Հայաստանը և ԵՄ-ն նոր փաստաթուղթ կազմելիս հիմնվելու են Ասոցացման համաձայնագրի վրա
29.05.2015
12:30
Թեև 2013 թ.-ին Վիլնյուսի գագաթնաժողովին Հայաստանն ի տարբերություն Ուկրաինայի, Վրաստանի և Մոլդովայի Եվրասիական տնտեսական միությանն (ԵԱՏՄ) անդամակցելու պատճառով չստորագրեց Եվրամիության հետ ասոցացման համաձայնագիր, այնուամենայնիվ երկու տարի անց Երևանն ու Բրյուսելը պատրաստվում են կնքել նոր համաձայնագիր: Այն պետք է հիմնվի արդեն բանակցված ասոցացման համաձայնագրի վրա՝ միևնույն ժամանակ հաշվի առնելով փոփոխված իրողությունները: Մասնավորապես Հայաստանի պատրավորությունները ԵԱՏՄ-ի շրջանակներում:

Մինչև վերջերս Եվրամիության հետ ընթանում էին քննարկումներ, որոնց արդյունքում որոշում է կայացվել սկսել բանակցություններ Հայաստանի հետ նոր համաձայնագրի կազմման շուրջ: «Արդեն դիմում-պահանջ է ներկայացված Եվրոպական խորհրդարան և Եվրոպական հանձնաժողով, որպեսզի տրամադրվի համապատասխան մանդատ Հայաստանի հետ բանակցություններ սկսելու համար: Արևելյան գործընկերության Ռիգայի գագաթնաժողովի արդյունքում ընդունված հռչակագրում արդեն իսկ նախանշվում են այն ոլորտները, որոնց շուրջ Հայաստանը և ԵՄ-ն շարունակելու են երկխոսել: Դրանք են վիզաների ռեժիմի դյուրացում, ավիացիա և այլն», - հայտարարեց Հայաստանի էկոնոմիկայի նախարարի առաջին տեղակալ Գարեգին Մելքոնյանը:

«Մեդիա կենտրոնում» մայիսի 29-ին Գարեգին Մելքոնյանի, ԱԺ պատգամավոր Միքայել Մելքումյանի և Հայաստանի գործատուների միության նախագահ Գագիկ Մակարյանի մասնակցությամբ տեղի ունեցավ քննարկում՝ «Հայաստան-ԵՄ հարաբերությունների ուրվագծվող տեսլականն Արևելյան գործընկերության Ռիգայի գագաթնաժողովից հետո» թեմայով:

Կողմերը բանակցվելիք փաստաթղթում, որն ըստ էության հանդիսանալու է Հայաստան-ԵՄ հարաբերությունների նոր իրավական հիմքը, հիմնվելու են արդեն բանակցված, բայց չստորագրած Ասոցացման համաձայնագրի վրա: «Նոր փաստաթղթում հնարավորինս կընդգրկվեն այն հատվածները, որոնք արդեն իսկ համաձայնեցված են եղել: Իհարկե ոչ բոլոր ոլորտները կարող են ներառվել, քանի որ փոխվել է իրավիճակը, և Հայաստանն ունի որոշակի պարտավորություններ Եվրասիական միության շրջանակներում», - պարզաբանեց Մելքոնյանը՝ մանրամասնելով, որ նոր փաստաթղթում հաստատ չի ընդգրկվի մաքսային կարգավորումների մասը, քանի որ դա կհակասի Հայաստանի անդամակցությանը ԵԱՏՄ-ին:

Առաջիկայում Եվրամիության հետ կնքվելիք փաստաթղթի տնտեսական բլոկում, ըստ Մելքոնյանի կարող են ներառվել, հետևյալ ոլորտները՝ թափանցիկություն, մրցակցություն, ներդրումներ, ծառայություններ և առևտուր: «Մենք որոշել ենք, որ այդ ոլորտները մնալու են ստորագրվելիք փաստաթղթում», - հավելեց փոխնախարարը՝ նշելով, որ Հյաստանը հայտնվում է բավականին շահեկան վիճակում, քանի որ գտնվելով Եվրասիական տնտեսական միության մեջ՝ տնտեսական բավական սերտ համագործակցություն կարող է ունենալ ԵՄ-ի հետ: «Մենք աշխատում ենք Եվրամիության հետ GSP+ համակարգով, որը հնարավորություն է տալիս մոտ 6400 անուն ապրանք Հայաստանից արտահանել ԵՄ գրեթե զրոյացված մաքսատուրերով», - նշեց նա:

GSP+ համակարգով աշխատել ԵՄ-ի հետ, ըստ Գագիկ Մակարյանի, դեռ չի նշանակում, որ Հայաստանում արտադրված ապրանքները արտահանվում են Եվրամիության շուկա: «Մեր գործարարների մեծ մասի մոտ կա ինֆորմացիայի պակաս առ այն, թե ինչ է այդ համակարգն իրենից ներկայացնում: Մեր գործարարները խուսափում են մրցակացությունից և ցանկանում են աշխատել հիմանակում ռուսական շուկայի հետ, որն ավելի ծանոթ է իրենց», - նշեց նա:

Իսկ Հայաստան-ԵՄ հարաբերություններում առկա զարգացումները Մակարյանը դրական գնահատեց՝ նշելով, որ այս դեպքում գործընթացն ավելի կարևոր է, քան արդյունքը: «Արևելյան գործընկերության շրջանակներում մենք արդեն ստանում ենք այն ամենը, ինչ մեզ պետք է: Անպայման չէ ստորագրել ինչ-որ փաստաթուղթ, ամեն պատեհ կամ անպատեհ առիթով այդ մասին խոսել, քանի որ այն կարող է առաջացնել Ռուսաստանի բացասական ռեակցիան, ինչը կարող է ունենալ իր հետևանքները», - ասաց բանախոսը:

Հայաստան-ԵՄ ապագա տնտեսական համագործակցության մասով վերապահումներ ներկայացրեց ԱԺ «Բարգավաճ Հայաստան» խմբակցության պատգամավոր Միքայել Մելքումյանը: «Եվրամիության հետ համաձայնագիր ստորագրելը դեռ չի նշանակում, որ  դրանից հետո  հայկական ապրանքները կլցվեն եվրոպական շուկաներ և Հայաստանի արտահանումը դեպի Եվրոպա կմեծանա: Եվրամիությունը այժմ թուլացնում է եվրոյի դիրքերը, որպեսզի խթանի սեփական ապրանքների սպառումն արտերկրում: Այս առումով անկախ ստորագրվելիք փաստաթղթի բովանդակությունից, դեռևս պարզ չէ՝ տնտեսական համագործակցություն կստացվի, թե ոչ», - նշեց նա:

Քննարկման ավարտին բանախոսները դրական գնահատեցին Եվրամիության հետ քննարկումների ընթացքը՝ հույս հայտնելով, որ դրանք կպսակվեն հաջողությամբ: Գարեգին Մելքոնյանը իր հերթին տեղեկացրեց, որ Եվրամիության հետ հարաբերությունների մասին տեղեկացվում են նաև Հայաստանի ԵԱՏՄ-ի մասով գործընկերները: «Սա շատ բնորոշ գործընթաց է յուրաքանչյուր մաքսային կամ տնտեսական միության համար: Օրինակ՝ Եվրամիության անդամ որևէ երկիր միայնակ իրավունք չունի ազատ առևտրի համաձայնագիր կնքել երրորդ պետության հետ», - եզրափակեց էկոնոմիկայի նախարարի առաջին տեղակալը:    

Արշալույս Մղդեսյան, «Մեդիա կենտրոն» ծրագրի համակարգող-խմբագիր

Հեղինակի հետ կապվելու համար գրեք arshaluismghdesyan@pjc.am  հասցեին:

 

Տեսանյութ
Print Friendly and PDF
Այլ մամլո հաղորդագրություններ
«Թավշյա զրույցներ» հեղափոխության դեմքերի հետ
25.05.2018
17:00
Մայիսի 25-ին «Մեդիա կենտրոնում» տեղի ունեցավ հանդիպում թավշյա հեղափոխության ակտիվ դերակատար, «Իմ քայլը» նախաձեռնության անդամ, ԱԺ «Ելք» խմբակցության պատգամավոր Լենա Նազարյանի հետ:
Քաղաքացիական հասարակության դերը հետհեղափոխական Հայաստանում
25.05.2018
12:00
Մայիսի 25-ին Մեդիա կենտրոնում տեղի ունեցավ քննարկում «Քաղաքացիական հասարակության դերը հետհեղափոխական Հայաստանում» թեմայով:
«Վարորդներին որոշ խախտումների դեպքում չտուգանելու և տուգանքների համաներման հնարավոր ազդեցությունն ու հետևանքները»
24.05.2018
11:00
ՀՀ ոստիկանությունը մայիսի 23-ից փոփոխություն է իրականացնում ճանապարհային երթևեկության կանոնների խախտումներով վարչական պատասխանատվության քաղաքականության մեջ:
«Գործարկվում է «Տվյալների պաշտպանության ընդհանուր կարգավորում»-ը. ինչպիսի՞ փոփոխություններ են սպասվում»
23.05.2018
12:00
Մայիսի 23-ին «Մեդիա կենտրոնում» տեղի ունեցավ քննարկում «Գործարկվում է «Տվյալների պաշտպանության ընդհանուր կարգավորում»-ը. ինչպիսի՞ փոփոխություններ են սպասվում» թեմայով:

«Բնապահպանության խնդիրներն ու ռիսկերը. առաջարկներ ուղղված նոր կառավարությանը»
22.05.2018
11:00
Բնապահպանության ոլորտում առկա խնդիրների, լուծումների և նոր կառավարությանն ուղղված իրենց առաջարկների մասին մայիսի 22-ին Մեդիա կենտրոնում տեղի ունեցած քննարկմանը բարձրաձայնեցին բնապահպանները:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ