Սահմանադրական փոփոխություններ. բանավիճում են Արամ Մանուկյանն ու Արծվիկ Մինասյանը
16.11.2015
13:30
Այսօր «Մեդիա կենտրոնում» տեղի ունեցավ բանավեճ ԱԺ ՀԱԿ խմբակցության քարտուղար Արամ Մանուկյանի և ԱԺ ՀՅԴ խմբակցության պատգամավոր Արծվիկ Մինասյանի միջև սահմանադրական փոփոխությունների գործընթացի և նախագծի շուրջ:

«Ես արդեն  40 համայնքում հանդիպումներ եմ ունեցել,  զրուցել շուրջ 1400 հոգու հետ, եւ հավատացեք ինձ,  գեթ մեկ հոգի «այո» այս երկրում չկա: Ես ընդամենը հարց եմ տալիս` ում էր պետք այս քյալլագյոզությունը: Մենք տարիուկես` մոռացած մեր բյուջեն, հիմա հեսա կտեսնեք, թե ինչ  հետ նահանջի բյուջե են բերել, մոռանալով արտագաղթի  արդեն սահմանը անցնող քանակը, մեր աղքատության  արդեն սարսափելի արագացող տեմպերը, թողել` նստել ենք, Սահմանադրություն ենք փոխում: Այն դեպքում, երբ գործող Սահմանադրությունը կարգուկանոն պահպանում է,- նշեց Արամ Մանուկյանը` հարց ուղղելով Արծվիկ Մինասյանին,-Արդյոք գործող սահմանադրությունն ասում է, որ խորհրդարանում պետք է 60 հոգի բիզնեսմեն լինի, ընդ որում բիզնեսմեն, որոնք Հայաստանում հիմնական  բիզնեսների տերերն են: Գործող սահմանադրությունը չի աշխատում այդ  առումով, եւ եթե իշխանությունը կամք չունի գործող Սահմանադրությունը աշխատացնելու, փոխելու իմաստը ո՞րն է»:

Արձագանքելով այս հարցադրմանը` Արծվիկ Մինասյանը նկատեց. «Քաղաքական կամք կոչվածը պետք  լինի մի մեխանիզմ, որը պետք է ապահովվի Մայր օրենքով եւ պարտադրի իշխանությանը դրսեւորելու այն, այլ ոչ թե թողնի վերջինիս ցանկությանը: Եթե դա թողնենք իշխանության ցանկությանը, ապա որեւէ իշխանություն երբեւէ իր լիազորությունները կամավոր հենց այնպես չի զիջի»:

«Պատերազմական վիճակում գտնվող երկիրն իր ռեսուրսները պետք է լրիվ ուրիշ ուղղությամբ տաներ, սակայն մեզ  շեղել են էն լուրջ խնդիրներից, որ Հայաստանն ուղղակիորեն սպառվում է»,-ընդգծեց Արամ Մանուկյանը` հավելելով. «Մենք ասում ենք  մեր տունը քանդվում է, դուք ասում եք` միջանցիկ քամի է:  Սա ամենեւին սահմանադրական փոփոխություններ չեն, սա ընդամենը Սերժ Սարգսյանի  իշխանությունը երկարաձգելու խնդիր է»: 

Նա նաեւ ընդգծեց, որ այս նախագծի կյանքի կոչման դեպքում ժողովրդին հեռացնում են  երկրի կառավարումից. «Կա երեք ընտրություն, որին ժողովուրդը մասնակցում է: Առաջինը` նախագահական ընտրություններն են, որին այս նախագծով ժողովրդի մասնակցությունը 100 տոկոսով հանվում է: ՏԻՄ ընտրությունները 3 տարով  էր, դարձավ 5 տարի, 40 տոկոսով ժողովրդի մասնակցությունը կրճատվեց ժամկետի առումով, խորհրդարանն էլ 4 տարի էր, սարքեցին 5, եւ դարձյալ 25 տոկոսով ժողովրդի մասնակցւթյունը հեռացվեց իշխանության ձեւավորման գործընթացից: Սա կոնցեպցիա է, որ քաղաքացին չմասնակցի ընտրություններին: Կա՞ արդյոք ավելի կարեւոր բան, քան ընտրությունների միջոցով քաղաքացու կողմից իշխանության ձեւավորումն է»:

Արծվիկ Մինասյանը ճիշտ չհամարեց  ընտրությունների քանակը ժողովրդավարության զարգացման պայման դիտարկելը` նշելով, թե այդ դեպքում կարելի էր ամեն տարի ընտրություններ կազմակերպել:

Արձագանքելով «Մեդիա կենտրոնի» հարցադրմանը, թե հաշվի առնելով  ՀՀ Ազգային Ժողովի  կազմի  մասնագիտական հնարավորությունները,  արդյոք ռիսկային չէ Հայաստանում «փափուկ» Սահմանադրության ներդնումը, այն է` առաջարկվող նախագծի 202 հոդվածը, որով  220 հոդվածներից միայն 123-ն  է փոփոխելի  բացառապես հանրաքվեի միջոցով, իսկ մնացածը կարող են փոփոխվել նաեւ խորհրդարանի կողմից` Աժ ՀՅԴ խմբակցության պատգամավոր Արծվիկ Մինասյանը նշեց, որ  վերը նշված հոդվածով  կարեւորագույն, հիմնասյունային դրույթները  կարող են փոխվել բացառապես հանրաքվեի միջոցով:

«Մյուս նորմերը, որոնք  պետք է ապահովեն եւ դառնան երաշխիքը այդ նորմերի ապահովման, դրանք, այո, կարող են փոփոխության ենթարկվել նաեւ ԱԺ-ի կողմից: Այլ բան, որ դուք բարձրաձայնում եք այսօրվա Ազգայի ժողովի պատկերը հաշվի առնելով` արդյոք համահունչ է այսպիսի Ազգային ժողովին նման իրավասության վերապահումը: Ամբողջ խնդիրն այն է, որ դա պետք է դիտարկել ոչ թե այսօրվա Ազգային ժողովի համապատկերի, այլեւ այն պատկերի համար, որը պետք է ձեւավորվի, եթե այս Սահմանադրական փոփոխությունները կյանքի կոչվեն»:

Մինասյանի պնդմամբ` նոր Սահմանադրությամբ պատգամավորներին առաջադրված են այնպիսի պահանջներ, որոնք կոչված են բարձրացնելու ԱԺ որակը, որպես այդպիսին նա մասնավորապես նշեց լեզվի իմացության պահանջը:

Մինասյանը նաեւ կարեւորեց պատասխանատվության սահմանման հստակ մեխանիզմների ներդնումը: «Շատ են հարցնում արդյոք գործող  Սահմանադրությունն է խանգարում, որպեսզի անցկացվեն ազատ արդար ընտրություններ: Այո, չի խանգարում, բայց եւ չի նպաստում, չի ապահովում համարժեք պատասխանատվությունը այն  անձանց համար, եւ չի սուբյեկտավորում նրանց, ովքեր պարտավոր են այդ ամենը իրականացնել: Այսօրվա գործող սահմանադրությամբ չկա սուբյեկտավորված  պատասխանատու, թե ով պետք է ապահովի ազատ եւ արդար  ընտրությունների անցկացումը: Այն նորմը, թե Նախագահը Սահմանադրության երաշխավորն է, խիստ դեկլարատիվ է եւ չիրագործվող: Այս փոփոխություններով ամբողջ պատասխանատվությունը դրվելու է Կենտրոնական ընտրական  հանձնաժողովի  վրա, որի անդամները ընտրվելու են ԱԺ կողմից` ձայների 3/5-ով: Եվ այս հանձնաժողովը նաեւ ազատելու է կուսակցություններին ընտրական վարչարարությունից»:

Բանավեճի ընթացքում կողմերը հիշատակեցին «Քառյակի» շրջանակներում համագործակցության կարճատեւ փորձը. «Էհ, Արծվիկ, Արծվիկ, մեզանից նեղացաք, գնացիք Սերժի գիրկը, դա էր հա, քաղաքական մոտեցումը»,- բացականչեց Արամ Մանուկյանը, ինչին Մինասյանն արձագանքեց. «Մենք գիրկ գնացող չենք, պարոն Մանուկյան, ի տարբերություն Ձեր քաղաքական թիմի»:

Արևիկ Սահակյան, «Մեդիա կենտրոն» ծրագրի քննարկումների համակարգող:

Հեղինակի հետ կապվելու համար գրեք  areviksahakyan@mail.ru հասցեին:    

 

   

Տեսանյութ
Print Friendly and PDF
Այլ մամլո հաղորդագրություններ
«ԶԼՄ-ների գործունեություն առանձնահատկությունները Երևանի ավագանու ընտրությունների նախընտրական շրջանում»
20.09.2018
13:30
Սեպտեմբերի 20-ին «Մեդիա կենտրոնում» տեղի ունեցավ քննարկում «ԶԼՄ-ների գործունեություն առանձնահատկությունները Երևանի ավագանու ընտրությունների նախընտրական շրջանում» թեմայով։
Երևանի ավագանու ընտրություններ- 2018 «Երևանը՝ երեխաների համար»
20.09.2018
12:30
Սեպտեմբերի 20-ին Մեդիա կենտրոնում Երևանի ավագանու թեկնածուները ներկայացրեցին իրենց ծրագրերը՝ «Երևանը՝ երեխաների համար» թեմայով:
Երևանի ավագանու ընտրություններ 2018. «Որքանո՞վ է Երևանը հարմար հաշմանդամություն ունեցող անձանց համար» . ավագանու թեկնածուների ծրագրերը
19.09.2018
12:30
Սեպտեմբերի 19-ին Մեդիա կենտրոնում քննարկեցինք «Որքանո՞վ է Երևանը հարմար հաշմանդամություն ունեցող անձանց համար» թեման. ավագանու թեկնածուները կներկայացնեն իրենց կուսակցության կամ դաշինքի ծրագիրը:
«ՀՀ ԱԱԾ տնօրենի և ՀՔԾ պետի գաղտնալսման հետևանքները. սպառնալիք ազգային անվտանգությանը»
17.09.2018
12:00
Սեպտեմբերի 17-ին «Մեդիա կենտրոնում» տեղի ունեցավ քննարկում «ՀՀ ԱԱԾ տնօրենի և ՀՔԾ պետի գաղտնալսման հետևանքները. սպառնալիք ազգային անվտանգությանը» թեմայով։
Հրավեր Երևանի ավագանու ընտրություններին առաջադրված քաղաքապետի բոլոր թեկնածուներին
14.09.2018
16:49
«Հանրային լրագրության ակումբ» ՀԿ-ի «Մեդիա կենտրոն» նախագծի շրջանակում մենք հրավիրում ենք Երևանի ավագանու ընտրություններին առաջադրված քաղաքապետի բոլոր թեկնածուներին ուղիղ եթերում մասնակցել բանավեճի։

Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ