Հարցազրույց Էդուարդ Շարմազանովի հետ. սահմանադրական փոփոխություններ
01.12.2015
11:00
Հանրապետական կուսակցությունը ի սկզբանե` դեռեւս 1990 թ-ից է եղել խորհրդարանական համակարգի կողմնակից. այս մասին այսօր «Մեդիա կենտրոնում» հրավիրած ասուլիսի ընթացքում հայտարարեց ԱԺ փոխխոսնակ, ՀՀԿ մամուլի խոսնակ Էդուարդ Շարմազանովը` հիշեցնելով, որ ՀՀԿ-ի այն ժամանակվա նախագահ Աշոտ Նավասարդյանը եղել է Լեւոն Տեր-Պետրոսյանի առաջարկած Սահմանադրությանը դեմ հանդես եկող վեց քաղաքական ուժերի առաջնորդների թվում, որոնք առաջարկում էին երկրում սահմանել խորհրդարանական համակարգ:

Անդրադառնալով ընդդիմության հնչեցրած ահազանգերին` ընտրացուցակների ուռճացվածության,  հանձնաժողովի անդամներին կաշառելու փորձերի, պետական հիմնարկներում եւ ուսհաստատություններում «Այո»-ի հավաքագրումների մասին` Էդուարդ Շարմազանովը նախ չհամաձայնեց, որ նման ահազանգեր հնչեցվում է ընդիմության կողմից`   պնդելով, որ նման հայտարարություններ է անում ըննդիմության մարգինալացված հատվածը, ապա եւ ասաց. «Մենք մեղավոր չենք, որ որոշ քաղաքական կուսակցություններ չունեն այնքան քանակով վստահված մարդիկ, որ կարողանան տեղերում իրենց ձայները պահել: Բարոյական չէ կանխավ  մարդկանց մեղադրել վաճառվելու մեջ: Եթե այդ ուժերը հարյուրից ավելի տեղամասերում չեն կարողանում ապահովել վստահված անձինք, այդ մարդիկ ոնց են ժողովրդին առաջնորդելու»:

Խոսելով Սահմանադրության նախագծի վիճահարույց դրույթների մասին, մասնավորապես 89-րդ հոդվածի՝ կայուն մեծամասնության սահմանադրորեն ամրագրվող նորմից, Շարմազանովն ասաց. «Իսկ ով է ասել, որ Հանրապետական կուսակցությունը չի ցանկանում լինել այդ կայուն մեծամասնության դերում: Ոմանց մոտ այնպիսի տպավորություն է, որ այս սահմանադրական  փոփոխությունները Հանրապետականին  իշխանությունից զրկելու համար է: Նման բան չի կարող լինել: Սա նույնն է, որ Ռեալ Մադրիդը մտնի խաղի Բարսելոնայի հետ եւ ասի` ես եկել եմ պարտվելու»:

Դիտարկմանը, թե խնդիրը հավասար պայմանների հնարավորության` սահմանադրորեն ամրագրումն է, Շարմազանովն արձագանքեց, թե նման հնարավորություններ այս նախագծով ամրագրված են: Ըստ նրա, նոր սահմանադրությունը  տալիս է առավել կայուն եւ անցնցում կառավարման եւ նաեւ անցնցում իշխանափոխության հնարավորություն: Այդուամենայնիվ` հարցին, արդյոք այլեւս իշխանությունն առաջիկա 10 տարիներին Ալեք Մանուկյանով չի անցնելու` ինչպես ժամանակին պնդում էր, Շարմազանովը պատասխանեց, որ  դա քաղաքական հայտարարություն է, եւ ինքը այն հիմա էլ է վերահաստատում, քանի որ Հանրապետական կուսակցությունն, ըստ նրա, Հայաստանում ամենակայացած եւ հզոր քաղաքական ուժն է:

Անդրադառնալով սահմանադրական նախագծի 205 հոդվածին, որով սահմանված է ՀՀ տարածքների փոփոխությունը հանրաքվեի միջոցով իրականացնելու դրույթը` Շարմազանովը կոչ արեց Ղարաբաղը իրենցից չպաշտպանել. «Դա ուղղակի անբարոյականություն է, երբ փորձում են Ղարաբաղը մեզանից պաշտպանել»:

Ճշտող հարցին, թե արդյոք այդ փոփոխությունը ամրագրված է բացառապես Ղարաբաղի հետ կապված  հնարավոր զարգացումները նկատի առնելով` Շարմազանովը միանշանակ պատասխան չտվեց` բավարարվելով հոռետեսական  պատկերացումներով խնդրին չմոտենալու կոչով:

Բանախոսը նաեւ արձագանքեց Սերժ Սարգսյանի կողմից օրերս ի պատասխան ՀՀ քաղաքացու բողոքի արած հայտարարությանը, թե  հնարավոր է, որ Հայաստանում դատարանը չգործի. «Երկրի նախագահի ցանկացած քայլ ես դրական եմ համարում, քանի որ հավատում եմ նրա փորձին եւ իմաստությանը: Երկրի նախագահը այլ բան է նկատի ունեցել, նա նկատի է ունեցել, որ մեր երկրում դատական համակարգն անկատար է, եւ այս փոփոխություններով փորձ է արվում այն բարելավել»:

ՀՀԿ մամուլի խոսնակի գնահատմամբ` կիսանախագահական  գործող համակարգը շատ ավելի վատն է, քան անգամ նախագահականը, առավել եւս` խորհրդարականը:  Մեդիա կենտրոնի հիշեցմանը, որ 2005թ-ին հենց ՀՀԿ-ի ջանքերով երկրում հաստատվեց կիսանախագահական համակարգ` Շարմազանովը արձագանքեց. «Բայց մինչ այդ 90-ականներին էլ մենք խորհրդարանականի կողմնակից էինք: Ես կարծում եմ, չարժե հետ նայել, ավելի լավ է նայենք առաջ»:

Արևիկ Սահակյան, «Մեդիա կենտրոն» ծրագրի քննարկումների համակարգող:

Հեղինակի հետ կապվելու համար գրեք  areviksahakyan@mail.ru հասցեին:    

 

Տեսանյութ
Print Friendly and PDF
Այլ մամլո հաղորդագրություններ
Խաղաղության ընկալումը․ ԼՂ հակամարտության մոտեցումների վերլուծությունը
06.02.2019
12:00
ԼՂ հակամարտության հանգուցալուծմանը հասնելու միակ ճանապարհը խաղաղությանը նախապատրաստվելն է: Թեպետ հակամարտող հանրույթներում գերիշխում է պատերազմի պրոպագանդան, սակայն Հայաստանում, Լեռնային Ղարաբաղում եւ Ադրբեջանում մարդիկ սկսել են ավելի ու ավելի քննադատաբար մոտենալ հնարավոր պատերազմին: Հարցեր են հնչեցնում պատերազմի ու խաղաղության գնի մասին:
2017-2018թթ պետգնումների համակարգի մոնիտորինգի արդյունքները
28.12.2018
12:00
Դեկտեմբերի 28-ին «Մեդիա կենտրոնում» «Հանրային քաղաքականության հետազոտությունների ազգային կենտրոն» ՀԿ-ն ներկայացրեց 2017-2018թթ (I կիսամյակի) պետական գնումների համակարգի հիմնական միտումները։
Իրավապաշտպանների առաջարկները ՔԿՀ-ներում բարեփոխումների իրականացման ռազմավարության վերաբերյալ
27.12.2018
13:30
Արդարադատության նախարարության կողմից е-draft կայքում 2018 թ. դեկտեմբերի 19-ից հանրային քննարկման է դրվել քրեակատարողական համակարգում իրավիճակի բարելավման նպատակով 2018 -2038 թթ. ռազմավարությունը և դրա իրականացման 20 -ամյա միջոցառումների ծրագիրը հաստատելու մասին կառավարության որոշման նախագիծը։ Այն հանրային քննարկման է դրված լինելու մինչև 2019 թ. հունվարի 8-ը։
Օպտիմա՞լ է նախարարությունների օպտիմալացումը
26.12.2018
12:00
Դեկտեմբերի 26-ին Մեդիա կենտրոնում տեղի ունեցավ քննարկում «Օպտիմա՞լ է նախարարությունների օպտիմալացումը. գնահատում են մասնագետները» թեմայով:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ