Հայաստանում կոռուպցիայի դեմ պայքարն էական արդյունքներ չի տալիս
27.01.2016
11:00
Կոռուպցիայի ընկալման համաթիվը Հայաստանում, ըստ «Թրանսփարանսի ինթերնեյշնլ» միջազգային հակակոռուպցիոն կազմակերպության, անցյալ տարի, գրեթե չի փոխվել, և արդեն 13 տարի շարունակ հստակ նվազման միտումներ չի դրսևորում՝ չնայած ստեղծվող տարբեր հակակոռոպցիոն կառույցների և ընդունված համապատասխան ռազմավարության: Այդ մասին «Մեդիա կենտրոնում» հունվարի 27-ին կայացած մամլո ասուլիսին հայտարարեց Թրանսփարենսի Ինթերնեշնլ հակակոռուպցիոն կենտրոնի ղեկավար Վարուժան Հոկտանյանը:

Հոկտանյանը, ով ասուլիսին ներկայացրեց «Թրանսփարենսի Ինթերնեշնլ» կազմակերպության հրապարակած նոր զեկույցը և Հայաստանի տեղ այդ փաստաթղթում ըստ կոռուպցիայի ընկալման համաթվի, ասաց, որ աշխարհի մոտավորապես 2/3 երկրներում կոռուպցիան շարունակում է մնալ լուրջ հիմնախնդրի: Այսինքն՝ կոռուպցիայի ընկալման համաթիվը 50-ից ներքև է:

Կոռուպցիայի ընկալման համաթվի սանդղակը 0-100: Եթե այդ սանդղակում ընդգրկված երկրների համաթիվն ավելի մոտ է 0-ին, ապա այն ավելի կոռումպացված է, և հակառակը: «Ըստ այդ սանդղակի՝ ամենամաքուր երկիրը Դանիան է, որտեղ կոռուպցիայի ընկալման համաթիվը 91 է: Նրան հաջորդում են Նորվեգիան, Նոր Զելանդիան և Նիդեռլանդները», - նշեց Հոկտանյանը:

Զեկույցում վատագույն տեղերն են զբաղեցրել Սոմալին և Հյուսիսային կորեան, որոնց ցուցանիշը 8 է: «Նույն տեղերում են նաև Աղվանստանը, Սուդանը, և Անգոլան: Բոլոր այս երկրներում կան նաև կոնֆլիկտային իրավիճակներ», - հիշեցրեց նա:

Համաձայն հրապարակված հետազոտության, անցյալ տարի կոռուպցայի դեմ պայքարում բարելավել են իրենց դիրքերը Գվատեմալան, Շրի Լանկան և Գանան: Զիջել իրենց դիրքերը Բրազիլիա՝ 5 միավոր նահանջ և Թուրքիան:

Կոռուպցիայի ընկալման Հայաստանի համաթիվը 35 է, նախորդ տարվա 37-ի դիմաց: Ըստ Հոկտանյանի, Հայաստանի համաթիվը, կարելի է ասել, չի փոխվել, քանի որ երկու միավորը տեղավորվում է վիճակագրական թույլատրելի սխալի սահմաններում: «Հայաստանի մասով հաշվարկը 6 աղբյուրների տվյալների հիման վրա էր կատարվում: Սակայն այս տարի 5 աղբյուր է օգտագործվել: Այս տարի դուրս է եկել Համաշխարհային բանկը, որի տվյալները միշտ եղել են բարեհաճ Հայաստանի համար», - պարզաբանեց բանախոսը:

Նա 35 ցուցանիշը չի համարում հետընթաց, քանի որ սովորաբար համարվում է առաջընթաց կամ հետընթաց, եթե 3 կամ ավելի կետով է փոխվում ընկալման համաթիվը: «Կարելի է եզրակացնել, որ սկսած 2003 թվականից մեզ մոտ որևէ փոփոխություն` ոչ առաջընթաց, ոչ հետընթաց չի տեղի ունենում», - ասաց նա:

Դիտարկելով Հայաստանի տվյալները տարածաշրջանային և հետխորհրդային երկրների համատեքստում՝ Հոկտանյանը նկատեց, Հարավային Կովկասում առաջատար դիրքեր է զբաղեցնում Վրաստանը 52 համաթվով: «Սակայն Վրաստանն արդեն 2-3 տարի դոփում է նույն տեղում: Ադրբեջանի համաթիվը 29 է, Իրանի ցուցանիշը 27: Նախկին կոմունիստական երկրների թվում առաջատար դիրքեր է զբաղեցնում Էստոնիան, այնուհետև Լատվիան և Լիտվան», - ասաց Թրանսփարենսի Ինթերնեշնլ հակակոռուպցիոն կենտրոնի ղեկավարը՝ հավելելով, որ հետխորհրդային երկների թվում Հայաստանը զիջում է միայն Բալթյան պետություններին և Վրաստանին: «Հայաստանին զիջում են նաև Մոլդովան, Ուկրաինան, Ռուսաստանը և Բելառուսը», - ասաց նա:     

Հայաստանը «Թրանսփարենսի Ինթերնեշնլ» կազմակերպության վարկանշային սանդղակում 95-98-րդ տեղերը կիսում է Մալիի, Մեքսիկայի և Ֆիլիպինների հետ: «Հայաստանը, իհարկե, այս սանդղակում զիջում է Եվրամիության երկրներին, սակայն առավելություններ ունի Եվրասիական տնտեսական միության պետությունների շրջանում», - նշեց Վարուժան Հոկտանյանը:

Ըստ նրա, Հայաստանի ցուցանիշը խոսում է այն մասին, որ այն կոռուպցիան խանգարում է քաղաքական և տնտեսական համակարգերի բնականոն և արդյունավետ աշխատաքին: «Ակադեմիական հետազոտությունները ցույց են տալիս, որ այն երկրները, որտեղ համաթիվը 50-ից ցածր է, լուրջ հիմնախնդիրներ ունի: Այնտեղ կոռուպցիան խոչընդոտում է տնտեսական և քաղաքական համակարգի աշխատանքին», - հայտարարեց նա:  

Հայաստանում կոռուպցիայի նվազեցման համար, կարծում է Հոկտանյանը, անհրաժեշտ է երկու գործոն՝ քաղաքական կամք և հասարակական ճնշում: Միանշանակ չի կարելի պնդել, որ կոռոպցիայի դեմ պայքարը պետք է սկսել ներքևից:

«Մենք ունենք Ուկրաինայի օրինակը, որտեղ փոփոխություններ են եղել, սակայն կոռուպցիայի ընկալման համաթիվը 27 է կազմում: Այն բավականին զիջում է Հայաստանին: Սակայն որոշ երկրներում իշխանափոխությունը բերել է կոռուպցիայի նվազեցման, հենց նույն Վրաստանում: Պետք է լինի ճնշում ներքևից և քաղաքական կամք վերևից», - պարզաբանեց նա՝ հավելելով, որ կառավարման ոչ ֆորմալ ինստիտուտների գերիշխման պարագայում, որն առկա է Հայաստանում, որքան էլ ստեղծվեն հակակոռուպցիոն կառույցներ, դժվար է խոսել կոռուպցիայի դեմ արդյունավետ պայքարի մասին:

«Հայաստանի քաղաքական և տնտեսական կայանքում անհրաժեշտ է իրականացնել դեմենեպոլիզացիա: Տնտեսական մենաշնորհը բերում է նաև քաղաքական մենաշնորհի: Մյուս խնդիրը քաղաքական և գործարար վերնախավերի սերտաճումն է: Խնդիր է նաև դատական համակարգի ոչ անկախ լինելը», - նշեց Հոկտանյանը:

Նրա խոսքով, շարքային քաղաքացիների ընկալումները բավականին տխուր արդյունք են տալիս Հայաստանի համար:

«Հասարակության մեջ կա շատ խոր անտարբերություն: Հայաստանը վերջին տեղերն է զբաղեցնում կոռուպցիայի դեմ պայքարում հասարակության ներգրավվածության ցուցանիշով: Գվատեմալան Հայաստանից առավել կոռումպացված է, բայց այդ երկրներում հասարակությունը փորձում է որոշակի քայլեր կատարել: 2013 թվականի տվյալներով այն հարցին, թե կուզեք ներգրավվել կոռուպցիայի դեմ պայքարում, Հայաստանի հասարակության կեսից ավելին ասել է՝ ոչ: Հարցված 108 երկրների մեջ միակ երկիրն է: Այսինքն՝ կա քաղաքական կամքի պակաս և ներքևում՝ հիասթափություն», - եզրափակեց նա:

Արշալույս Մղդեսյան, «Մեդիա կենտրոն» ծրագրի համակարգող-խմբագիր

Հեղինակի հետ կապվելու համար գրեք arshaluismghdesyan@pjc.am  հասցեին:

 

    

Տեսանյութ
Print Friendly and PDF
Այլ մամլո հաղորդագրություններ
Հանել դպրոցից «Հայոց եկեղեցու պատմություն» առարկան կամ վերախմբագրել դասագրքերը. թեժ բանավեճ
17.10.2018
12:00
Հոկտեմբերի 17-ին «Մեդիա կենտրոնում» տեղի ունեցավ քննարկում «Հայոց եկեղեցու պատմություն» առարկան. անհրաժեշտություն, թե քարոզ» թեմայով:
«Հայաստանում ծնելիության մակարդակը նվազել է». ՄԱԿ-ի 2018թ. զեկույց
17.10.2018
11:00
ՀՀ բնակչությունը 2018թ. առաջին եռամսյակից սկսած նվազել է 10.000 մարդով:
Այս մասին հոկտեմբերի 17-ին Մեդիա կենտրոնում տեղի ունեցած մամլո ասուլիսին հայտարարեց ՄԱԿ-ի Բնակչության հիմնադրամի «Օժանդակություն բնակչության հարցերով քաղաքականությունների իրականացմանը» ծրագրի համակարգող Աննա Հովհաննիսյանը:
Օգտատերերի 97 տոկոսը կողմ է արտահերթ ընտրություններին
16.10.2018
11:24
Արտահերթ խորհրդարանական ընտրություններ անցկացնելու վերաբերյալ ֆեյսբուքյան հարցման արդյունքներով օգտատերերի 90 տոկոսից ավելին ցանկանում են, որ արտահերթ ընտրությունները տեղի ունենան սույն թվականի դեկտեմբերին։
«Արդարությունն ինձ համար մեծագույն արժեք է». Էրիկ Բաբաջանյան՝ ուսանող, կինոօպերատոր
15.10.2018
11:59
Մեդիա կենտրոն նախագիծը սկսում է պատմությունների շարք, որտեղ ներկայացնելու ենք իրենց ոտնահարված իրավունքները վերականգնած և հիմնարար ազատությունների համար պայքարած մարդկանց:
Հայաստանում հոգեբուժական կենտրոնները վերակազմավորելու անհրաժեշտություն կա
10.10.2018
13:00
Հայաստանում, ըստ 2017 թ. պաշտոնական տվյալների, կա 52 հազար հոգեկան առողջության խնդիր ունեցող անձ, որը 3 տոկոս ավելի է համեմատած 2016 թ. տվյալների հետ:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ