Կհետևե՞ն արդյոք հայաստանյան դատարանները ՍԴ որոշմանը. քննարկում
22.10.2015
13:00
Սահմանադրական դատարանի (ՍԴ) վճիռը՝ պաշտպանել լրատվամիջոցների՝ տեղեկատվության աղբյուրը չբացահայտելու իրավունքը, կարող է դրական պրակտիկա ձևավորել և մինիմալի հասցնել իրավապահ մարմինների պահանջները ԶԼՄ-ներին՝ բացահայտել իրենց տեղեկատվության աղբյուրը: Այդ մասին «Մեդիա կենտրոնում» հայտարարեց «Իրավունքի գերակայություն» ՀԿ ներկայացուցիչ, իրավապաշտպան Արտակ Զեյնալյանը:

Սահմանադրական դատարանը հոկտեմբերի 20-ին, քննելով տեղեկատվության աղբյուրները բացահայտելու վերաբերյալ «Հրապարակ»-ի և «Իլուր»-ի նկատմամբ կայացված դատական որոշումները, կայացրեց վճիռ, համաձայն որի, լրագրողը իր տեղեկատվության աղբյուրը կարող է բացահայտել միայն ծանր հանցագործությունների և անձի պաշտպանության դեպքում։ ՍԴ-ի որոշման մեջ, որի միայն եզրափակիչ մասն է դեռ հրապարակված, նշվում է, որ օրեսնդրության, մասնավորապես «ԶԼՄ-ների մասին» օրենքի դրույթները չեն հակասում Սահամանդրությանը՝ հստակեցնելով սակայն, որ ավելի վաղ դրանք սխալ են կիրառվել: 

Հոկտեմբերի 22-ին «Մեդիա կենտրոնում» Արտակ Զեյնալյանի, «Խոսքի ազատության պաշտպանության կոմիտեի» նախագահ Աշոտ Մելիքյանի և «Հրապարակ» օրաթերթի գլխավոր խմբագիր Արմինե Օհանյանի մասնակցությամբ տեղի ունեցավ քննարկում «Սահմանադրական դատարանը պաշտպանեց ԶԼՄ-ների՝ տեղեկատվության աղբյուրը չբացահայտելու իրավունքը» թեմայով:

«Թեև դատավարության ընթացքում մենք բազմիցս նշում էինք, որ լրատվամիջոցներն իրավունք ունեն չբացահայտել տեղեկատվության աղբյուրը ու հղում կատարում Մարդու իրավունքների եվրոպական դատարանի և Եվրախորհրդնի նախարարական կոմիտեի որոշումներին, սակայն դատարանները մնում էին անդրդվելի և հաշվի չէին առնում մեր փաստարկները: Սահմանադրական դատարանը իր որոշման մեջ հղում է կատարում հենց ՄԻԵԴ-ի և Եվրախորհրդի նախարարական կոմիտեի որոշումներին՝ փաստացի մատնանշելով, որ խնդիրը իրավակիրառության մեջ է», - պարզաբանեց Արտակ Զեյնալյանը:

Տեղեկատվության աղբյուրի բացահայտումը, շարունակեց նա, անհրաժեշտ է անձի կյանքի պաշտպանության, ծանր, առանձնապես ծանր հանցագործությունը կանխելու կամ առանձնապես ծանր հանցանքի մեջ մեղադրվող անձի դատական պաշտպանությունն ապահովելու համար։ «Այսուհետ այն փաստարկները, որոնք մենք բերում էինք դատարանում, այլևս չեն կարող մերժվել, որովհետև ՍԴ-ն հաստատում է մեր դիրքորոշումը», - ասաց բանախոսը:

«Հիմա արդեն իրավապահ մարմինները պարտավոր են հաշվի առնել ՍԴ որոշումը և պետք է, որ այդպիսի կոնֆլիկտներ չառաջանան դատական համակարգի և ԶԼՄՆ-ների միջև», - համաձայնեց Աշոտ Մելիքյանը՝ այնուամենայնիվ կասկած հայտնելով, որ պրակտիկայում իրավապահ մարմինների պահանջները բացահայտել տեղեկատվության աղբյուրը, չեն կրկնվի: «Փորձը ցույց է տալիս, որ մենք ապահովագրված չենք դեպքերից, երբ թեկուզ և առկա է Սահմանադրական դատարանի որոշումը, բայց դատախազները, քննիչները կամ դատավորները փորձում են այն շրջանցել: Այնպես, որ բացառել ոչինչ չի կարելի, բայց հիմք կա պահանջելու, որ լրատվամիջոցների նկատմամբ նման անհեհեթ որոշումներ չկայացվեն», - ասաց Մելիքյանը:

«Հրապարակ» օրաթերթի գլխավոր խմբագիր Արմինե Օհանյանը ՍԴ որոշումից արել է երկու հետևություն՝ դրական և բացասական: «Բացասականն այն է, որ մեր դատական եռաստիճան համակարգը չի ծառայում օրենքին… Կարող են կատարել դատախազության, ոստիկանության պատվերը, հրամանը առանց խղճի խայթի: Այդ դատավորները պետք է հիմա ամաչեն մարդկանց երես նայելուց, պետք է հրաժարական տան: Դրական եմ համարում այն, որ սա մամուլի հաղթանակն է: Եթե անգամ մամուլի ներկայացուցիչներին կարողանում են ճնշել, սակայն ինչ որ մի ատյանում ճշմարտությունը հաղթում է», - նշեց Օհանյանը:

Այնուամենայնիվ տուժող կողմը չի սահմանափակվելու միայն Սահամանադրական դատարանի որոշմամբ: Նրանք արդեն դիմել են ՄԻԵԴ և պատրաստվում են եվրոպական դատարանում սպասվելիք գործընթացին: Բացի այդ, գործով անցնող ԶԼՄ-ները, հիմնվելով ՍԴ որոշման վրա, փորձելու են  նաև հայաստանյան ատյաններում վերականգնել նաև իրենց խախտված իրավունքները:

Արշալույս Մղդեսյան, «Մեդիա կենտրոն» ծրագրի համակարգող-խմբագիր

Հեղինակի հետ կապվելու համար գրեք arshaluismghdesyan@pjc.am  հասցեին:

 

Տեսանյութ
Print Friendly and PDF
Այլ մամլո հաղորդագրություններ
«Փոփոխություններ ՀՀ հարկային օրենսգրքում. կհարկվե՞ն արդյոք արտագնա աշխատողները»
20.11.2018
13:00
Նոյեմբերի 20-ին «Մեդիա կենտրոնում» տեղի ունեցավ քննարկում «Փոփոխություններ ՀՀ հարկային օրենսգրքում. կհարկվե՞ն արդյոք արտագնա աշխատողները» թեմայով։
«Թվային Հայաստանին ընդառաջ» ArmSec 2018 համաժողով
20.11.2018
12:00
Նոյեմբերի 20-ին «Մեդիա կենտրոնում» տեղի ունեցավ մամուլի ասուլիս` նվիրված «Թվային Հայաստանին ընդառաջ» խորագրով ArmSec 2018 համաժողովի բացմանը:

«Նոր իշխանությունությունից պահանջը ավելի մեծ է լինելու խտրականության դեմ պայքարի համար». իրավապաշտպաններ
16.11.2018
12:00
Այն քաղաքական ուժերը, ովքեր ձախողել են իրենց քաղաքական օրակարգը, չեն կատարել խոստումները, ունեն մի գործիք՝ տարբեր խմբերի նկատմամբ ատելությունը մանիպուլյացնելով ձեռք բերել դիվիդենտներ. այս մասին նոյեմբերի 16-ին «Մեդիա կենտրոնում» Հանդուրժողականության համաշխարհային օրվան նվիրված քննարկմանը հայտարարեց Խտրականության դեմ պայքարի և հանուն հավասարության կոալիցիայի ղեկավար Հովհաննես Մադոյանը:
Ընտանեկան բռնության նոր դեպք. օրենքի կիրառման և կանխարգելման բացերը Հայաստանում
14.11.2018
14:00
Նոյեմբերի 14-ին «Մեդիա կենտրոնում» տեղի ունեցավ մամուլի ասուլիս «Ընտանեկան բռնության նոր դեպք. օրենքի կիրառման և կանխարգելման բացերը Հայաստանում»:
«Խաղողագործության ոլորտի խնդիրներն ու մարտահրավերները. գյուղատնտեսական տարվա ամփոփում»
14.11.2018
12:00
Նոյեմբերի 14-ին «Մեդիա կենտրոնում» տեղի ունեցավ մամուլի ասուլիս «Խաղողագործության ոլորտի խնդիրներն ու մարտահրավերները. գյուղատնտեսական տարվա ամփոփում» թեմայով։

Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ