Կուտակային կենսաթոշակային համակարգում առկա խնդիրները
20.05.2016
13:00
«2017թվականը նախընտրական տարի է, և բնական է, որ դժգոհ հատվածի փողոցում հայտնվելն անցանկալի է իշխող կուսակցության համար, որն էլ նախաձեռնեց Կուտակային կենսաթոշակային համակարգի պարտադիր բաղադրիչի հետաձգումը մասնավոր հատվածի համար»,-Մեդիա կենտրոնում հրավիրված քննարկման ժամանակ հայտարարեց «Լուսավոր Հայաստան» կուսակցության անդամ Մանե Թանդիլյանը:

Կուտակային կենսաթոշակային համակարգի ներդրման դեմ պայքարող Դեմ եմ շարժման նախկին անդամը նշեց. «Մենք նոր թափ էինք տալիս ստորագրահավաքի միջոցով այս շարժմանը, որպեսզի կարողանանք հետաձգել, ընդհանրապես հանել տանք և դարձնենք կամավոր։ Մենք խորապես հավատում ենք, որ նման ռիսկային համակարգը կարող է առաջարկել հանրության ամբողջաան վստահությունը վայելող իշխանությունը միայն, եւ այն կարող է լինել միայն կամավորական սկզբունքով։ Եվ իմ համոզմամբ՝ այդ բողոքի ալիքը սաստելու համար են  պարտադիր բաղադրիչի ներդնումը տեղափոխել, սա իմ տեսակետն է».- ներկայացրեց  Մանե Թանդիլյանը։

Անդրադառնալով օրերս Կուտակային կենսաթոշակային համակարգի մասին ՀՀ օրենքում՚ փոփոխություններ կատարելու նախագծի քննարկման ընթացքում սոցապ նախարար  Արտեմ Ասատրյանի ներկայացրած հիմնավորմանը, թե այս փոփոխությունն անհրաժետ է՝ նոր հարկային օրենսգրքի հետ միաժամանակ նաեւ այս բարեփոխումը կյանքի կոչելու, ինչպես նաեւ՝ հանրությանն առավել իրազեկելու համար,  Թանդիլյանը նշեց, որ այդ  բացատրությունները դժվար է հիմնավոր համարել:

«Անցել է արդեն մեկ տարի, և սա պետք է լիներ բավարար ժամանակ իրազեկելու բնակչությանը, եթե ընդհանրապես նման գործընթաց և ցանկություն կար։ Եվ այն ժամանակ էլ, երբ մենք դեմ էինք այդ համակարգին, շեշտում էինք, որ մարդիկ բավականաչափ իրազեկված չեն։ Կապելով այս հետաձգումն օրենքի ընդունման հետ՝ ես նորից եմ ուզում շեշտել, որ հիմա էլ կան մարդիկ ովքեր համակարգի մեջ են, և ո՞վ էր ասում, որ եթե հիմա միանային մնացածները, հնարավոր չէր լինելու այդ համակարգը տեղափոխել, կամ համապատասխան փոփոխություններ անել»,-հավելեց Թանդիլյանը:

Քննարկմանը մասնակցող  ՀՅԴ փորձագետ, տնտեսագետ Սուրեն Պարսյանն էլ նկատեց, որ 2016 թվականի բյուջեով նախատեսված է նպատակային սոցվճարների առանձին բաժին, ինչը նախկինում չկար:

«Արդյոք նպատակային սոցվճարները երաշխավորվա՞ծ են. Սահմանադրական դատարանի որոշման համաձայն, սահմանված նպատակային վճարները ոչ միայն այն չափով, որքան անձն է ներդրել եւ գումարած ինֆլյացիայի մակարդակը, այլ նաեւ պետք է երաշխավորված լինեն պետական միջոցները: Այս մասով դեռեւս երաշխավորություն չկա եւ ամրապնդվում է անվստահության մթնոլորտը համակարգի նկատմամբ»,-ասաց Պարսյանը:

Փորձագետն անդրադարձավ նաեւ Արտեմ Ասատրյանի՝ ԱԺ-ում  ներկայացրած տվյալներին, ըստ որոնց մինչեւ այժմ կուտակային համակարգում ներառված է 145 հազար հոգի, որից 65 հազարը՝ պետական, մնացածը՝ մասնավոր. «Պետական համակարգից պարտադիր վճարում են բոլորը, մասնավոր սեկտորից այն մարդիկ են, որոնք հոժարակամ են մտել. Կամ դիմում չեն գրել, որ չվճարեն, կամ նոր աշխատանքային շուկա են մտել՝ մոտ 3000 մարդ»:

Քննարկման մասնակիցները նշեցին, որ մասնավոր հատվածի մեջ  մտնում են  նաեւ բանկային համակարգի աշխատակիցները: Մանե Թանդիլյանը նկատեց, որ քանի որ  բանկերը Կենտրոնական բանկի վերահսկողության տակ են,  իրենք թույլ չեն տվել, որ իրենց  աշխատակիցները դիմում գրեն, իսկ Սուրեն Պարսյանն էլ նշեց, որ դրա փոխարեն բարձրացրել են նրանց աշխատավարձը:

«Հետեւաբար՝ այդ հատվածն էլ է պարտադիր ներառվել»,- եզրափակեց Թանդիլյանը:

Քննարկմանը մասնակցող հաշվապահ, «Դեմ եմ» շարժման անդամ Շողեր Բաբայանն էլ նշեց, որ մինչև այժմ նամակներ է ստանում անհատ ձեռներեցներից, որոնք չեն հասցրել կարճ ժամկետներում հրաժարվել կուտակային կենսաթոշակային համակարգից:

«Այն ժամանակ հիմնականում անհատ ձեռնարկատերերի մեծ մասը չի հասցրել հրաժարվել, մինչ այժմ ես նամակներ եմ ստանում: Մարդիկ են եղել, որ երկրում չեն եղել, այդ մարդիկ 5 ամիս ունեցել են, ինչո՞ւ եք կրճատել դարձրել 10 օր»,-հավելեց Բաբայանը:

Անդրադառնալով կուտակային ֆոնդում առկա գումարին՝ Սուրեն Պարսյանն ասաց. «Մենք այժմ ունենք 36 միլիարդ դրամ գումար կուտակային ֆոնդում: Մեր տնտեսությունում որտեղ են ներդրվել այդ գումարները, մենք ունե՞նք արժեթղթերի զարգացած շուկա, որտեղ ներդրվի ու տոկոսներ լինեն: Ֆոնդերի գումարների մեծ մասը պետական պարտատոմսերի մեջ են ներդրվել: Այսինքն, պետական համակարգից եկել են ֆոնդ, որտեղից նորից գնացել  են պետական համակարգ»: 

Շողեր Բաբայանը կարեւորեց նաեւ խնդրի քաղաքացիական ընկալումը. ի՞նչ է ուզում քաղաքացին այս ռեֆորմից:

«Այս հարցի հիմքում մի այսպիսի մեկնաբանություն դրվեց՝ ինչի՞ համար է մեզ պետք կուտակայինը։ Տիգրան Սարգսյանն այսպիսի մի հայտարարություն արեց. այն ժամանակ՝ երբ այս երիտասարդները կլինեն ծերեր, կենսաթոշակառուներ, մենք այն ժամանակ մի քանի անգամ ավելի քիչ երիտասարդներ կունենանք, որոնք սերունդների համագործակցության շնորհիվ չեն կարողանա ապահովել տվյալ պահի կենսաթոշակները։ Իսկ ինչո՞ւ դա պետք է այդպես լինի, ինչո՞ւ պետք է այդպիսի կանխատեսում ունենանք, որ մեր երիտասարդները քչանալու են»,-հավելեց Բաբայանը։  

Այս կապակցությամբ Սուրեն Պարսյանն էլ հիշեցրեց. «Երբ հարցնում էինք, թե ինչու է 1974 թվականի հունվարի 1-ից հետո անձանց տրվել, նրանք պարզապես նշում էին, որ մենք հաշվի ենք առել ակտուալ մաթեմատիկական հաշվարկներ, որ 23 տարի կուտակումների դեպքում է, որ գումար կարող է ձևավորվել, և դրա հաշվին դու կարող ես ունենալ արժանապատիվ ծերություն, թոշակ և այլն: Հիմա հարց է առաջանում, 3 տարի հետաձգվեց, մի տարի էլ հիմա են հետաձգում, այդ դեպքումձեր հաշվարկներն ի՞նչ եղան»:

Արևիկ Սահակյան, «Մեդիա կենտրոն» ծրագրի միջոցառումների համակարգող

Հեղինակի հետ կապվելու համար գրեք  areviksahakyan@mail.ru հասցեին:

 

Տեսանյութ
Print Friendly and PDF
Այլ մամլո հաղորդագրություններ
«Ինչպե՞ս ստեղծել որակյալ սոցիալական ծառայություններ Հայաստանում և պայքարել աղքատության դեմ»
19.03.2019
12:00
Մարտի 19-ին «Մեդիա կենտրոնում» տեղի ունեցավ մամուլի ասուլիս` նվիրված Սոցիալական աշխատանքի համաշխարհային օրվան: Ասուլիսի թեման էր` «Ինչպե՞ս ստեղծել որակյալ սոցիալական ծառայություններ Հայաստանում և պայքարել աղքատության դեմ»:
«Մեդիա սպառումն ու ինֆորմացիոն նախասիրությունները Հայաստանում-2019» հետազոտության ներկայացում
15.03.2019
12:00
Մարտի 15-ին «Մեդիա կենտրոնում» տեղի ունեցավ «Մեդիա սպառումն ու ինֆորմացիոն նախասիրությունները Հայաստանում- 2019» հետազոտության արդյունքների ներկայացում:
Խաղաղության ընկալումը․ ԼՂ հակամարտության մոտեցումների վերլուծությունը
06.02.2019
12:00
ԼՂ հակամարտության հանգուցալուծմանը հասնելու միակ ճանապարհը խաղաղությանը նախապատրաստվելն է: Թեպետ հակամարտող հանրույթներում գերիշխում է պատերազմի պրոպագանդան, սակայն Հայաստանում, Լեռնային Ղարաբաղում եւ Ադրբեջանում մարդիկ սկսել են ավելի ու ավելի քննադատաբար մոտենալ հնարավոր պատերազմին: Հարցեր են հնչեցնում պատերազմի ու խաղաղության գնի մասին:
2017-2018թթ պետգնումների համակարգի մոնիտորինգի արդյունքները
28.12.2018
12:00
Դեկտեմբերի 28-ին «Մեդիա կենտրոնում» «Հանրային քաղաքականության հետազոտությունների ազգային կենտրոն» ՀԿ-ն ներկայացրեց 2017-2018թթ (I կիսամյակի) պետական գնումների համակարգի հիմնական միտումները։
Իրավապաշտպանների առաջարկները ՔԿՀ-ներում բարեփոխումների իրականացման ռազմավարության վերաբերյալ
27.12.2018
13:30
Արդարադատության նախարարության կողմից е-draft կայքում 2018 թ. դեկտեմբերի 19-ից հանրային քննարկման է դրվել քրեակատարողական համակարգում իրավիճակի բարելավման նպատակով 2018 -2038 թթ. ռազմավարությունը և դրա իրականացման 20 -ամյա միջոցառումների ծրագիրը հաստատելու մասին կառավարության որոշման նախագիծը։ Այն հանրային քննարկման է դրված լինելու մինչև 2019 թ. հունվարի 8-ը։
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ