Ընտրական օրենսգրքի շուրջ «4+4+4» ձևաչափի քննարկումների ամփոփում
20.04.2016
12:00
«Ընտրական օրենսգրքի շուրջ «4+4+4» ձևաչափով մի քանի հանդիպումները ցույց տվեցին, որ այն ձախողված է, քանի որ իշխանությունը անգամ ընդդիմության կողմից առաջարկների կոմպրոմիսային տարբերակի ներկայացումից հետո պատրաստ չէ գնալ զիջումների:

Եվ այնուամենայնիվ` եթե իշխանությունը գտնի քննարկումները շարունակելու տարբերակներ, մենք դուռը չենք փակում, պատրաստ ենք շարունակել»,-«Մեդիա կենտրոնում» երեկ տեղի ունեցած քննարկմանը հայտարարեց Աժ ՀԱԿ խմբակցության քարտուղար Արամ Մանուկյանը:
Նա նշեց, որ չնայած իշխանությունների ոչ կոնստրուկտիվ մոտեցմանը, իրենք շարունակելու են ԸՕ նախագծի արմատական բարեփոխմանն ուղղված իրենց ջաները` դա դիտելով Հայաստանի ժողովրդավարացման, ներքին կայունության ապահովման կարևորագույն միջոց:
«Մենք մեր տարբերակը ներկայացնելու ենք ԺՀՄԻԳ-ին, Վենետիկի հանձնաժողովին, քաղաքացիական հասարակության հետ միջոցառումներ ենք անցկացնելու մի քանի օրից, ամեն ինչ անելու ենք, շարունակելու ենք պայքարը»,- հավաստիացրեց Մանուկյանը` հավելելով, որ իշխանություններն օրերս երկրորդ անգամ են ԸՕ նախագիծը գաղտնի կերպով ուղարկել Վենետիկի հանձնաժողովին:
Այն հարցին, թե հնարավոր է նաեւ հանրահավաքային պայքար` ՀԱԿ խմբակցության քարտուղարը պատասխանեց. «Այս պահին մենք միտինգ չենք անի: Սահմանում լարված իրավիճակի հետ կապված՝ անգամ դրա մասին այս պահին մենք չենք մտածում»:
Քննարկմանը մասնակցող Աժ պետական-իրավական հարցերի մշտական հանձնաժողովի նախագահ Հովհաննես Սահակյանը կարծիք հայտնեց, որ 4+4+4 ձեւաչափով քննարկումները բավականին արդյունավետ էին և դրանց արդյունքները արտացոլված են փոփոխություններում:
«Օրինակ, մատները թանաքոտելու փոխարեն էլեկտրոնային մատնահետք վերցնելը ներառված է փոփոխությունների մեջ: Կամ ասում ենք՝ մենք ձեզ վստահում ենք, գնացեք մաքրեք ցուցակները, 6 ամիս Հայաստանից բացակայողների անունները հատուկ ազդանշնով կնշվի: Այո, ասում ենք ձեզ հետ չենք գա, քանի որ ձևաչափին միացած միայն 200 ՀԿ կա, նաեւ 12 կուսակցություն, որոնք ըստ օրենքի, պիտի ունենան նվազագույն թվով անդամներ, հսկայական ռեսուրս ունեք, գնացեք դա արեք»:
4+4+4 ձեւաչափում քաղհասարակության տեսակետը ներկայացնող Թրանսփարենսի ինտերնեյշնլ հակակոռուպցիոն կենտրոնի փոխտնօրեն Սոնա Այվազյանն էլ պատասխանելով «Մեդիա կենտրոնի» հարցին, արդյոք իշխանության կողմից ներկայացված զիջումները բավարար չէի՞ն, հնարավոր չէ՞ր դրանց հիմքի վրա ձեւավորել հետագա քննարկումները, ասաց. «Իշխանության ներկայացրած առաջարկները, մեր կարծիքով, բավարար չէին: Թեեւ երկու զիջում արվեց՝ մատնահետքերով քվեարկումը եւ ընտրողների ցուցակների ոչ պաշտոնական փաստաթղթով տրամադրումը, բայց մենք չենք կարող դա համարել բավարար: Այդ էլեկտրոնային համակարգը, դրա հիմնական նպատակը տարբեր ընտրական խախտումներին լուծում տալն է, ինչպես ներկայացնում են, բայց դա ընդամենը մեկ խնդիր է լուծում: Մասնագետները պնդում են, որ էլեկտրոնային համակարգն ավելի ոչ թափանցիկ եւ ոչ տեսանելի է դարձնում գործընթացը եւ դրա համար այն չի կարող ավելի վստահելի լինել: Այդ պատճառով զուտ մատնահետքերի գաղափարը չենք կարող առանձին վերցրած ընդունելի համարել: Ընտրացուցակների այդ տվյալների՝ համարների տալն էլ զիջում չէ, որովհետեւ այսօր էլ շատ լավ դիտորդները կարողանում են ունենալ այդ տվյալները: Դա մենք չենք կարող համարել առկա խնդիրների լուծմանն ուղղված բավարար զիջումներ, հանրային վստահությունը չի բարձրացել, մնացել են նույն կասկածները»:
Արձագանքելով էլեկտրոնային համակարգի ոչ վստահելի լինելու մասին պնդմանը` Հովհաննես Սահակյանը հիշեցրեց. «Էլեկտրոնային տեխնիկային չեք վստահում: Բայց ես ուզում եմ հիշեցնել, որ երբ նույնականացման քարտը շրջանառության մեջ դնելու հարցն էինք քննարկում հանրաքվեի ժամանակ, հենց ՀԱԿ ներկայացուցիչ Արամ Մանուկյանն Աժ ամբիոնից ցույց տալով համապատասխան սարքավորումն` ասաց՝ այս էլեկտրոնային մի փոքր սարքավորումն ի՞նչ է, որ չեք ներդնում, որ վերահսկվի: Հիմա մի փոքր սարք չենք դնում, մի ամբողջ համակարգ ենք դնում: Եթե այստեղ էլ են դեմ, պետությունը չի կարող չհիմնավորված չվստահել էլեկտրոնային համակարգերին»:
Արամ Մանուկյանն ի պատասխան նշեց. «Եթե բոլորն ունենային նույնականացման քարտեր ու բոլորն այդպես քվեարկեին՝ լավ կլիներ: Մենք գրել ենք՝ եթե դուք գալիս եք համաձայնության ցուցակները մաքրելու, ցուցակները հրապարակելու, մենք պատրաստ ենք միասին ստորագրել՝ ձեր էլեկտրոնային գրանցման համակարգը ներառելու համար: Սա շատ կոնստրուկտիվ է: Բայց իշխանությունը որակական առումով չի գալիս ընդառաջ»:
Քննարկման ավարտին Արամ Մանուկյանը շեշտեց, որ ներկայիս պատերազմական վիճակում իշխանությունն ուղղակի պարտավոր է այլ մոտեցում ցուցաբերել. «Իշխանությունները դեռեւս շանս ունեն, ժամանակ ունեն, որ իրենց իսկ վիճակն ամրապնդելու համար գնան հասարակությանն ընդառաջ՝ վստահությունը բարձրացնելու: Այլ կերպ հասարակության մեջ նորմալ իրավիճակ հնարավոր չէ ստեղծել: Չեն գնա այդ քայլին՝ մեղքը իրենց վիզը»:
Հովհաննես Սահակյանը տեղեկացրեց, որ ԸՕ փոփոխությունների ենթարկված նախագիծը ուրբաթ օրը քննարկման կդրվի ԱԺ պետական-իրավական հարցերի մշտական հանձնաժողովում:

Արևիկ Սահակյան, «Մեդիա կենտրոն» ծրագրի համակարգող:
Հեղինակի հետ կապվելու համար գրեք areviksahakyan@mail.ruհասցեին:

 

 

Տեսանյութ
Print Friendly and PDF
Այլ մամլո հաղորդագրություններ
«Հայաստան- ԵՄ համապարփակ և ընդլայնված գործընկերության համաձայնագիր․ հեռանկարներ ու հնարավորություններ»
17.10.2017
13:00
Հոկտեմբերի 17-ին «Մեդիա կենտրոնում» (Սարյան 12, 3-րդ հարկ) տեղի ունեցավ քննարկում «Հայաստան- ԵՄ համապարփակ և ընդլայնված գործընկերության համաձայնագիր․ հեռանկարներ ու հնարավորություններ» թեմայով:
«Սարգսյան-Ալիև ժնևյան հանդիպում. գնահատականներ ու կանխատեսումներ»
17.10.2017
11:00
Հոկտեմբերի 17-ին «Մեդիա կենտրոնում» (Սարյան 12, 3-րդ հարկ) տեղի ունեցավ քննարկում «Սարգսյան Ալիև ժնևյան հանդիպում. գնահատականներ ու կանխատեսումներ» թեմայով:
Ֆիլմի դիտում. Նորաձևությունը կփրկի՞ մոլորակը
16.10.2017
16:00
Հոկտեմբերի 16-ին Արևորդի 7-րդ միջազգային բնապահպանական փառատոնի շրջանակում տեղի ունեցավ «Նորաձևությունը կփրկի՞ մոլորակը» ֆիլմի դիտում Մեդիա կենտրոնում (հասցե` Սարյան 12, 3-րդ հարկ):
Ֆիլմի դիտում. Կոկոթա․ հույսի կղզյակը
16.10.2017
15:00
Հոկտեմբերի 16-ին Արևորդի 7-րդ միջազգային բնապահպանական փառատոնի շրջանակում տեղի ունեցավ «Կոկոթա. հույսի կղզյակը» ֆիլմի դիտում Մեդիա կենտրոնում (հասցե` Սարյան 12, 3-րդ հարկ):
Ընտանեկան բռնության դեմ օրենք. կանխարգելմա՞ն, թե՞ նոր վտանգներ պարունակող գործիք
13.10.2017
19:30
Հոկտեմբերի 13-ին,«Մեդիա կենտրոնի» նախաձեռնությամբ «Ա1պլյուսի» հեռուստատաղավարում առցանց ուղիղ հեռարձակմամբ անցկացվեց բանավեճ «Ընտանեկան բռնությանդեմ օրենք. կանխարգելմա՞ն, թե՞ նոր վտանգներ պարունակող գործիք» թեմայով:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ