Երևանում մեկնարկեց «Նկարիչների փոխայցելություններ» նախագիծը
01.09.2014
13:00
Սերդար Յըլմազի ու Գագիկ Չարչյանի ղեկավարությամբ Թուրքիայից և Հայաստանից երիտասարդ նկարիչների խումբը Երևանում կմասնակցի վարպետաց դասերի, միջոցառումների, ինչպես նաև կնկարազարդի երևանյան պատերից մեկը: «Նկարիչների փոխայցելություններ» նախագծի շրջանակներում Երևան ժամանած թուրք նկարիչներն այստեղ կանցկացնեն 8 օր:

Այսօր «Մեդիա կենտրոնում» տեղի ունեցած մամլո ասուլիսին «Նկարիչների փոխայցելություններ» նախագծի մասնակից խմբերի ղեկավարներ Սերդար Յըլմազն ու Գագիկ Չարչյանն, ինչպես նաև Հանրային լրագրության ակումբի նախագահ Սեդա Մուրադյանը ներկայացրեցին նախագիծը, մասնակիցներին ու իրենց սպասումները նախագծից:

Ներկայիս հայ ու թուրք սերունդները կարող են վերացնել փակ սահմանները

«Հայաստանի ու Թուրքիայի այս սերունդն ունի առավելություն. կարող են առանց սահմանների ստեղծագործել միասին, շփվել իրար հետ», - հայտարարեց Սերդար Յըլմազը` նշելով, որ եթե տարիներ առաջ սահմանը փակ էր իր համար, այժմ ինքն ուրախ է` սահմանները բացվել են իր 4 ուսանողների համար:

Հայաստանի նկարիչների խմբի ղեկավար Գագիկ Չարչյանը վստահ է, որ սահմանները միայն աշխարհագրական չեն. դրանք հանրության` յուրաքանչյուր անհատի մեջ են, իսկ արվեստն օգնում է վերացնել այդ սահմանները:

«Արվեստագետները չեն քննարկում միայն տեղային խնդիրներ, այլ դիտարկում են դրանք համամարդկային պրիզմայից: Շատ լավ առիթ է վերանայել խնդիրները, որոնք կան և´ համամարդկային տեսանկյունից և´ տեղային մշակութային իմաստով», - հայտարարեց հայ նկարիչների խմբի ղեկավարը:

Սերդար Յըլմազը ցավով նշեց, որ իր երկրում ավելի հաճախ փորձում են ինքնությունը դարձնել միատեսակ, ինչը հանգեցրեց նրան, որ մարդիկ սկսեցին վախենալ տարբերություն ասվածից, բայց իրականում տարբեր մշակույթների կրողների հետ շփվելիս մարդ հասկանում է, որ հնարավոր է լինել տարբեր, բայց նաև շատ նման:

Իսկ Գագիկ Չարչյանի դիտարկմամբ` նման նախագծերն անփոխարինելի են հայ-թուրքական հարաբերությունների «միստիֆիկացիայից ազատվելու համար», և այստեղ լավագույն միջոցն առանց միջնորդների շփումն է:

«Նկարիչների փոխայցելություններ» նախագիծը մեկ քայլ է դեպի հայ-թուրքական հարաբերություններիկարգավորումը

«Այս նախագիծն առաջինն է, որում ընդգրկված են հայ ու թուրք երիտասարդ նկարիչներ», - հայտարարեց ՀԼԱ նախագահ Սեդա Մուրադյանը` նշելով, որ արվեստն ու նման նախագծերն այն լույսն են, որոնք լուսավորում են Հայաստանի ու Թուրքիայի քաղաքացիական հասարակության ներկայացուցիչների կառուցած ճանապարհը, որը տանում է դեպի երկխոսություն:

Նախագծի առաջին փուլը մեկնարկեց այսօր Երևանում, իսկ երկրորդ փուլը լինելու է հոկտեմբերի առաջին շաբաթվա ընթացքում Թուրքիայում:

Սեդա Մուրադյանն ընդգծեց, որ միջոցառումները բաց են բոլորի համար` վարպետաց դասերը, բացօթյա արվեստնոցները, հանդիպումները:

«Նախագծի ավարտին նկարիչները կնկարազարդեն երևանյան պատերից մեկը, և հուսով եմ` այդ հետքը, որ մնալու է Երևանում, մեզ դեռ երկար կհիշեցնի արվեստի միջոցով երկխոսելու կարևորության մասին: Այն ոչ թե կդառնա վերջակետն այս նախագծի, այլ ստորակետը, որից հետո մենք կանցնենք Ստամբուլի փուլին», - ընդգծեց Սեդա Մուրադյանը:

«Նկարիչների փոխայցելություններ» նախագիծն իրականացնում են Հանրային լրագրության ակումբ և Անադոլու Քյուլթյուր հասարակական կազմակերպությունները «Աջակցություն Հայաստան-Թուրքիա կարգավորման գործընթացին» ծրագրի շրջանակներում:

«Աջակցություն Հայաստան-Թուրքիա կարգավորման գործընթացին» 18 ամսյա ծրագիրը մեկնարկել է 2014թ.-ի հունվարին, իրականացնում է Հայաստանի և Թուրքիայի ութ հասարակական կազմակերպություններից բաղկացած կոնսորցիումը:  Ծրագիրը իրականացվում է Եվրոպական միության ֆինանսական աջակցությամբ «Կայունության գործիքի» շրջանակներում: Նպատակն է աջակցել քաղաքացիական հասարակության ջանքերին՝ ուղղված մշակութային և կրթական ծրագրերի միջոցով Հայաստան-Թուրքիա հարաբերությունների կարգավորմանն ու փակ սահմանների բացմանը:

Լուսանկարներ
Տեսանյութ
Print Friendly and PDF
Այլ մամլո հաղորդագրություններ
Խաղաղության ընկալումը․ ԼՂ հակամարտության մոտեցումների վերլուծությունը
06.02.2019
12:00
ԼՂ հակամարտության հանգուցալուծմանը հասնելու միակ ճանապարհը խաղաղությանը նախապատրաստվելն է: Թեպետ հակամարտող հանրույթներում գերիշխում է պատերազմի պրոպագանդան, սակայն Հայաստանում, Լեռնային Ղարաբաղում եւ Ադրբեջանում մարդիկ սկսել են ավելի ու ավելի քննադատաբար մոտենալ հնարավոր պատերազմին: Հարցեր են հնչեցնում պատերազմի ու խաղաղության գնի մասին:
2017-2018թթ պետգնումների համակարգի մոնիտորինգի արդյունքները
28.12.2018
12:00
Դեկտեմբերի 28-ին «Մեդիա կենտրոնում» «Հանրային քաղաքականության հետազոտությունների ազգային կենտրոն» ՀԿ-ն ներկայացրեց 2017-2018թթ (I կիսամյակի) պետական գնումների համակարգի հիմնական միտումները։
Իրավապաշտպանների առաջարկները ՔԿՀ-ներում բարեփոխումների իրականացման ռազմավարության վերաբերյալ
27.12.2018
13:30
Արդարադատության նախարարության կողմից е-draft կայքում 2018 թ. դեկտեմբերի 19-ից հանրային քննարկման է դրվել քրեակատարողական համակարգում իրավիճակի բարելավման նպատակով 2018 -2038 թթ. ռազմավարությունը և դրա իրականացման 20 -ամյա միջոցառումների ծրագիրը հաստատելու մասին կառավարության որոշման նախագիծը։ Այն հանրային քննարկման է դրված լինելու մինչև 2019 թ. հունվարի 8-ը։
Օպտիմա՞լ է նախարարությունների օպտիմալացումը
26.12.2018
12:00
Դեկտեմբերի 26-ին Մեդիա կենտրոնում տեղի ունեցավ քննարկում «Օպտիմա՞լ է նախարարությունների օպտիմալացումը. գնահատում են մասնագետները» թեմայով:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ