագետ Անդրանիկ Իսպիրյանը: «Դա ոչ մի ապտակ էլ չէր, ընդամենը թեթեւ կսմիթ էր»,- հակադարձում է քաղաքագետ Հայկ Մարտիրոսյանը: Իսկ քաղաքական վերլուծաբան Ստեփան Սաֆարյանն էլ նշում, որ Գերմանիայի այդ քայլը ոչ միայն շատ լուրջ, աննախադեպ քաղաքական կոնսենսուսի արդյունք է, այլեւ միտված է Թուրքիայի հետ կապված երկարաժամկետ քաղաքականության իրագործմանը:

«Բունդեսթագում այս բանաձեւի ընդունմանը մեծապես նպաստեց Թուրքիայի նախագահ Ռեջեփ Էրդողոնը, որը փախստկանների հարցով առեւտուր էր անում Գերմանիայի եւ Եվրոպայի հետ եւ փորձում էր նրանց շանտաժի ենթարկել», «Գերմանիայի Բունդեսթագում Հայոց ցեղասպանության մասին բանաձևի ընդունման քաղաքական հետևանքները» թեմայով Մեդիա կենտրոնում հրավիրված քննարկման ժամանակ կարծիք հայտնեց  թուրքագետ Անդրանիկ Իսպիրյանը: Նրա գնահատմամբ. «Նման բանաձևի ընդունմամբ Գերմանիան Թուրքիային շառաչուն ապտակ հասցրեց:Նույնիսկ թուրք պատգամավորները կողմ քվեարկեցին: Մեկ ձեռնպահ քվեարկած պատգամավորն էլ ոչ թե չէր ընդունում, որ ցեղասպանություն եղել է, այլ նշում էր, որ հարցը պետք է քննարկվի Թուրքիայի խորհրդարանում»,-ընդգծեց  Իսպիրյանը՝ հավելելով, որ  բանաձևի ընդունման վերաբերյալ քաղաքական որոշում կար:

Իսկ ահա քննարկմանը մասնակցող քաղաքագիտության դոկտոր Հայկ Մարտիրոսյանի գնահատմամբ՝ ավելի լավ է նման բանաձեւ առհասարակ չընդունվեր, քան ընդունվեր այդպիսի թույլ, եւ վտանգավոր   ձեւակերպումներով. «Հենց առաջին պարբերությունում խոսվում է հայերի և այլ քրիստոնյա ժողովուրդների ցեղասպանությունների մասին: Քրիստոնյա բառը վտանգավոր է: Չկա նման բան, որ Հայոց ցեղասպանությունը կատարվեց այն պատճառով, որ հայերը քրիստոնյա էին, այլ 1915-ին կատարվեց էթնիկ զտում: Բունդեսթագը նման բացթողում կատարելու իրավունք չուներ: Վատ դրույթ է նաև այն, որ ասվում է, թե պետք է խթանվի Թուրքիայի կողմից սկսված գործընթացը հայկական հուշարձանների և մշակութային ժառանգությունը վերականգնելու ուղղությամբ: Գերմանիան կուլ է տվել թուրքական քարոզչական խայծը, համաձայն որի`նրանք մի քիչ վերանորոգեցին Ախթամարը և Տիգրանակերտի եկեղեցին, որը հետո բռնագրավվեց: Սա դնել բանաձևում չափազանց անընդունելի է: Անընդունելի է հղումը ցյուրիխյան արձանագրություններին, որոնք մեռած են: Հստակ տարբերություն է դրվում Հոլոքոստի և մյուս ցեղասպանությունների միջև`համարելով, որ Հոլոքոստը առանձնահատուկ է: Բանաձևում կա համատեքստ, որ այսօրվա Թուրքիան պատասխանատվություն չի կրում 1915-ին կատարված իրադարձությունների համար, այդ դեպքում ինչո՞ւ է այսօրվա Գերմանիան ստանձնել պատասխանատվություն Հոլոքոստի համար: Սա ցույց է տալիս, որ գործ ունենք ոչ թե շառաչուն ապտակի, այլ թեթև կսմթոցի հետ, այն էլ մարմնի թիկունքի հատվածում»,- եզրափակեց քաղաքագետը: 

Նման գնահատականին կտրականապես չհամաձայնվեց քննարկմանը մասնակցող Միջազգային եւ անվտանգության հարցերի հայկական ինստիտուտի հիմնադիր, քաղաքական վերլուծաբան Ստեփան Սաֆարյանը: Նա ընդգծեց, որ սա մինչ այժմ ընդունված նմանատիպ ամենաուժեղ բանաձեւերից մեկն էր, ապա մատնանշեց. «Դուք պատկերացնում եք, թե  Գերմանիայի նման  երկրում ինչ ահռելի աշխատանք պետք է տարվեր, որպեսզի 3-4 էջանոց տեքստում ամեն մի բառի ու արտահայտության համար հասնեին կոնսենսուսի: Նման բան անգամ Հայաստանի նման երկրում է դժվար: Եվ եթե Եվրամիության ամենաթելադրող երկրի պատգամավորների մեծամասնությունը  միանում է այս տեքստին, համաձայնեք, որ սա երկրի դիրքորոշում է: Հանձնարարականները աննախադեպ շատ էին, ինչը չեմ տեսել այլ բանաձևերում»,-նշեց Սաֆարյանը:

Հայկ Մարտիրոսյանի հակադարձմանը, թե դա  ոչ հստակ ձեւակերպումներով, առանց «ներողություն» բառի եւ միայն վերնագրում  եւ տեքստում մեկ անգամ «ցեղասպանություն» եզրույթի կիրառմամբ վտանգավոր հանձնարարականների շարքով մի փաստաթուղթ է, որն իրավական հետեւանք չունի՝ Սաֆարյանն արձագանքեց. «Ֆրանսիայի պառլամենտի ընդունած բանաձեւն էլ շատ կարճ  էր և անուն դնել, ասել` նա էլ կարճ էր,  ինչո՞ւ 3- 4 էջ չի, ինչպես Գերմանիայի Բունդեսթագի բանաձևու՞մ: Մեր տարբերությունն այն է, որ Դուք Գերմանիայի Բունդեսթագից սպասում էիք դատավճիռ, մինչդեռ դա քաղաքական մարմին է, որը, կարծում եմ, ֆանտաստիկ քայլ արեց»,- եզրափակեց բանախոսը՝  կարծիք հայտնելով, որ մենք կտեսնենք դրա շարունակությունը:

Թուրքագետ Անդրանիկ Իսպիրյանն էլ, անդրադառնալով այս բանաձեւի ընդունումից հետո թուրք-գերմանական հարաբերություններին՝ նշեց. «Հետևանքները Թուրքիայի համար ծանր կլինեն: Այդ երկիրը բավականին բարդ իրավիճակում է հայտնվել, քանի որ իր գլխավոր դաշնակիցը ընդունում է Հայոց ցեղասպանությունը և իր մեղսակցությունն է շեշտում: Գուցե դրանից հետո Թուրքիային հասկացնեն փոխհատուցում տալու անհրաժեշտության մասին, երբ իրենց համար դա կլինի շահավետ: Ինչ վերաբերում է Թուրքիայի արձագանքին, ապա Էրդողանը ոչ մի դեպքում չի գնա Գերմանիայի հետ հարաբերությունների խզմանը»:  

Արևիկ Սահակյան, «Մեդիա կենտրոն» ծրագրի համակարգող:

Հեղինակի հետ կապվելու համար գրեք  areviksahakyan@mail.ru հասցեին:

Տեսանյութ
Print Friendly and PDF
Այլ մամլո հաղորդագրություններ
«Երևանի ավագանու արտահերթ ընտրությունների դիտարկման նախնական արդյունքները»
24.09.2018
14:00
Սեպտեմբերի 24-ին Մեդիա կենտրոնում տեղի ունեցավ «Անկախ դիտորդ» դաշինքի մամուլի ասուլիսը «Երևանի ավագանու արտահերթ ընտրությունների դիտարկման նախնական արդյունքները» թեմայով:
«Ականատես» դիտորդական խմբի ասուլիս․ Երևանի ավագանու արտահերթ ընտրություններ
24.09.2018
10:00
Սեպտեմբերի 24-ին Մեդիա կենտրոնում (Սարյան 12, 3-րդ հարկ) տեղի ունեցավ Ականատես դիտորդական խմբի ասուլիսը, որի ժամանակ ներկայացվեցին Երևանի ավագանու արտահերթ ընտրությունների դիտորդական առաքելության արդյունքները:
Երևանի ավագանու արտահերթ ընտրություններ. քննարկումների շարք
23.09.2018
11:00
Սեպտեմբերի 23-ին՝ Երևանի ավագանու արտահերթ ընտրությունների օրը, «Մեդիա կենտրոնում» անցկացվում է քննարկումների, ասուլիսների և բանավեճերի շարք:
Հորդորում ենք զերծ մնալ մեդիա ոլորտում գործունեություն ծավալող կազմակերպությունների աշխատանքը խոչընդոտելու որևէ փորձից
22.09.2018
18:00
2018 թ․ սեպտեմբերի 22-ին, «Հանրային լրագրության» ակումբ հասարակական կազմակեպության Մեդիա կենտրոնի սրահում ընթացող «Անկախ դիտորդ» դաշինքի կողմից իրականացված մեդիամոնիտորինգի և իրականացվելիք դիտորդական առաքելության վերաբերյալ ասուլիսի ընթացքին միջամտել են «Բարգավաճ Հայաստան» կուսակցության ներկայացուցիչներն ու աջակիցները։
«Ուրբանիստան» ամփոփում է ճարտարապետական մրցույթի արդյունքները
20.09.2018
18:00
Սեպտեմբերի 17-ին «Մեդիա կենտրոնում» տեղի ունեցավ «Ուրբանիստայի» հայտարարած հետարդյունաբերական քաղաքների զարգացմանն ուղղված նախագծերի մրցույթի արդյունքների ամփոփումը, որին մասնակցել են սկսնակ ճարտարապետներ և ուսանողներ։
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ