Վարդան Պետրոսյանի կալանքի որոշումը կբողոքարկվի ՄԻԵԴ-ում
21.05.2014
10:30
Ավելի քան 6 ամիս կալանքի տակ գտնվող դերասան Վարդանի Պետրոսյանի փաստաբանները նրա հանդեպ նախնական կալանքի կիրառումը համարում են անհիմն և անմեղության կանխավարկածի ոտնահարում. նրանք պատրաստվում են դիմել Մարդու իրավունքների եվրոպական դատարան:

«Ամիսներ շարունակ կալանքի համար ոչ մի հիմք չներկայացնելուց հետո ընդհանուր ձևակերպումներով դատարանում ներկայացվել է կալանքի ժամկետը երկարաձգելու երկու հիմք՝ փախուստի և գործով վկաների վրա ճնշում գործադրելու վտանգ, առանց պարզաբանելու, թե կոնկրետ ի ՞նչ վտանգի մասին է խոսքը՝ ինչպես պահանջում է Եվրոպական կոնվենցիան»,- «Մեդիա կենտրոնում» ասաց Վարդան Պետրոսյանի ֆրանսիացի փաստաբան Մարի Դոզեն, գործընկեր փաստաբան Նիկոլայ Բաղդասարյանի հետ կազմակերպված համատեղ մամլո ասուլիսին:

Վարդան Պետրոսյանի փաստաբանները հերքեցին կալանքը երկարաձգելու համար դատարանում ներկայացված երկու հիմքերը.

«Վարդան Պետրոսյանը հանձնել է իր երկու անձնագրերը դատարանին, հետևաբար փախուստի կասկածի հիմքեր չկան, կա միայն դատարանի վերացական տերմիններով գրված որոշում»,- նշեց փաստաբան Մարի Դոզեն:

«Դեպքի վկաները միայն տուժողներն են ու Վարդան Պետրոսյանը, այլ վկաներ չկան, և դատարանի հիմնավորումը, թե կալանքի հանման դեպքում Վարդանը կարող է ճնշում գործադրել վկաների վրա՝ անտրամաբանական է», -պարզաբանեց փաստաբան Նիկոլայ Բաղդասարյանը:

Վարդան Պետրոսյանի ներկայացուցիչները պատրաստվում են բողոքարկել Կոտայքի մարզի առաջին ատյանի ընդհանուր իրավասության դատարանի կալանքի վերաբերյալ որոշումը ՄԻԵԴ-ում. «Մենք կզետեղենք այս դատական ակտը մեր դիմումի մեջ ու կներկայացնենք Եվրոպական դատարան, քանի որ սպառել ենք այստեղ հարցը լուծելու բոլոր միջոցները»,- ասաց Նիկոլայ Բաղդասարյանը:

Հիշեցնենք, որ 2013թ. հոկտեմբերի 20-ին խոշոր ավտովթար էր տեղի ունեցել Եղվարդ-Երևան ճանապարհին՝ բախվել էին «ՎԱԶ 2121» և BMW մակնիշի ավտոմեքենաներ: BMW մակնիշի մեքենայի ղեկին Վարդան Պետրոսյանն էր: Վթարի հետևանքով «Վազ 2121» մակնիշի մեքենայի ուղևորներից երկուսը՝ Էդգար և Էդուարդ Հակոբյանները մահացել էին:

Վթարից որոշ ժամանակ անց շրջանառության մեջ մտան լուրեր, որ Վարդան Պետրոսյանը վթարի պահին եղել է ալկոհոլի ազդեցության տակ: Դերասանի փաստաբանները ևս մեկ անգամ անդրադարձան այս հարցին, նշելով, որ Վարդան Պետրոսյանը ստուգման է ենթարկվել դեպքից հետո, ինչը ցույց է տվել, որ նա եղել է սթափ վիճակում:

«Եթե նախաքննությունն ու փորձագետներն ասում են, որ ալկոհոլի ազդեցություն չի եղել, ապա շատ անհասկանալի է, թե ինչու է դատարանում խոսվում միայն դրանից,- ասաց ֆրանսիացի փաստաբանը,- մենք չունենք մեղադրանք, քանի որ Վարդանը չի մեղադրվում անսթափ լինելու մեջ. չգիտեմ՝ ինչ են քննում դատարանում, բայց հաստատ ոչ ճանապարհատրանսպորտային պատահար»:

Փաստաբան Նիկոլայ Բաղդասարյանը վթարի 3D վերարտադրմամբ և վթարի վայրում կատարված տեսագրությամբ լրագրողներին ներկայացրեց վթարի մանրամասները: Նա հերքեց այն պնդումները, որ Վարդան Պետրոսյանը գերացազանցել է ճանապարհի այդ հատվածում թույլատրելի արագությունը. «Տվյալ հատվածում թույլատրելի արագությունը եղել է 90 կմ/ժ, քանի որ դա բնակավայրից դուրս հատված է»:

Անդրադառնալով մարդու անմեղության կանխավարկածի փաստին՝ փաստաբանները նշեցին, որ վերջերս «Արմենիա» հեռուստաընկերությամբ վթարը վերականգնող ֆիլմի ցուցադրումը ենթադրում է պատասխանատվություն. «Ես դիմել եմ հեռուստաընկերությանը և նամակով տեղեկացրել իրենց, որ խախտվել է անձի անմեղության կանխավարկածը: Ֆրանսիայում այն ցուցադրող հեռուստատեսությունը կդատապարտվեր»,-ասաց ֆրանսիացի փաստաբանը: Մարի Դոզեի կարծիքով՝ կարող է հեռուստահաղորդում լինել, որում տուժողները կխոսեն իրենց ցավի մասին, բայց այդ սյուժեում ներկայացված է մի պատկեր, երբ մի մեքենա բարձր արագությամբ, զիգզագներով սլանում է փողոցով. «Կարելի է ենթադրել, որ այդպես վարողը հաստատ խմած է: Սա ակնհայտ ոտնահարում է մարդու անմեղության կանխավարկածը: Այդպիսի ֆիլմն արդեն ասում է դատավորին, որ հենց սա պիտի տեսնեք գործի մեջ եւ ժողովրդին ասում, որ սա պիտի մտածեք գործի մասին:»

Նիկոլայ Բաղդասարյանն էլ հավելեց, որ մինչև հիմա պահպանվել է խորհրդային ժամանակների գործելաոճը՝ վարկաբեկել մարդուն նրան դատապարտելու համար:

Փաստաբանների կարծիքով՝ Վարդան Պետրոսյանի դատավարությունն անցնում է Մարդու իրավունքների և հիմնարար ազատությունների եվրոպական կոնվենցիայի տարբեր կետերի ոտնահարումներով:

«Այս դատավարության համար Հայաստանը հերթական անգամ պարտություն կկրի Եվրոպական դատարանում»,- ասաց Դոզեն, ներկայացնելով վիճակագրություն, ըստ որի՝ այն պահից, երբ Հայաստանը ստորագրել է Մարդու իրավունքների եվրոպական կոնվենցիան, 48 դեպքից 43-ի դեպքում ՄԻԵԴ-ը դատապարտել է Հայաստանի Հանրապետությանը:

Լուսանկարներ
Տեսանյութ
Print Friendly and PDF
Այլ մամլո հաղորդագրություններ
«Անցումային արդարադատության իրականացման մեխանիզմները Հայաստանում»
23.05.2019
15:00
Մեդիա կենտրոն, Երևան: Մայիսի 23-ին Երևանի պետական համալսարանի Պալեանների անվան դահլիճում «Մեդիա կենտրոնը»-ը անցկացրեց քննարկում «Անցումային արդարադատության իրականացման մեխանիզմները Հայաստանում» թեմայով:
Ազգային անվտանգության ծառայության գործառույթներն ու լիազորությունների շրջանակը
22.05.2019
11:00
Մեդիա կենտրոն, Երևան: Մայիսի 22-ին «Մեդիա կենտրոնում» տեղի ունեցավ քննարկում «Ազգային անվտանգության ծառայության գործառույթներն ու լիազորությունների շրջանակը» թեմայով:
«Դիտորդների խմբի գործունեության խոչընդոտները և քրեակատարողական հիմնարկներում մարդու իրավունքների խախտումների խնդիրները 2018-2019թթ.-ին»
21.05.2019
11:00
Մեդիա կենտրոն, Երևան: Մայիսի 21-ին ժամը 11:00-ին Մեդիա կենտրոնում տեղի ունեցավ մամուլի ասուլիս՝ «Դիտորդների խմբի գործունեության խոչընդոտները և քրեակատարողական հիմնարկներում մարդու իրավունքների խախտումների խնդիրները 2018-2019թթ.-ին» թեմայով
Ռոբերտ Քոչարյանի հայտարարությունները սուտ են, նա կխուսափի՞ քննությունից․ քննարկում Մեդիա կենտրոնում
20.05.2019
10:00
Մեդիա կենտրոն, Երևան: Մայիսի 20-ին Մեդիա կենտրոնում տեղի ունեցավ «Ռոբերտ Քոչարյանն ազատվեց կալանքից. դատական իշխանության անկախությու՞ն, թե՞ դատական համակարգի հին արատներ» թեմայով քննարկում։
«Բռնությունը ընտանիքում. իրազեկման բացը կրթական ծրագրերում և օրենսդրական փոփոխությունների անհրաժեշտությունը»
15.05.2019
12:00
Մեդիա կենտրոն, Երևան: Մայիսի 15-ին, ժամը 12:00-ին «Մեդիա կենտրոնում» տեղի ունեցավ քննարկում` նվիրված Ընտանիքի միջազգային օրվան: Քննարկման թեման էր՝ «Բռնությունը ընտանիքում. իրազեկման բացը կրթական ծրագրերում և օրենսդրական փոփոխությունների անհրաժեշտությունը»:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ