Իրավապաշտպանները ոստիկանների գործողությունները որակում են՝ «պատժիչ օպերացիա» ցուցարարների նկատմամբ
24.06.2015
12:30
Երեկ վաղ առավոտյան Բաղրամյան պողոտայում ոստիկանների և ցուցարարների միջև տեղի ունեցած բախումը իրավապաշտպանները որակում են ոստիկանների կողմից ուժի անհամաչափ կիրառում և պատժիչ օպերացիա ցուցարարների նկատմամբ:

«Մեդիա կենտրոնում» այսօր այս թեմայի շուրջ քննարկմանը մասնակցում էին Խոսքի ազատության պաշտպանության կոմիտեի նախագահ Աշոտ Մելիքյանը, Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը, «Իրավունքի եւ ազատության կենտրոն» ՀԿ-ի նախագահ Վարդան Հարությունյանը, քաղաքացիական ակտիվիստ Դանիել Իոաննիսյանը և «Իրավունքների պաշտպանություն առանց սահմանների» ՀԿ-ի նախագահ Հայկուհի Հարությունյանը:

«Ոստիկանության գործողությունները ուժի անհամաչափ կիրառում էր` ուղղված մարդկանց նկատմամբ, ովքեր խաղաղ ցույց էին իրականացնում: Մոտ 500 հոգի խաղաղ նստացույց էին անում, իսկ ոստիկանները, ներքին զորքերը ռետինե մահակներով, ջրցան մեքենաներով, մի ամբողջ զորախմբով մարդկանց դեմ էին դուրս եկել, և հետապնդում էին մինչև Ազատության հրապարակ: Իսկ այն վերաբերմունքը, որ եղավ լրագրողների նկատմամբ հատուկ էր, որովհետև նրանք էին բռնությունները արձանագրողները և դա ուղղված էր նրանց, որ այդ բռնությունները չարձանագրվեն»,-ասում է Արթուր Սաքունցը:

Նա հավելում է, որ ցուցարարներին բերման են ենթարկել, առանց իրավական հիմքերի պահել ոստիկանական բաժանմունքներում և առանց որևէ հիմքի ուղարկել ոմանց բժշկական փորձաքննության:

Հիշեցնենք, որ երեկ առավոտյան՝ ժամը 05:30-ի սահմաններում Բաղրամյան պողոտայում Էլեկտրաէներգիայի սակագնի թանկացման դեմ պայքարող և նստացույց իրականացնող երիտասարդ ակտիվիստների նկատմամբ ոստիկանությունը կիրառել էր բռնի ուժ և ջրցան մեքենաներով ազատել Բաղրամյան պողոտան: Ոստիկանները բերման էին ենթարկել շուրջ 237 ակտիվիստի, նրանից շատերը ստացել էին մարմնական տարբեր աստիճանի վնասվածքներ: Մի քանի տասնյակ ցուցարարների տեղափոխել են բուժհաստատություններ, մի քանիսն անգամ հայտնվել են վերակենդանացման բաժանմունքներում:

Բռնություններից անմասն չէին մնացել որոշ լրագրողներ և օպերատորներ, ովքեր իրենց մասնագիտական գործունեությունն են ծավալել դեպքի վայրում:

Վարդան Հարությունյանն ասում է, որ ցանկացած ցույցի ժամանակ ցուցարարները միշտ դրսևորել են օրենքի նկատմամբ մեծագույն հարգանք:

«Երբեք ցուցարարների կողմից, անգամ մարտի 1-ին և դրանից հետո չեմ տեսել մասնակիցների կողմից որևէ անօրինական գործողոթյուն: Միշտ ներքին զորքերը մահակ են եղել իշխանության ձեռքին: Ոստիկանությունը չի ծառայում օրենքին և Սահմանադրությանը, նրանց վերածել են ուժի մահակի: Մարդիկ իրացնում են իրենց սահմանադրական իրավունքը, ի՞նչ է նշանակում կիրառել ուժ խաղաղ ցուցարարների նկատմամբ»,-նշում է Հարությունյանը:

«Իրավունքների պաշտպանություն առանց սահմանների» ՀԿ-ի նախագահ Հայկուհի Հարությունյանը ասում է, որ բերման ենթարկվելուց հետո տուժածների համար կազմակերպվել է արդյունավետ իրավական պաշտպանություն:

«Մենք 4 ներկայացուցիչ ենք ունեցել ոստիկանության բաժանմունքներում, որոնցից 3-ը եղել են Երևանում, մեկը՝ Աշտարակի ոստիկանության բաժնում: Ուժի կիրառումը ոստիկանների կողմից անհամաչափ էր, ֆիզիկական վնասվածքներ ունեցող անձիք կային, ովքեր հենց բաժիններում են ստացել այդ վսասվածքները: Կար մոտ 10 քաղաքացի, որոնք տեղափոխվել էին Երևանի ոստիկանությունից ուրիշ բաժիններ, բայց նրանց տեղափոխման մասին որևէ տեղեկատվություն և հիմնավորող փաստաթուղթ չկար: Հարց է առաջանում, թե ինչու՞ էին Երևան քաղաքի խաղաղ ցուցարարներին տեղափոխել Աշտարակի բաժին»,-ընդգծեց Հարությունյանը:

 Նա հավելեց, որ այնուամենայնիվ ոստիկանների կողմից կիրառված ուժը իր նպատակին չծառայեց և պայքարի ոգին շարունակվում է:

Քննարկման մասնակից Աշոտ Մելիքյանն ասաց, որ հունիս 23-ի առավոտյան տեղի ունեցած բռնությունների հետևանքով 13 լրագրող և օպերատոր բռնության է ենթարկվել, խոչընդոտվել է 15 ԶԼՄ-ների ներկայացուցիչների լրագրողական աշխատանքը, ինչը «Քրեական օրենսգրքով» անթույլատրելի արարք է:    

«Բերման ենթարկված լրագրողները որևէ  խախտում չէին արել, որ հայտվել էին բաժանմունքներում և հարցաքննվում էին: Քաղաքական վերնախավը պետք է այստեղ շատ լուրջ մտածի, այլ ոչ թե որոշ պաշտոնյաների նման հրճվի ու ուրախանա  իր ոստիկաններով»,-ասում է Մելիքյանը:

Դանիել Իոաննիսյանն էլ հավելում է, որ սա պատժիչ օպերացիա է եղել ցուցարարների նկատմամբ:

«Մարդկանց հետապնդում էին Բաղրամյանից մինչև Ազատության հրապարակ և բերման ենթարկում տանում: Պատահական չի եղել նաև լրագրողների տեսախցիկները ջարդելը: Լրագրողների նկատմամբ բռնությունները կիրառվում էին հենց ոստիկանության գեներալների  ներկայությամբ և լռությամբ»,-ասում է Իոաննիսյանը:

Նա ընդգծում է, որ ցուցարարների պայքարը «գանդիստական» ոճի էր:

«Մենք նստում ենք գետնին ու ասում ենք մենք ձեզ չենք կպնում, դուք մեզ կարող եք ծեծել, տանել բաժիններ, ուղարկել վերակենդանացման բաժանմուքներ, բայց միևնույն  է Բաղրամյան փողոցը փակ կլինի և ցուցարարները այս առումով հաղթեցին»,-հավելեց Իոաննիսյանը:

Լիլիթ Առաքելյան «Մեդիա կենտրոն» ծրագրի համակարգող-խմբագիր

Հեղինակի հետ կապվելու համար գրեք [email protected]  հասցեին:

 

Տեսանյութ
Print Friendly and PDF
Այլ մամլո հաղորդագրություններ
«Անցումային արդարադատության իրականացման մեխանիզմները Հայաստանում»
23.05.2019
15:00
Մեդիա կենտրոն, Երևան: Մայիսի 23-ին Երևանի պետական համալսարանի Պալեանների անվան դահլիճում «Մեդիա կենտրոնը»-ը անցկացրեց քննարկում «Անցումային արդարադատության իրականացման մեխանիզմները Հայաստանում» թեմայով:
Ազգային անվտանգության ծառայության գործառույթներն ու լիազորությունների շրջանակը
22.05.2019
11:00
Մեդիա կենտրոն, Երևան: Մայիսի 22-ին «Մեդիա կենտրոնում» տեղի ունեցավ քննարկում «Ազգային անվտանգության ծառայության գործառույթներն ու լիազորությունների շրջանակը» թեմայով:
«Դիտորդների խմբի գործունեության խոչընդոտները և քրեակատարողական հիմնարկներում մարդու իրավունքների խախտումների խնդիրները 2018-2019թթ.-ին»
21.05.2019
11:00
Մեդիա կենտրոն, Երևան: Մայիսի 21-ին ժամը 11:00-ին Մեդիա կենտրոնում տեղի ունեցավ մամուլի ասուլիս՝ «Դիտորդների խմբի գործունեության խոչընդոտները և քրեակատարողական հիմնարկներում մարդու իրավունքների խախտումների խնդիրները 2018-2019թթ.-ին» թեմայով
Ռոբերտ Քոչարյանի հայտարարությունները սուտ են, նա կխուսափի՞ քննությունից․ քննարկում Մեդիա կենտրոնում
20.05.2019
10:00
Մեդիա կենտրոն, Երևան: Մայիսի 20-ին Մեդիա կենտրոնում տեղի ունեցավ «Ռոբերտ Քոչարյանն ազատվեց կալանքից. դատական իշխանության անկախությու՞ն, թե՞ դատական համակարգի հին արատներ» թեմայով քննարկում։
«Բռնությունը ընտանիքում. իրազեկման բացը կրթական ծրագրերում և օրենսդրական փոփոխությունների անհրաժեշտությունը»
15.05.2019
12:00
Մեդիա կենտրոն, Երևան: Մայիսի 15-ին, ժամը 12:00-ին «Մեդիա կենտրոնում» տեղի ունեցավ քննարկում` նվիրված Ընտանիքի միջազգային օրվան: Քննարկման թեման էր՝ «Բռնությունը ընտանիքում. իրազեկման բացը կրթական ծրագրերում և օրենսդրական փոփոխությունների անհրաժեշտությունը»:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ