Սահմանադրական հանրաքվեն և հետընտրական զարգացումները՝ ըստ քաղտեխնոլոգների
10.12.2015
11:00
Երեկ «Մեդիա կենտրոնում» տեղի ունեցավ քննարկում «Սահմանադրական հանրաքվեն և հետընտրական զարգացումները՝ ըստ քաղտեխնոլոգների» թեմայով, որին մասնակցում էին քաղտեխնոլոգներ Արմեն Բադալյանն ու Վիգեն Հակոբյանը և քաղաքական վերլուծաբան Արմեն Բաղդասարյանը:

«Ընդդիմությունն ամեն ինչ  արել է շատ ճիշտ, ընդդիմությունը ոչ մի սխալ չի թույլ տվել, դրա համար էլ փայլուն հաջողություններ  է արձանագրել  թվերի տեսքով:  Չունենալով որեւէ ռեսուրս, այդ սուղ միջոցներով քարոզչություն անելով` ազգաբնակչության  մեծամասնությանը  ընդդիմությունը կարողացել է համոզել, որպեսզի գնան եւ ոչ ասեն: Չունենալով մեծ լծակներ` որոշ տեղերում կարողացել է պահել այդ «ոչ»-ը, որոշ տեղերում` չի կարողացել: Ոստի` սա ընդիմության պարտությունը չէ, սա իշխանությունների պարտությունն է, որովհետեւ իշխանություններն ունենալով  անսահմանափակ ռեսուրսներ`  եւ ֆինանսական, եւ ադմինիստրատիվ, եւ թաղային, այնուամենայնիվ, չկարողացան  այդ գործը գլուխ բերել առանց կեղծիքների: Այ սա իրենց պարտությունն է: Որովհետեւ եթե իրենք մի քիչ ավելի շնորհքով աշխատեին, պարզ ասած` խոսելու տեղ ունենային ժողովրդի առաջ, հանգիստ կապահովեին իրենց «այո»-ն առանց խախտումների: Գործնականում, իհարկե, նրանք այդ այո-ն արձանագրեցին, բայց սա իրենց շատ մեծ պարտությունն էր եւ նրանք շատ մեծ վարկանիշային անկում ունեցան»,-ասաց Արմեն Բաղդասարյանը:

«Այսօր հասարակությունն ունի այնքան ուժ, որ իշխանություններին ասի «ոչ», սակայն ցավոք, չունի այնքան ուժ` որ կարողանա այդ «ոչ»-ը պահել: Սա է այս հանրաքվեի հիմնական արդյունքը»,- կարծիք հայտնեց  քաղտեխնոլոգ Արմեն Բադալյանը` հավելելով, որ այդ ոչ-ը պահելու համար անհրաժեշտ է, որ լինի այնպիսի քաղաքական ուժ, որը կարողանա բոլոր ընտրատեղամասերում ունենալ համապատասխան ռեսուրս`  ձայները պահելու համար, եւ որ առավել կարեւոր է` ունենա արտաքին քաղաքական կենտրոնների աջակցությունը:

«Այդ ուժը պետք է ունենա Ռուսաստանի կամ Արեւմուտքի քաղաքական աջակցությունը, որն իշխանություններին կարգելի դիմել նման կեղտոտ տեխնոլոգիաների: Որովհետեւ մի բան պետք է փաստենք. այն տեղամասերում, որտեղ ընդդիմությունը կարողացել է քվեները պահել, այնտեղ «ոչ»-ը դե յուրե հաղթել է, իսկ այն տեղամասերում, որտեղ տարբեր օբյեկտիվ պատճառներով ընդդիմությանը չի հաջողվել այդ ձայները պահել, «ոչ»-ը փոխվել է «այո»-ի»,- նշեց Բադալյանը:

Իսկ քաղտեխնոլոգ Վիգեն Հակոբյանն էլ նկատեց, որ որեւէ համապետական ընտրությունների, այդ թվում եւ` հանրաքվեի ժամանակ ընտրատեղամասում արտացոլվում է այն պատկերը, որն այդ պահին առկա է փողոցում, եւ այդ առումով ստացված արդյունքները  միանգամայն համահունչ են:

«Դե յուրե արձանագրված «այո»-ն այդ իմաստով միանգամայն արտացոլում է առկա իրավիճակը, քանի որ այս փուլում իշխանությունների վրա փողոցից, Ազատության հրապարակից  մեծ ճնշում չկար: Եվ գուցե սրա պատճառը նաեւ այն է, որ այս փուլում չկար ընդգծված, խարիզմատիկ լիդեր: Բոլոր մեր համապետական ընտրությունները ցույց են տվել, որ երբ չկա ընդգծված եւ ընդունված առաջնորդ, հաղթանակի շանսերը եղել են զրոյական: Եվ այս առումով առավել ցցուն երեւաց քաղաքական դաշտում սերնդափոխության անհրաժեշտությունը»,-ասաց Վիգեն Հակոբյանը:

Արձագանքելով հարցին, արդյոք Լեւոն Տեր-Պետրոսյանի մասնակցությունը կարող էր պատկերը փոխել` քաղտեխնոլոգը նկատեց, որ հաշվի առնելով ռեսուրսները` արդյունքը կլիներ նույն, թեեւ` պայքարի որակը այլ կլիներ: Վիգեն Հակոբյանը, ի տարբերություն Արմեն ԲԱղդասարյանի, ընդգծեց, որ գրանցված արդյունքի վրա  որոշակի ազդեցություն ունեցան նաեւ ընդդիմության տարբեր թեւերի կողմից հանրությանն ուղղված տրամագծորեն տարբեր կոչերը` կապված հանրաքվեին մասնակցելու եւ ոչ ասելու, եւ առհասարակ տեղամաս չգնալու եւ գործընթացը չլեգիտիմացնելու հետ:

 Իսկ ահա Արմեն Բադալյանը կարծիք հայտնեց, որ  նման ազդեցություն չի եղել, քանի որ «ոչ»-ի դաշտի ուժերը այնքան ցածր վարկանիշ ունեն, որ նրանց արած որեւէ կոչ վճռորոշ նշանակություն չէր կարող ունենալ:

Արևիկ Սահակյան, «Մեդիա կենտրոն» ծրագրի քննարկումների համակարգող:

Հեղինակի հետ կապվելու համար գրեք  areviksahakyan@mail.ru հասցեին:     

Տեսանյութ
Print Friendly and PDF
Այլ մամլո հաղորդագրություններ
«Վարորդներին որոշ խախտումների դեպքում չտուգանելու և տուգանքների համաներման հնարավոր ազդեցությունն ու հետևանքները»
24.05.2018
11:00
ՀՀ ոստիկանությունը մայիսի 23-ից փոփոխություն է իրականացնում ճանապարհային երթևեկության կանոնների խախտումներով վարչական պատասխանատվության քաղաքականության մեջ:
«Գործարկվում է «Տվյալների պաշտպանության ընդհանուր կարգավորում»-ը. ինչպիսի՞ փոփոխություններ են սպասվում»
23.05.2018
12:00
Մայիսի 23-ին «Մեդիա կենտրոնում» տեղի ունեցավ քննարկում «Գործարկվում է «Տվյալների պաշտպանության ընդհանուր կարգավորում»-ը. ինչպիսի՞ փոփոխություններ են սպասվում» թեմայով:

«Բնապահպանության խնդիրներն ու ռիսկերը. առաջարկներ ուղղված նոր կառավարությանը»
22.05.2018
11:00
Բնապահպանության ոլորտում առկա խնդիրների, լուծումների և նոր կառավարությանն ուղղված իրենց առաջարկների մասին մայիսի 22-ին Մեդիա կենտրոնում տեղի ունեցած քննարկմանը բարձրաձայնեցին բնապահպանները:
Հեռարձակվող ԶԼՄ-ների գործունեության և մեդիա ոլորտում բարեփախումների անհրաժեշտություն. Առաջարկներ ուղղված նոր կառավարությանը
21.05.2018
13:00
Հեռարձակվող ԶԼՄ-ների գործունեության և մեդիա ոլորտում բարեփոխումների անհրաժեշտության վերաբերյալ մայիսի 21-ին Մեդիա կենտրոնում տեղի ունեցավ քննարկում, որին մասնակցում էին Երևանի մամուլի ակումբի նախագահ Բորիս Նավասարդյանը, Խոսքի ազատության պաշտպանության կոմիտեի նախագահ Աշոտ Մելիքյանը և ՀՀ Հեռուստատեսության և ռադիոյի հանձնաժողովի անդամ Արմեն Մկրտչյանը:
«Այլընտրանքային հանրակրթության աջակիցների միության» ստեղծման ազդարարում
21.05.2018
12:00
Մայիսի 21-ին «Մեդիա Կենտրոնում» տեղի ունեցավ ասուլիս, որի ընթացքում ՀՀ կրթական ոլորտի ներկայացուցիչները ազդարարեցին «Այլընտրանքային հանրակրթության աջակիցների միության» ստեղծման մասին, կներկայացնեն ձևավորված միության կազմը, նպատակներն ու գործառույթները։
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ