«Այն իշխանությունը, որ կրակ է բացում իր ժողովրդի դեմ, լեգիտիմ լինել չի կարող»
20.02.2014
15:00
«Մենք հրավիրում ենք Ուկրաինա՝ Կիև և շրջաններ, բոլոր միջազգային կազմակերպություններին, բոլոր երկրների Ազգային ժողովի ներկայացուցչիներին և խնդրում ենք Եվրոպային քայլեր ձեռնարկել ուկրաինական օլիգարխների՝ եվրոպական բանկերում ունեցած բանկային հաշիվներն արգելափակելու ուղղությամբ»,- այսպիսի կոչ արեց Եվրամայդան SOS քաղաքացիական նախաձեռնության համակարգող Օլեքսանդրա Մատվիյչուկն այսօր «Մեդիա կենտրոնում» տեղի ունեցած «Իրադրությունը Ուկրաինայում» թեմայով քննարկմանը:

Մատվիյչուկի խոսքով՝ Ուկրաինայի ընդդիմությունը երբեք չի ղեկավարել մայդանը: Այն տարբեր գաղափարական խմբերի ապակենտրոնացված հավաք է:

«Ուկրաինայում իշխանությունը պատերազմ է վարում սեփական ժողովրդի դեմ, այլ կերպ այս իրավիճակը չէի անվանի»,- ասաց լրագրող, մեդիա փորձագետ Դմիտրո Կրիկունը: Նա փաստեց, որ ըստ Ուկրաինայում անցկացված սոցիոլոգիական հարցումներից մեկի՝ Մայդանում հավաքվածների ընդամենը 10 տոկոսն է եկել՝ ընդդիմության կոչերից ելնելով:

«Այն իշխանությունը, որ կրակ է բացում իր ժողովրդի դեմ, լեգիտիմ լինել չի կարող»,- նշեց Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը: Ցավակցելով զոհերի հարազատներին և իր սոլիդարությունը հայտնելով մայդանում պայքարող քաղաքացիներին՝ նա կարծիք հայտնեց, որ Ուկրաինան որակապես տարբերվում է հետսովետական բոլոր երկրներից, նույնիսկ Վրաստանից. «Ուկրաինայում, որ սովոր է տարբեր ազատությունների, հնարավոր չէ մտցնել բելառուսական ավտորիտար համակարգ»:

«Մայդանում հավաքվածների առաջին պահանջը Յանուկովիչի հրաժարականն է»,- կարծում է Ինտերնյուս-Ուկրաինայի ներկայացուցիչ Անատոլի Մարցինովսկին: Անդրադառնալով արտաքին ուժերի դիրքորոշմանը՝ Անատոլի Մարցինովսկին նշեց, որ մայդանում հավաքվածների տեսանկյունից ԱՄՆ-ի դիրքորոշումն Ուկրաինայում տեղի ունեցող իրադարձությունների նկատմամբ ավելի ընդունելի է, քան Եվրամիության դիրքորոշումը»:

Մեկնաբանելով իրավիճակը՝ Օլեքսանդրա Մատվիյչուկը հայտնեց. «Եթե նախկինում Եվրամայդան SOS քաղաքացիական նախաձեռնությանը զանգում էին մայդանի զոհերի և վիրավորների հարազատները՝ օգնության համար, ապա երեկվանից մենք ենք զանգում և հայտնում մարդկանց, որ իրենց հարազատները զոհվել են»:

Դմիտրո Կրիկունի կարծիքով՝ Ուկրաինայում ազդեցիկ լրատվամիջոցները հիմնականում իշխանության ձեռքում չեն գտնվում և այդ առումով իրավիճակն Ուկրաինայում բարվոք է: Նա կոչ արեց իր բոլոր գործընկերներին՝ լրագրողներին, չբնորոշել իրադրությունը սուր արտահայտություններով, ինչպիսին է «քաղաքացիական պատերազմը». «Կիևում և այլ քաղաքներում հիմա ժողովուրդն ընդդիմանում է կառավարությանը, իշխանությունն էլ դիմում է ուժային գործողությունների և հանցավոր խմբերի, որոնք պաշտպանում են իշխանությանը, այսպիսին է իրադրությունը»:

Եզրափակելով քննարկումը՝ Ստեփան Գրիգորյանն ասաց. «Ուկրաինայի եվրոպական ապագան շատ շոշափելի է: Այդ առումով Հայաստանի իրավիճակի հետ ընդհանուր բան չկա: Մեր ընդդիմության օրակարգն այլ է»:

Փետրվարի 20-ին «Մեդիա կենտրոնում» տեղի ունեցավ «Իրադրությունը Ուկրաինայում» թեմայով քննարկում: Քննարկման բանախոսներն էին` Դմիտրո Կրիկուն՝ լրագրող, մեդիա փորձագետ, Անատոլի Մարցինովսկի՝ Ինտերնյուս-Ուկրաինայի ներկայացուցիչ, Օլեքսանդրա Մատվիյչուկ՝ Եվրամայդան SOS քաղաքացիական նախաձեռնության համակարգող, Քաղաքացիական ազատությունների կենտրոնի ղեկավար, Ստեփան Գրիգորյան, Գլոբալիզացիայի և տարածաշրջանային համագործակցության վերլուծական կենտրոնի ղեկավար:

Տեսանյութ
Print Friendly and PDF
Այլ մամլո հաղորդագրություններ
Խաղաղության ընկալումը․ ԼՂ հակամարտության մոտեցումների վերլուծությունը
06.02.2019
12:00
ԼՂ հակամարտության հանգուցալուծմանը հասնելու միակ ճանապարհը խաղաղությանը նախապատրաստվելն է: Թեպետ հակամարտող հանրույթներում գերիշխում է պատերազմի պրոպագանդան, սակայն Հայաստանում, Լեռնային Ղարաբաղում եւ Ադրբեջանում մարդիկ սկսել են ավելի ու ավելի քննադատաբար մոտենալ հնարավոր պատերազմին: Հարցեր են հնչեցնում պատերազմի ու խաղաղության գնի մասին:
2017-2018թթ պետգնումների համակարգի մոնիտորինգի արդյունքները
28.12.2018
12:00
Դեկտեմբերի 28-ին «Մեդիա կենտրոնում» «Հանրային քաղաքականության հետազոտությունների ազգային կենտրոն» ՀԿ-ն ներկայացրեց 2017-2018թթ (I կիսամյակի) պետական գնումների համակարգի հիմնական միտումները։
Իրավապաշտպանների առաջարկները ՔԿՀ-ներում բարեփոխումների իրականացման ռազմավարության վերաբերյալ
27.12.2018
13:30
Արդարադատության նախարարության կողմից е-draft կայքում 2018 թ. դեկտեմբերի 19-ից հանրային քննարկման է դրվել քրեակատարողական համակարգում իրավիճակի բարելավման նպատակով 2018 -2038 թթ. ռազմավարությունը և դրա իրականացման 20 -ամյա միջոցառումների ծրագիրը հաստատելու մասին կառավարության որոշման նախագիծը։ Այն հանրային քննարկման է դրված լինելու մինչև 2019 թ. հունվարի 8-ը։
Օպտիմա՞լ է նախարարությունների օպտիմալացումը
26.12.2018
12:00
Դեկտեմբերի 26-ին Մեդիա կենտրոնում տեղի ունեցավ քննարկում «Օպտիմա՞լ է նախարարությունների օպտիմալացումը. գնահատում են մասնագետները» թեմայով:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Հայաստան-Թուրքիա Միջոցառումներ