Հանրաքվեի արդյունքները ոչ լեգիտիմ են. «Քաղաքացի-դիտորդի» և EPDE-ի գնահատականը
07.12.2015
11:00
«Քաղաքացի-դիտորդ» նախաձեռնության անդամների և Դեմոկրատական ընտրությունների եվրոպական պլատֆորմի ներկայացուցիչների գնահատմամբ՝ դեկտեմբերի 6-ի սահմանադրական հանրաքվեի արդյունքները լեգիտիմ չեն:

Այսօր «Մեդիա կենտրոնում» տեղի ունեցած ասուլիսին հանրաքվեի ընթացքին և արդյունքներին անդրադարձան  Տիգրան Եգորյանը, «Իրավունքի Եվրոպա» միավորում, Արթուր Սաքունցը, Հելսինկյան քաղաքացիական ասամբլեայի Վանաձորի գրասենյակի ղեկավար, Լենե Վեթելանդը, Նորվեգական հելսինկյան կոմիտե, EPDE, Նորվեգիա, Սերգեյ Տկաչենկոն, EPDE-ի փորձագետ, Ընտրողների կոմիտե, Ուկրաինա, Ռոման Ուդոտը, EPDE-ի փորձագետ, Ընտրական իրավունքի պաշտպանության «Գոլոս» ընկերակցություն, Ռուսաստան և Վարդինե Գրիգորյանը, Վանաձորի ՀՔԱ գրասենյակ:

«Ես չեմ հավատում և համարում եմ սուտ ԿԸՀ-ի կողմից հրապարակված տվյալները, դրանք իրականության հետ որևէ աղերս չունեցող տվյալներ են, որոնք ուղղակի համարում եմ նկարված: Երեկվա հանրաքվեի քվեարկության ընթացքում եղել են լցոնումներ, դիտորդների նկատմամբ աննախադեպ ճնշումներ, բացակա ընտրողների փոխարեն քվեարկություններ, լրագրողների նկատմամբ ճնշումներ, քաղաքացիների նկատմամբ ուղղորդված տեղափոխում տեղամասից տեղամաս: Դրանք այն հիմնական խախտումներ էին, որոնք մենք արձանագրեցինք»,-ասաց Սաքունցը:

Նշենք, որ ըստ Կենտրոնական ընտրական հանձնաժողովի ներկայացրած Սահմանադրական փոփոխությունների հանրաքվեի առաջին արդյունքների՝
1997 ընտրատեղամասի քվեաթերթիկներով սահմանադրական փոփոխություններին «այո» է քվեարկել 825 622 (կամ 63.35%-ը) մարդ, իսկ «ոչ»՝ 421 593 -ը (32.35%)։

Հիշեցնենք, որ ԿԸՀ տվյալներով՝ քվեարկության մասնակցել է 1,296,368 ՀՀ քաղաքացի կամ ընտրողների 50.51%-ը։

«Սերժ Սարգսյանի համար Սահմանադրական փոփոխությունների հանրաքվեն այն նույն կարեւորությունն ուներ, ինչ նախագահական ընտրությունները»,-ասաց Սաքունցը և հավելեց, որ իրենք ընտրախախտումների մի քանի դեպքով արդեն քրեական հաղորդում են ներկայացրել, մասնավորապես, երբ բացակա անձանց փոխարեն ուրիշներն են քվեարկել:

Դեմոկրատական ընտրությունների եվրոպական պլատֆորմի (EPDE) ներկայացուցիչ Լենե Վեթելանդն էլ շեշտեց, որ դիտորդների նկատմամբ ֆիզիկական բռնություն է գործադրվել երեկ ողջ օրվա ընթացքում:

«Ուստի գտնում ենք, որ ընտրախախտումներով և հանցագործությունների մեծ թվով, ընտրողների ահաբեկումները, լցոնումներով պայմանավորված այս հանրաքվեի արդյունքները չեն արտացոլում հասարակության ազատ կամքը և չպետք է համարվեն լեգիտիմ: Մենք հիասթափված ենք թե քարոզարշավով, թե բուն հանրաքվեով: Մեծ ճնշումներ է գործադրվել դիտորդների եւ լրագրողների նկատմամբ»,-ասաց Վեթելանդը:

Դեմոկրատական ընտրությունների եվրոպական պլատֆորմի փորձագետ, Ընտրողների կոմիտեի ներկայացուցիչ, Ուկրաինայից ժամանած Սերգեյ Տկաչենկոն նկատեց, որ դիտորդական առաքելության Հայաստան ժամանած այլ 6 դիտորդական առաքելություններից առնվազն 2-ը չեն գործել միջազգային չափանիշներին համապատասխան:

«Օրինակ` ԱՊՀ երկրների առաքելության ներկայացուցիչները, դեռ ժամը 12.00-ին, երբ հանրաքվեն ընթացքի մեջ էր, հայտարարեցին, որ հանրաքվեն անցավ օրենքի շրջանակներում, և հույս ունենք, որ հանրությունը ճիշտ ընտրություն կանի: ՌԴ ԿԸՀ նախագահ Վադիմիր Չուրովը հայտարարեց, որ ամեն ինչ բնականոն ընթանում է և ոչ մի խնդիր չեն արձանագրել: Միայն մի քանի տեխնիկական խնդիրների մասին հայտնեց, թե օրինակ, մի ընտրատեղամասում ընտրացուցակները փոքր ինչ բարձր են կախված և այլն: Այնինչ մենք չենք կարող հանրաքվեի կոնկրետ մի դրվագին գնահատական տալ, այլ պետք է սպասել, որ գործընթացն ամբողջովին ավարտվի»,-ընդգծեց Տկաչենկոն:

Ասուլիսի մասնակից Ռոման Ուդոտն էլ պատմեց, որ անձամբ է արձանագրել մի շարք ընտրախախտումներ:

«Վեց ընտրատեղամասերից երեքում ես քվեատուփերի լցոնումներ արձանագրեցի: Բազում լուսանկարներ տեղադրվեցին ինտերնետում: Կամ այլ տեղամասում ինքս եմ տեսել, թե առավոտյան, երբ դեռ քիչ ընտրողներ էին եկել, որքան շատ քվեաթերթիկներ կային քվեատուփում: Բայց ունենք լրիվ այլ պաշտոնական տվյալներ: Առավոտյան տեսանք, թե ինչ հսկայական թվով թերթիկներ կային քվեարկած, երբ ոչ մի ընտրող դեռ չկար: Առանց այս լցոնումների Հայաստանն ավելի առաջ կգնար: Այն մարդիկ, որ այս ամենն անում են, ՀՀ-ն երկու տարբեր ուղղություններով են տանում ու աղճատում»,-նշեց Ուդոտը: 
Վարդինե Գրիգորյանն էլ ասաց, որ երեկ ամբողջ օրվա ընթացքում «Քաղաքացի-դիտորդ» նախաձեռնությունը ընտրախախտումների մասին ստացել է 941 ահազանգ, որոնք արձանագրվել են sms-ների միջոցով ընտրատեղամասերում աշխատող դիտորդների կողմից:

«Բայց դիտորդները խախտումների մասին բավականին շատ ահազանգում էին նաև հեռախոսով: Խախտումները համակարգային բնույթ էին կրում և պարբերաբար կրկնվում էին»,-նշում է Գրիգորյանը:

Տիգրան Եգորյանն  ասաց, որ հանրաքվեին խախտումների ամբողջ գունապնակը բացահայտվեց:

«Հատկապես էական է խախտումների բնույթն այն առումով, որ այս անգամ հնարավոր եղավ իսկապես փաստարկված  և հստակ բացահայտել խախտումների համակարգային բնույթը: Խախտումների այնպիսի փոխկապակցվածությունը, որը խոսում է պետական տարբեր մարմինների միջև այդ հանցավոր համաձայնության մասին»,-հավելեց Եգորյանը:

Լիլիթ Առաքելյան, «Մեդիա կենտրոն» ծրագրի համակարգող-խմբագիր

Հեղինակի հետ կապվելու համար գրեք Lilitarakelyan@pjc.am  հասցեին:  

Տեսանյութ
Print Friendly and PDF
Այլ մամլո հաղորդագրություններ
«ԶԼՄ-ների գործունեություն առանձնահատկությունները Երևանի ավագանու ընտրությունների նախընտրական շրջանում»
20.09.2018
13:30
Սեպտեմբերի 20-ին «Մեդիա կենտրոնում» տեղի ունեցավ քննարկում «ԶԼՄ-ների գործունեություն առանձնահատկությունները Երևանի ավագանու ընտրությունների նախընտրական շրջանում» թեմայով։
Երևանի ավագանու ընտրություններ- 2018 «Երևանը՝ երեխաների համար»
20.09.2018
12:30
Սեպտեմբերի 20-ին Մեդիա կենտրոնում Երևանի ավագանու թեկնածուները ներկայացրեցին իրենց ծրագրերը՝ «Երևանը՝ երեխաների համար» թեմայով:
Երևանի ավագանու ընտրություններ 2018. «Որքանո՞վ է Երևանը հարմար հաշմանդամություն ունեցող անձանց համար» . ավագանու թեկնածուների ծրագրերը
19.09.2018
12:30
Սեպտեմբերի 19-ին Մեդիա կենտրոնում քննարկեցինք «Որքանո՞վ է Երևանը հարմար հաշմանդամություն ունեցող անձանց համար» թեման. ավագանու թեկնածուները կներկայացնեն իրենց կուսակցության կամ դաշինքի ծրագիրը:
«ՀՀ ԱԱԾ տնօրենի և ՀՔԾ պետի գաղտնալսման հետևանքները. սպառնալիք ազգային անվտանգությանը»
17.09.2018
12:00
Սեպտեմբերի 17-ին «Մեդիա կենտրոնում» տեղի ունեցավ քննարկում «ՀՀ ԱԱԾ տնօրենի և ՀՔԾ պետի գաղտնալսման հետևանքները. սպառնալիք ազգային անվտանգությանը» թեմայով։
Հրավեր Երևանի ավագանու ընտրություններին առաջադրված քաղաքապետի բոլոր թեկնածուներին
14.09.2018
16:49
«Հանրային լրագրության ակումբ» ՀԿ-ի «Մեդիա կենտրոն» նախագծի շրջանակում մենք հրավիրում ենք Երևանի ավագանու ընտրություններին առաջադրված քաղաքապետի բոլոր թեկնածուներին ուղիղ եթերում մասնակցել բանավեճի։

Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ