Ժամանակն է փոփոխել ԱԺ-ում լրագրողների հավատարմագրման կարգը
28.10.2014
12:00
«ԱԺ-ում լրագրողների հավատարմագրման կարգն ի սկզբանե ունեցել է թերություններ, և լրագրողները պետք է ավելի շուտ բարձրաձայնեին իրենց մտահոգությունները» Մեդիա կենտրոնում հրավիրված ասուլիսին ասաց «Խոսքի ազատության պաշտպանության կոմիտեի» ղեկավար Աշոտ Մելիքյանը, իսկ ԱԺ հասարակայնության եւ տեղեկատվության միջոցների հետ կապերի վարչության պետ Արսեն Բաբայանն էլ ընդունեց, որ կարգի որոշ կետերի շուրջ կարելի է քննարկում կազմակերպել և որոշակի փոփոխություններ կատարել:

Անցյալ շաբաթ մի քանի լրատվամիջոց անդրադարձել է ԱԺ հասարակայնության եւ տեղեկատվության միջոցների հետ կապերի վարչության պետ Արսեն Բաբայանի  վերջին զգուշացումներին, որն ուղղված էր այն լրագրողներին, ովքեր կփորձեին խախտել խորհրդարանում լրագրողների հավատարմագրման կարգը: Դատելով  հրապարակումներից լրագրողներին հատկապես անհանգստացրել էր այն, որ 2009 թվականին ԱԺ նախագահի կայացրած որոշման համաձայն լրագրողներից պահանջվում  է խորհրդարանի տարածքում «ամրացնել հավատարմագիրը»:

Լրագրողական համայնքի որոշ ներկայացուցիչներ հրաժարվել էին ենթարկվել ԱԺ հասարակայնության եւ տեղեկատվության միջոցների հետ կապերի վարչության պետի պահանջին, ինչից հետո Արսեն Բաբայանը կատարել էր վերջին զգուշացումը, սպառնալով նաև, որ այն լրագրողները, ովքեր չեն ենթարկվի հաստատված կարգի պահանջներին հնարավոր է զրկվեն հավատարմագրից: «Բոլոր այն լրատվամիջոցներում, որտեղ այսօր քննադատություն կա, դրանք բոլորը հետեւանքն են նրա, որ փորձել են կարգը խախտել, իսկ մենք դա թույլ չենք տվել։ Մի դեպքում փորձել են 3-րդ լրագրող հավատարմագրել, մի դեպքում` ասում են, լավ, մի հավատարմագրեք, բայց թողեք թող անցաթղթով գա։ Ես նման բան թույլ տալու իրավունք չունեմ։» հարցազրույցներից մեկում ասել էր Արսեն Բաբայանը և այսօր լրագրողների հետ հանդիպման ժամանակ կրկնեց այդ միտքը:

Իհարկե եթե կա որոշում և այն չի բողոքարկվել , ուրեմն պետք է ենթարկվել դրան: Սակայն լրագրողներից շատերն իրազեկ չէին ոչ ԱԺ նախագահի այդ որոշմանը, ոչ հավատարմագրման կարգին, տեղեկացվածների մեծ մասն էլ չէր նկատել  կարգում առկա թերությունները, որոնց մասին  այսօրվա ասուլիսին  հայտնեց Խոսքի ազատության պաշտպանության կոմիտեի ղեկավար Աշոտ Մելիքյանը:

Դրանցից մեկը վերաբերում է լրագրողի պարտավորություններին, ըստ այդմ լրագրողը պարտավոր է «իր մասնագիտական գործունեությամբ կամ այլ գործողություններով չխոչընդոտել Ազգային ժողովի պատգամավորների, Ազգային ժողովի նիստերին ներկա գտնվող (մասնակցող) անձանց եւ Աշխատակազմի աշխատակիցների ծառայողական պարտականությունների կատարմանը»: Հաշվի առնելով, որ նման հարցերը խիստ սուբյեկտիվ են մեկնաբանվում, ապա կարելի է ասել, որ սրանով կարող է  նաև կամայականորեն սահմանափակվել լրագրողի գործունեությունը: Արսեն Բաբայանի մեկնաբանմամբ  «նկատի  ունեն այն բոլոր գործողությունները, որոնք պատգամավորը կհամարի  իր համար խոչընդոտող , այդ դեպքում նա  կմիջնորդի լրատվական վարչությանը, այսինքն վաչարարություն իրականացնող պաշտոնյային, նա էլ  կքննարկի մանրամասն` լսելով նաև լրագրողին եւ կհանգի եզրակացության` խոչընդոտվել է պատգամավորի աշխատանքը, թե՞ ոչ։»

Հաջորդ դրույթը, որն ըստ Աշոտ Մելիքյանի  թաքնված գրաքննություն է ենթադրում, վերաբերում է լրագրողին հավատարմագրումից զրկելու պայմանին, ըստ այդմ  հավատարմագրումը մերժվում է, եթե    լրագրողը կամ լրատվամիջոցը «տարածել է Ազգային ժողովի եւ աշխատակազմի գործունեության մասին այնպիսի տեղեկություններ, որոնք չեն համապատասխանում իրականությանը, ինչը հաստատվել է դատարանի վճռով»:

Աշոտ Մելիքյանի խոսքով հավատարմագրման կարգում իհարկե կան պահանջներ, որոնք բխում  են լրագրողական էթիկայի նորմերից և պետք է  կատարվեն, օրինակ, որ անհրաժեշտ է ամրացնել անվանաքարտը կամ  լրագրողը պարտավոր է մասնագիտական գործունեության իրականացման ընթացքում հարգել Ազգային ժողովի պատգամավորների եւ աշխատակազմի աշխատակիցների պատիվն ու արժանապատվությունը կամ հարգել  պատգամավորի կարծիքը կամ ցանկությունը, երբ նա չի ուզում հարցազրույց տալ:

Ամփոփելով միտքը Աշոտ Մելիքյանն առաջարկեց վերանայել հավատարմագրման կարգը, հարցը քննարկել լրագրողական կազմակերպությունների ներկայացուցիչների և հավատարմագրված լրագրողների մասնակցությամբ և «այն դրույթները, որոնք իսկապես չեն համապատասխանում ԶԼՄ մասին օրենքին կամ միջազգայնորեն ընդունված նորմերին, փոփոխել: Արսեն  Բաբայանն էլ ընդունելով, որ  լրագրողների հավատարմագրման կարգի մասին 2009 թվականին ընդունված որոշումը իսկապես անհրաժեշտ է վերանայել, նաև տեղեկացրեց, որ արդեն կա նման հանձնարարական: 

Լուսանկարներ
Տեսանյութ
Print Friendly and PDF
Այլ մամլո հաղորդագրություններ
Միջազգային հանրության արձագանքը ՀՀ-ում քաղաքացիական անհնազանդության գործողություններին
26.04.2018
12:00
Ապրիլի 26-ին «Մեդիա կենտրոնում» տեղի ունեցավ մամլո ասուլիս «Միջազգային հանրության արձագանքը ՀՀ-ում քաղաքացիական անհնազանդության գործողություններին» թեմայով:
Քաղաքագետների գնահատականը «թավշյա հեղափոխության» ընթացքին
26.04.2018
11:00
Ապրիլի 26-ին «Մեդիա կենտրոնում» տեղի ունեցավ քննարկում «Քաղաքագետների գնահատականը «թավշյա հեղափոխության» ընթացքին» թեմայով:
«Հայաստանի մանուկներ հիմնադրամ»-ի հիմնադիր Գարո Արմենի հարցազրույցը Հայաստանում տեղի ունեցող զարգացումների վերաբերյալ
24.04.2018
12:00
«Փոփոխություններն անխուսափելի են՝ քանզի դրանց միջոցով է միայն, որ առաջընթացը հնարավոր է դառնում». այսպիսի միտք է հայտնել Գարո Արմենը Հայաստանի հասարակությանն ու իշխանություններին ուղղված հայտարարությունում:
Մշակութային և հասարակական գործիչների արձագանքը Հայաստանում ընթացող դրամատիկ իրադարձություններին
23.04.2018
12:00
«Սիստեմայի մենեջմենթի բացակայություն է ընդհանրապես երկրում: Այն հայտարարությունից հետո, որ երկրում պետք է Մարտի 1 կրկնվի, միակ բանը, որ իմ համեստ հնարավորությունները թույլ են տալիս՝ հրաժարվել այն կոչումից, որը ստացել եմ այս երկրի ղեկավարներից»,- ասաց «Կադանս» երաժշտության կենտրոնի հիմնադիր և գործադիր տնօրեն Նիկա Բաբայանը ապրիլի 23-ին Մեդիա կենտրոնում «Մշակութային և հասարակական գործիչների արձագանքը Հայաստանում ընթացող դրամատիկ իրադարձություններին» թեմայով ասուլիս-քննարկմանը:
«Իրավախախտումներ բերման ենթարկվածների նկատմամբ. քաղաքացիական ակտիվիստ Տիգրան Մազմանյանի կալանավորման որոշումը»
20.04.2018
16:00
Քաղաքացիական ակտիվիստ Տիգրան Մազմանյանին 2 ամսով կալանքի տակ պահելու դատական որոշումը փաստաբանները որակում են քաղաքական հետապնդում քաղակտիվիստի նկատմամբ:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ