ԱԺ 5-րդ նստաշրջանի գործունեության ամփոփում
05.09.2014
14:00
«Ակնհայտ է, որ ՀՀ-ի ներկա պառլամենտը չի կարող ապահովել պառլամենտարիզմի բացարձակ դրսևորումները»- Մեդիա կենտրոնի սրահում տեղի ունեցած ասուլիսի ընթացքում «ԱԺ օրենսդրական գործունեության մոնիթորինգ» ծրագրի շրջանակներում ներկայացված արդյունքներից եզրակացրեց ՀՀ ԱԺ պատգամավոր ՀՅԴ խմբակցության անդամ Արծվիկ Մինասյան:

«ԱԺ օրենսդրական գործունեության մոնիթորինգ» ծրագրի  ղեկավար Լուսինե Վասիլյանը և ծրագրի փորձագետ Գոռ Աբրահամյանը ներկայացրեցին 5-րդ  գումարման Ազգային ժողովի  5-րդ նստաշրջանի  գործունեության դիտարկման արդյունքները: Ամփոփումը կազմվել է լրագրողական դիտարկումների, փորձագիտական վերլուծությունների և parliamentmonitoring.am կայքի վիճակագրական ծրագրի տվյալների համադրմամբ:

Զեկույցում ներկայացվել են 5-րդ նստաշրջանի ընթացքում խորհրդարանի և ԱԺ խմբակցությունների գործունեության հիմնական ցուցանիշներն ու  ընդհանուր միտումները,  նստաշրջանի ընթացքում ընդունված մոտ մեկ տասնյակ օրենքների  դիտարկման արդյունքները: Անդրադարձ է կատարվել ԱԺ վերահսկողական գործառույթին, նաև՝  ԱԺ էթիկայի հանձնաժողովի աշխատանքի արդյունքներին:

Ասուլիսին  մասնակցում էին նաև պատգամավորներ Արամ Մանուկյանը, Էդմոն Մարուքյանը և Արծվիկ Մինասյանը:

Նստաշրջանը թվերով

ԱԺ մոնիթորինգի արդյունքների համաձայն

  • 5-րդ նստաշրջանի ընթացքումընդունված օրենքներից 136-ի հեղինակը ՀՀ կառավարությունն է, և միայն  7-ինը` ԱԺ պատգամավորները: Օրինաստեղծ աշխատանքում խորհրդարանի նախաձեռնողականության մակարդակը նախորդ նստաշրջանի համեմատ նվազել է: Եթե 4-րդ նստաշրջանի ընթացքում օրենսդրական նախաձեռնությունների ԱԺ-կառավարություն  տոկոսային հարաբերակցությունը 87/13 էր, ապա 5-րդ նստաշրջանում ` 95/5: 
  • Կառավարության նախաձեռնությամբ հրավիրված 2 արտահերթ նստաշրջանի  9 օրերի ընթացքում խորհրդարանն ավելի շատ օրենք է ընդունել, քան գարնանային ողջ նստաշրջանի 5 ամիսների ընթացքում. 143 օրենքից 77-ն ընդունվել է արտահերթ նստաշրջաններում:
  • 6 տասնյակից ավելի օրինագծեր կառավարությունը համարել է անհետաձգելի, և խորհրդարանն անխտիր բոլորի վերաբերյալ 24-ժամյա ռեժիմով հաջորդ ընթերցումները կազմակերպելու որոշումներ է ընդունել. կառավարությունը որևէ կերպ չի հիմնավորել անհետաձգելի համարելու պատճառները, խորհրդարանը դրանցով չի հետաքրքրվել:
  • 3 տասնյակից ավելի օրինագծեր՝ մի քանի հարյուր էջ ընդհանուր ծավալով, օրենք դառնալու ճանապարհը խորհրդարանում սկսել են հունիսյան  արտահերթի առաջին օրը (հունիսի 18) և 4-րդ օրն արդեն դարձել են ընդունված օրենքներ: Ամենավիճահարույց օրենսդրական փաթեթները` կուտակային կենսաթոշակների (11 օրինագիծ) և շրջակա միջավայրի  (3 օրինագիծ) մասին,  բոլոր 3 ընթերցումներն անցել են ռեկորդային ժամանակահատվածում ՝ մեկ օրում: 
  • Նստաշրջանի ընթացքում ընդունվել է մեկ օրինագիծ, որի  տակ ստորագրել են խորհրդարանական բոլոր խմբակցությունները (Ազգային ժողովում գլխավոր դատախազի հաղորդում ներկայացնելու ընթացակարգի մասին), իսկ պատգամավորների նախաձեռնությունների արդյունքում  նստաշրջանի ընթացքում ընդունված բոլոր 7 օրենքների հեղինակները  հանրապետականներն են` միայնակ կամ այլ խմբակցությունների հետ:

Նստաշրջանի ընթացքում ոչ իշխանական քառյակի հեղինակած ոչ մի օրինագիծ չի ընդունվել: Նիստերի դահլիճում քննարկված և քվեարկությամբ մերժված 5 նախաձեռնություն  օրակարգ է ընդգրկվել արտահերթ ընթացակարգով:  Քառյակի ավելի քան 2 տասնյակ օրինագիծ գլխադասային հանձնաժողովներում դրական եզրակացություն չի ստացել, օրակարգ չի ընդգրկվել կամ հետաձգվել է:

Մեր խնդիրը մեր քաղաքական համակարգի մեջ է

ԱԺ պատգամավոր ՀԱԿ խմբակցության քարտուղար Արամ Մանուկյանի մեկնաբանությամբ լեկույցում առկա փաստերը լրջագույն գնահատականներ են, մասնավորապես, այն, որ խորհրդարանում քաղաքական մեծամասնությունը օրենքների մեծ մասը անց է կացրել արտակարգ ռեժիմով՝ 143-ից 77-ը անցել է արտակարգ ռեժիմով,  պարզապես խայտառակություն է:

Արդյո՞ք հնարավոր է խորհրդարաննի նման պատկերի պայմաններում անցնել պառլամենտական համակարգին, հարցին ԱԺ պատգամավոր ՀՅԴ խմբակցության անդամ Արծվիկ Մինասյանը պատասխանեց.  «Ակնհայտ է, որ ՀՀ-ի ներկա պարլամենտը չի կարող ապահովել պարլամենտարիզմի բացարձակ դրսևորումները», ապա հավելեց, որ անհրաժեշտ է փոխել ընտրական համակարգը «եթե չփոխենք ընտրական համակարգը, չենք ունենա որակյալ պառլամենտ»:

«Մեր խնդիրը մեր քաղաքական համակարգի մեջ է, մեծամասնականի և համամասնականի մեջ չէ».,- ասաց ԱԺ անկախ պատգամավոր Էդմոն Մարուքյանը:

Հանդիպման ավարտին «ԱԺ օրենսդրական գործունեության մոնիթորինգ» ծրագրի  ղեկավար Լուսինե Վասիլյանն ամփոփելով միտքն ասաց, որ այս զեկույցի և իրենց կատարած աշխատանքի նպատակն, առաջին հերթին, ընտրողին իրազեկելն է, «Սա ուղերձ է ընտրողին»:

«ԱԺ օրենսդրական գործունեության մոնիթորինգ» ծրագիրն իրականացրել է «ՄԱՆԴԱՏ» տեղեկատվական հասարակական կազմակերպությունը: Ծրագրի իրագործումն ու զեկույցի  հրատարակումը ֆինանսավորվել է «Բաց հասարակության հիմնադրամներ – Հայաստան»-ի կողմից:

Տեսանյութ
Print Friendly and PDF
Այլ մամլո հաղորդագրություններ
«Գործարկվում է «Տվյալների պաշտպանության ընդհանուր կարգավորում»-ը. ինչպիսի՞ փոփոխություններ են սպասվում»
23.05.2018
12:00
Մայիսի 23-ին «Մեդիա կենտրոնում» տեղի ունեցավ քննարկում «Գործարկվում է «Տվյալների պաշտպանության ընդհանուր կարգավորում»-ը. ինչպիսի՞ փոփոխություններ են սպասվում» թեմայով:

«Բնապահպանության խնդիրներն ու ռիսկերը. առաջարկներ ուղղված նոր կառավարությանը»
22.05.2018
11:00
Բնապահպանության ոլորտում առկա խնդիրների, լուծումների և նոր կառավարությանն ուղղված իրենց առաջարկների մասին մայիսի 22-ին Մեդիա կենտրոնում տեղի ունեցած քննարկմանը բարձրաձայնեցին բնապահպանները:
Հեռարձակվող ԶԼՄ-ների գործունեության և մեդիա ոլորտում բարեփախումների անհրաժեշտություն. Առաջարկներ ուղղված նոր կառավարությանը
21.05.2018
13:00
Հեռարձակվող ԶԼՄ-ների գործունեության և մեդիա ոլորտում բարեփոխումների անհրաժեշտության վերաբերյալ մայիսի 21-ին Մեդիա կենտրոնում տեղի ունեցավ քննարկում, որին մասնակցում էին Երևանի մամուլի ակումբի նախագահ Բորիս Նավասարդյանը, Խոսքի ազատության պաշտպանության կոմիտեի նախագահ Աշոտ Մելիքյանը և ՀՀ Հեռուստատեսության և ռադիոյի հանձնաժողովի անդամ Արմեն Մկրտչյանը:
«Այլընտրանքային հանրակրթության աջակիցների միության» ստեղծման ազդարարում
21.05.2018
12:00
Մայիսի 21-ին «Մեդիա Կենտրոնում» տեղի ունեցավ ասուլիս, որի ընթացքում ՀՀ կրթական ոլորտի ներկայացուցիչները ազդարարեցին «Այլընտրանքային հանրակրթության աջակիցների միության» ստեղծման մասին, կներկայացնեն ձևավորված միության կազմը, նպատակներն ու գործառույթները։
Թավշյա հեղափոխություն. մշակութաբանական փոփոխություններ
18.05.2018
11:00
Մշակութաբանական ի՞նչ փոփոխություններ են ակնկալվում թավշյա հեղափոխությունից: Ինչպե՞ս կառուցել ժողովրդին ծառայելու այլ մոդել, ինչպե՞ս պաշտոնյա-քաղաքացի հարաբերությունները պարզեցնել, ստեղծել կառավարման մարդակենտրոն քաղաքականություն։ Ի՞նչ փոփոխություններ են անհրաժեշտ հասարակության մեջ վարքագծային փոփոխությունների հասնելու համար:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ