Նոր օրենսդրական կարգավորումները կլուծե՞ն արդյոք Երևանի քաղաքաշինական խնդիրները
30.03.2016
18:49
Վերջին երկու տասնամյակում Երևանի կենտրոնում իրականացվող լայնածավալ կառուցապատման աշխատանքների հետևանքով լուրջ խնդիրներ են առաջ եկել քաղաքաշինության ոլորտում՝ մասնավորապես պատմամշակութային արժեք ներկայացնող հին շենքերի ոչնչացումը, նորակառույցների խիտ դասավորվածությունը հին բնակելի շենքերի արանքում և բազմաբնակարան շենքերին կցակառույցների ավելացումը, որն էլ իր հերթին առաջ է բերում սեյսմիկ անվտանգության նորմերի պահպանության հարցը:

Այսօր այս հարցերի շուրջ «Մեդիա կենտրոնում» տեղի ունեցավ քննարկում, որը կազմակերպել էր Պատերազմի և խաղաղության լուսաբանման ինստիտուտի հայաստանյան գրասենյակը Հանրային լրագրության ակումբի հետ համատեղ:

Քննարկմանը մասնակցում էին ՀՀ Ճարտարապետների միության նախագահ Մկրտիչ Մինասյանը, Հայնախագիծ ճարտարապետական արվեստանոցի ղեկավար, վաստակավոր ճարտարապետ Սաշուր Քալաշյանը, ՀՀ ԱԻՆ «Սեյսմիկ պաշտպանության ծառայություն» գործակալության շենքերի և շինությունների սեյսմակայունության բաժնի պետ Արմեն Արտոնյանը ևՀՀ Քաղաքաշինության նախարարի խորհրդական Ալեքսանդր Մովսիսյանը:

«Երեւանի կենտրոնը խիստ ծանրաբեռնված է եւ այլեւս կառուցապատման տեղ չկա: Այս հախուռն շինարարությունը բերեց նրան, որ մենք մի կողմից զրկվեցինք պատմական շենքերից, մյուս կողմից՝ խիտ կառուցապատում ունեցանք, որտեղ նաեւ օկուպացիա արեցինք հանրային կանաչ տարածքները, քաղաքից վերցրեցինք յուրաքանչյուր քառակուսի մետր»,-ասաց Ճարտարապետների միության նախագահ Մկրտիչ Մինասյանը:

Ազգային վիճակագրական ծառայության տրամադրած տվյալների համաձայն, 2005-2015թթ. Երեւանում կառուցված միայն բնակելի տարածքների ընդհանուր մակերեսը կազմում է ավելի քան 2 միլիոն 656 հազար քառակուսի մետր, ինչը գրեթե վեց անգամ գերազանցում է նորանկախ Հայաստանի 1991-2004թթ. ժամանակահատավածի ցուցանիշը:

Մինասյանը հավելեց, որ սեյսմիկ անվտանգության տեսանկյունից նոր  կառուցված շենքները վտանգ չեն ներկայացնում:

Սաշուր Քալաշյանն էլ ասաց, որ ներկայիս սեյսմիկ պահանջներին չեն համապատասխանում խորհրդային տարիներից մեզ ժառանգություն հասած շենքերը:

Այդ շենքերը կառուցված են եղել մինչեւ 7 բալ սեյսմակայունությամբ, մինչդեռ ներկայումս նորմատիվը փոխված է, եւ պահանջվող նորմատիվը հասել է 9-ը և ավելի բալի:

«Անկախացման տարիներին համատարած սեփականաշնորհում գնաց եւ շենքերի նկուղային հարկերը վաճառվեցին, օգտագործվեցին հանրային կամ այլ նպատակների համար, որի ընթացքում կոնստրուկտիվ համակարգին մեծ վնաս հասցվեց: Վերնահարկերի կառուցման տենդենցն ավելի վատթարացրեց իրավիճակը»,-նշեց Քալաշյանը:

Հայաստանի ողջ տարածքը գտնվում է սեյսմիկ ակտիվ գոտում եւ Երեւանն այս առումով բացառություն չէ: Արտակարգ իրավիճակների նախարարության տվյալներով, մայրաքաղաքի շուրջ 4800 բարձրահարկ շենքերի 80%-ը չի համապատասխանում Հայաստանում գործող սեյսմիկ անվտանգության պահանջներին: 

ՀՀ Քաղաքաշինության նախարարի խորհրդական Ալեքսանդր Մովսիսյանը նշեց, որ իրենք հաշվարկել են եւ պարզել, որ հին շենքերն ուժեղացնելու և ներկայիս նորմերին համապատասխանեցնելու համար 30-31 միլիարդ դոլար է անհրաժեշտ:

«Բացի դա, Հայաստանում վթարային 26 բազմաբնակարան շենք կա, որոնք պետք է քանդվեն եւ նորերը կառուցվեն: Եվ կա 458 անբավարար տեխնիկական վիճակում գտնվող շենք, որոնք պետք է ուժեղացվի, բերվի ներկայիս նորմերի պահանջներին:  Այդ ամենի համար անհրաժեշտ է 361 մլրդ դրամ, որպեսզի լրիվ վթարային ֆոնդը վերացվի: Ֆինանսական լուրջ ներդրումներ են պետք»,-ասաց Մովսիսյանը:

Նա չհերքեց նաև, որ ներկայիս կառուցապատումները շատ հաճախ խախտումներով են ընթանում:

«Հաշվի առնելով այն, որ այդ խախտումները հիմնականում տեղի են ունենում կենտրոնում, նախարարության կողմից մշակվել է օրենք «Երեւանի կենտրոնի մասին», որն արդեն ներկայացվել է Ազգային Ժողով: Օրենքը լուրջ սահմանափակումներ է բերում կառուցապատման վերաբերյալ, որպեսզի այդ խախտումները չլինեն»,-նշեց նա՝ հավելելով, որ քաղաքաշինության նախարարությունը ցանկանում է վերականգնել նաև նախագծերի պետական փորձաքննության ինստիտուտը:

Նրա խոսքով՝ փոփոխություններ են կատարվում նաև «Բազմաբնակարան շենքերի մասին» օրենքում:

ՀՀ ԱԻՆ «Սեյսմիկ պաշտպանության ծառայություն» գործակալության շենքերի և շինությունների սեյսմակայունության բաժնի պետ Արմեն Արտոնյանն ասաց, որ շենքի վերաբերյալ կարծիք եզրակացութուն տալու վերաբերյալ պարտադիր անհրաժեշտ է իրականցնել հետազոտություն, դիտողական, դիտողագործիքային հետազոտություն, որի արդյունքում պարզ կլինի շենքի վնասվածության աստիճանը:

Քննարկմանը վերջում բանախոսները միաձայն նշեցին, որ եթե նոր օրենսդրական կարգավորումները ուժի մեջ մտնեն ու իրապես գործեն, վերահսկողական մեխանիզմներն էլ ընդլայնվեն և ուժեղանան, ապա հնարավոր է իրավիճակը փոխվի դեպի դրականը:

Լիլիթ Առաքելյան, «Մեդիա կենտրոն» ծրագրի խմբագիր-համակարգող:

Հեղինակի հետ կապվելու համար գրեք [email protected] հասցեին:

Տեսանյութ
Print Friendly and PDF
Այլ մամլո հաղորդագրություններ
«Անցումային արդարադատության իրականացման մեխանիզմները Հայաստանում»
23.05.2019
15:00
Մեդիա կենտրոն, Երևան: Մայիսի 23-ին Երևանի պետական համալսարանի Պալեանների անվան դահլիճում «Մեդիա կենտրոնը»-ը անցկացրեց քննարկում «Անցումային արդարադատության իրականացման մեխանիզմները Հայաստանում» թեմայով:
Ազգային անվտանգության ծառայության գործառույթներն ու լիազորությունների շրջանակը
22.05.2019
11:00
Մեդիա կենտրոն, Երևան: Մայիսի 22-ին «Մեդիա կենտրոնում» տեղի ունեցավ քննարկում «Ազգային անվտանգության ծառայության գործառույթներն ու լիազորությունների շրջանակը» թեմայով:
«Դիտորդների խմբի գործունեության խոչընդոտները և քրեակատարողական հիմնարկներում մարդու իրավունքների խախտումների խնդիրները 2018-2019թթ.-ին»
21.05.2019
11:00
Մեդիա կենտրոն, Երևան: Մայիսի 21-ին ժամը 11:00-ին Մեդիա կենտրոնում տեղի ունեցավ մամուլի ասուլիս՝ «Դիտորդների խմբի գործունեության խոչընդոտները և քրեակատարողական հիմնարկներում մարդու իրավունքների խախտումների խնդիրները 2018-2019թթ.-ին» թեմայով
Ռոբերտ Քոչարյանի հայտարարությունները սուտ են, նա կխուսափի՞ քննությունից․ քննարկում Մեդիա կենտրոնում
20.05.2019
10:00
Մեդիա կենտրոն, Երևան: Մայիսի 20-ին Մեդիա կենտրոնում տեղի ունեցավ «Ռոբերտ Քոչարյանն ազատվեց կալանքից. դատական իշխանության անկախությու՞ն, թե՞ դատական համակարգի հին արատներ» թեմայով քննարկում։
«Բռնությունը ընտանիքում. իրազեկման բացը կրթական ծրագրերում և օրենսդրական փոփոխությունների անհրաժեշտությունը»
15.05.2019
12:00
Մեդիա կենտրոն, Երևան: Մայիսի 15-ին, ժամը 12:00-ին «Մեդիա կենտրոնում» տեղի ունեցավ քննարկում` նվիրված Ընտանիքի միջազգային օրվան: Քննարկման թեման էր՝ «Բռնությունը ընտանիքում. իրազեկման բացը կրթական ծրագրերում և օրենսդրական փոփոխությունների անհրաժեշտությունը»:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ